افغانستان کے لیے یورپی نمائندے کا بھارت کا دورہ، افغانستان میں انسانی صورت حال پر تشویش کا اظہار
افغانستان کے لیے یورپی یونین کے نمائندے ٹامس نکلسن نے نئی دہلی کے اپنے تین روزہ دورے کے بعد کہا ہے کہ یورپی یونین اور بھارت کو افغانستان میں سنگین انسانی صورت حال پر تشویش ہیں اور دونوں اس بات پر متفق ہیں کہ اس ملک میں انسانی امداد کی بہت ضرورت ہے۔
نکلسن نے اپنی ایک ٹویٹ میں کہا ہے کہ "ہم نے اس پر اتفاق کیا ہے کہ کابل میں ہماری کم سے کم موجودگی صورت حال کو بہتر طور پر سمجھنے اور ضرورت مند افغانوں کی مدد کے لیے مفید ہے۔
ٹویٹ میں مزید کہا گیا ہے کہ ہم نے انسانی حقوق کی صورت حال اور طویل مدتی استحکام اور امن کی ضرورت پر بھی تبادلہ خیالات کیا۔
داعش کے خطرے کی سطح بدستور بلند ہے: اقوام متحدہ
اقوام متحدہ کے انسداد دہشت گردی کے سربراہ کا کہنا ہے کہ اسلامک اسٹیٹ داعش گروپ کی طرف سے لاحق خطرہ بدستور بلند سطح پر ہے اور تنازعات سے دوچار علاقوں میں اور ان کے آس پاس اس خطرے میں اضافہ ہوا ہے۔
افریقہ کے وسطی حصے ، جنوبی اور ساحل کے علاقوں میں گروپ کی توسیع خاص طور پر تشویشناک ہے۔
انڈر سیکرٹری جنرل ولادیمیر وورونکوف نے اقوام متحدہ کی سلامتی کونسل کوجمعرات کو بتایا کہ یہ گروپ انٹرنیٹ، سوشل میڈیا، ویڈیو گیمز اور گیمنگ پلیٹ فارمز کا استعمال جاری رکھے ہوئے ہے تاکہ بنیاد پرستی اور نئے لوگوں کو بھرتی کرنے کے لیے اپنے پروپیگنڈے کی رسائی کو بڑھایا جا سکے۔
انہوں نے کہا کہ داعش کی جانب سے نئی اور ابھرتی ہوئی ٹیکنالوجیز کا استعمال بھی ایک بڑی تشویش ہے۔
وورونکوف نے نگرانی اور جاسوسی کے لیے ڈرونز کے مسلسل استعمال کے ساتھ ساتھ رقم اکٹھا کرنے کے لیے ورچوئل اثاثوں کی طرف بھی توجہ دلائی.
افغانستان میں امریکی فوج کے چھوڑے ہوئے ہتھیار گوریلا جنگوں میں استعمال نہیں ہو سکتے: تجزیہ کار
ایک افغان عسکری تجزیہ کار کا خیال ہے کہ افغانستان میں امریکی اور نیٹو فوجیوں نے ملک سے انخلاء کے بعد جو ہتھیار چھوڑے ہیں وہ روایتی جنگوں کے لیے ہیں اور دہشت گرد انہیں گوریلا جنگوں میں استعمال نہیں کریں گے۔
روس کی سلامتی کونسل کے سیکرٹری نکولائی پیٹروشیف نے ، ماسکو میں سیکیورٹی اجلاس میں یہ دعویٰ نہیں کیا کہ افغانستان سے امریکہ کے انخلاء کے بعد جو ہتھیار بچ گئے ہیں وہ بین الافغان تنازعات میں استعمال ہو سکتے ہیں یا دہشت گردوں کو فروخت کیے جا سکتے ہیں۔
ایک اور خبر کے مطابق افغانستان کا ایک بڑا حصہ مسلسل تیسرے سال بھی خشک سالی کا سامنا کر رہا ہے جس سے ان علاقوں میں زندگیاں بری طرح متاثر ہوئی ہیں۔
ماحولیاتی ماہرین کا کہنا ہے کہ اگرچہ افغانستان میں اس موسم سرما میں کئی بار برف باری اور بارش ہو چکی ہے لیکن اس سے خشک سالی پر خاطر خواہ اثر نہیں پڑا اوراس میں کوئی کمی واقع نہیں ہوئی۔
افغان نژاد امریکی خاتون بلقیس احمدی کے لیے امریکی محکمہ خارجہ کا جینڈر چیمپئن ایوارڈ
افغان نژاد امریکی شہری بلقیس احمدی نے امریکی محکمہ خارجہ میں خواتین کے امور کے عالمی دفتر کا 'جینڈر چیمپیئن ایوارڈ' جیتا ہے ۔
انہیں یہ ایوارڈ افغان خواتین اور لڑکیوں کی وکالت کے لیے کوششوں کے سلسلے میں دیا گیا ہے ۔
امریکی وزیر خارجہ ا نٹنی بلنکن نے انہیں مبارکباد دیتے ہوئے ،ٹویٹ کیا ہے کہ افغان خواتین، لڑکیوں اور انسانی حقوق کے لیے آپ نے جو کچھ کیا اور کرتی رہیں گی اس کے لیے آپ کا شکریہ۔
رینا امیری نے بھی بلقیس احمدی کو ایوارڈ جیتنے پر مبارکباد دی ہے
ایک اور خبر کے مطابق ڈنمارک اور سویڈن نے افغانستان کی تمام خواتین اور لڑکیوں کو تحفظ فراہم کرنے کی پیشکش کی ہے۔
گزشتہ ہفتے، ڈنمارک کے پناہ گزینوں کے اپیل بورڈ نے ایک بیان میں اعلان کیا کہ وہ افغانستان کی تمام خواتین اور لڑکیوں کو ’’ ان کی جنس کی بنیاد پر‘‘ پناہ دے گا۔
اپیل بورڈ نے افغانستان میں خواتین اور لڑکیوں کے بگڑتے ہوئے حالات کا حوالہ دیا،جن کی بناءپر یہ فیصلہ کیا گیا۔