کابل ایئرپورٹ دھماکوں میں ہلاکتوں کی تعداد 85 ہو گئی
کابل ایئرپورٹ کے باہر جمعرات کو ہونے والے دو دھماکوں میں ہلاکتوں کی تعداد 85 تک پہنچ گئی ہے جب کہ 100 سے زائد افراد زخمی ہیں۔ دہشت گرد تنظیم داعش نے ان حملوں کی ذمہ داری قبول کر لی ہے۔
خبر رساں ادارے 'رائٹرز' کے مطابق کابل ایئرپورٹ کے بیرونی دروازے پر دو بم دھماکوں میں 13 امریکی فوجی ہلاک اور 18 زخمی ہوئے ہیں جب کہ 72 افغان شہری بھی ان دھماکوں کی نذر ہوئے ہیں۔
طالبان نے دعویٰ کیا ہے کہ ہلاک ہونے والے افغان شہریوں میں ان کے 28 افراد بھی شامل ہیں۔
دوسری جانب کابل کے حامد کرزئی انٹرنیشنل ایئرپورٹ پر مزید حملوں کے خدشات کا بھی اظہار کیا جا رہا ہے جس کے پیشِ نظر آسٹریلیا اور نیوزی لینڈ نے انخلا کا عمل روک دیا ہے۔
کابل ایئرپورٹ کے بیرونی دروازے بند ہیں اور شہریوں کو وہاں سے ہٹا دیا گیا ہے۔
افغان شہریوں کی پاکستان آمد میں تیزی
پاکستان کے صوبہ بلوچستان کے سرحدی علاقے چمن میں پاک، افغان سرد بابِ دوستی پر طالبان کے کنٹرول کے باوجود دونوں ملکوں سے لوگوں کی آمدورفت کا سلسلہ جاری ہے۔ البتہ حکام اس خدشے کا اظہار کر رہے ہیں کہ موقع سے فائدہ اُٹھا کر غیر قانونی طور پر بھی کچھ لوگ پاکستان میں داخل ہو سکتے ہیں۔
اس صورتِ حال پر حکام کا کہنا ہے کہ چمن میں پاک افغان سرحد پر سیکیورٹی کے انتظامات سخت کر دیے گئے ہیں اور قانونی دستاویزات کے بغیر کسی کو داخلے کی اجازت نہیں ہے۔
گل آغا کا تعلق افغانستان کے صوبے قندھار سے ہے۔ ان کے کچھ رشتہ دار بلوچستان کے ضلع چمن میں رہتے ہیں اور وہ تقریباً ایک سال بعد اپنے رشتہ داروں سے ملنے پاکستان آئے ہیں۔
گل آغا نے وائس آف امریکہ سے گفتگو کرتے ہوئے کہا کہ چوں کہ وہ افغانستان میں سرحدی علاقے میں رہتے ہیں اس لیے انہیں 'تزکیرہ' یعنی سرکاری دستاویزات پر پاکستان آنے کی اجازت دی جاتی ہے۔
کابل ایئرپورٹ پر دھماکوں کے بعد کے مناظر
کابل کے حامد کرزئی انٹرنیشنل ایئرپورٹ پر جمعرات کو دو دھماکوں میں امریکی فوج کے 13 اہلکاروں سمیت 70 سے زیادہ افراد ہلاک اور درجنوں زخمی ہو گئے ہیں۔ حملوں کی ذمہ داری دہشت گردی تنظیم داعش خراساں نے قبول کی ہے۔
کابل ایئرپورٹ پر دھماکوں کے بعد کے مناظر