برطانیہ: ہفتے میں چار دن کام کا تجربہ کامیاب

برطانیہ میں ہفتے میں چار دن کام کرنے کا ایک حالیہ تجربہ کامیاب رہا ہے۔

گزشتہ برس جون سے دسمبر کے درمیان 61 کمپنیوں کے تین ہزار ملازمین سے ہفتے میں چار دن کام کرایا گیا تھا۔

اس تجربے کے بعد 61 میں سے 56 کمپنیوں نے کہا ہے کہ ان کا مستقبل میں بھی چار دن کے ورک ویک کو جاری رکھنے کا ارادہ ہے۔

ٹرائل میں شریک ملازمین کا کہنا تھا کہ ہفتے میں چار دن کام کرنے سے ان کی پرسنل اور ورک لائف میں توازن پیدا ہوا ہے۔

ٹرائل کے نتائج کے مطابق اس پالیسی کے نتیجے میں ملازمین کے جاب چھوڑنے کے امکانات بھی کم ہو جاتے ہیں

افغان صوبے ہلمند میں ویڈیو رپورٹنگ پر پابندی لگا دی گئی

افغانستان کے صوبہ ہلمند میں طالبان حکام نے صحافیوں کو حکم دیا ہے کہ وہ ویڈیو رپورٹنگ نہیں کریں گے۔

حکم نامے میں کہا گیا ہے کہ صحافی طالبان حکام یا کسی بھی عام شہری کا ویڈیو انٹرویو نہیں کر سکتے اور نہ ہی ان کی تصاویر لی جا سکتی ہیں۔

طالبان کے برسرِ اقتدار آنے کے بعد سے افغان صحافیوں اور میڈیا اداروں کو سخت مشکلات اور پابندیوں کا سامنا ہے جس کے باعث کئی میڈیا ادارے بند ہو چکے ہیں۔

افغان میڈیا کی مختلف تنظیموں نے طالبان کی وزارتِ اطلاعات سے مطالبہ کیا ہے کہ وہ ہلمند میں لگائی گئی اس پابندی کی وضاحت کرے۔

وزارت نے کہا ہے کہ وہ معاملے کی تحقیقات کر رہی ہے۔

جاپان کے سفیر کی کابل میں طالبان وزیر داخلہ سراج الدین حقانی سے ملاقات

جاپان کے سفیرتاکاشی اوکادا نے کابل میں وزیر داخلہ سراج الدین حقانی سے ملاقات کی اور لڑکیوں کی تعلیم سمیت دیگر امور پر تبادلہ خیال کیا۔

افغانستان میں نیا تعلیمی سال مارچ میں شروع ہوگا۔

کابل میں جاپانی سفارت خانے نے سلسلہ وار ٹویٹس میں اس ملاقات کے بارے میں بتایا ہے جس میں افغانستان کی صورت حال اور بیرونی تعلقات پر تبادلہ خیال کیا۔

سفارت خانے نے ایک ٹویٹ میں کہا، ’’انہوں نے بین الاقوامی برادری کی جاری انسانی امداد کی وضاحت کی اور انسانی حقوق، اور دوسرے مسائل سمیت دہشت گردی کی سرگرمیوں کے بارے میں تشویش کا اظہار کیا۔‘‘

نیوزی لینڈ: سمندری طوفان گیبریل سے بڑے پیمانے پر تباہی، بحالی کا کام شروع

نیوزی لینڈ طوفان گیبریل سے ہونے والے نقصانات کی جانچ اور بحالی کا عمل شروع کر رہا ہے۔

سمندری طوفان گیبریل کے نتیجے میں 40 سینٹی میٹر تک بارشیں ہوئیں اور سیلاب اور لینڈ سلائیڈنگ شروع ہوگئی جس سے سڑکیں بہہ گئیں اور پوری کمیونٹیز کو بیرونی دنیا سے منقطع کر دیا۔

کم از کم 9,000 رہائشیوں کو اپنے گھر خالی کرنے پر مجبور ہونا پڑا، جب کہ دیگر رہائشی سیلاب کے بڑھتے ہوئے پانی سے بچنے کے لیے اپنی چھتوں پر چلے گئے ہیں۔

حکام کا کہنا ہے کہ شمالی جزیرے پر 1,400 سے زیادہ افراد کا اب بھی کوئی سراغ نہیں ملا ، جب کہ ڈھائی لاکھ سے زیادہ افراد بجلی سے محروم ہو گئے۔

بحرالکاہل کے جزیرے پر آنے والے بدترین طوفان کے نتیجے میں کم از کم چار افراد کی ہلاکت کی تصدیق کی گئی ہے۔