بھارت کی کابل دھماکوں کی مذمت
بھارت نے کابل ایئرپورٹ پر جمعرات کو ہونے والے بم دھماکوں کی مذمت کی ہے۔
بھارتی وزارتِ خارجہ نے ایک بیان میں کہا ہے کہ ان حملوں سے دنیا کو پیغام جاتا ہے کہ دہشت گردی اور دہشت گردوں کو پناہ گاہیں فراہم کرنے والوں کے خلاف متحد ہونے کی ضرورت ہے۔
بیان میں متاثرہ خاندانوں کے ساتھ اظہار تعزیت اور زخمیوں کے لیے نیک تمناؤں کا اظہار کیا گیا ہے۔
اقوامِ متحدہ میں بھارت کے مستقل مندوب اور سلامتی کونسل کے صدر ٹی ایس تری مورتی نے بھی ان حملوں کی شدید مذمت کرتے ہوئے متاثرہ خاندانوں کے ساتھ اظہارِ تعزیت کیا ہے۔
آسٹریلیا نے انخلا کا آپریشن روک دیا
آسٹریلیا نے کابل ایئرپورٹ پر دھماکوں کے بعد انخلا کا جاری آپریشن روک دیا ہے۔
آسٹریلوی وزیرِ اعظم اسکاٹ موریسن نے جمعے کو صحافیوں سے بات کرتے ہوئے کہا ہے کہ کابل ایئرپورٹ پر حملے سے چند گھنٹے قبل ہی آسٹریلوی فوج کے اہلکار وہاں سے انخلا کر چکے تھے اور موجودہ سیکیورٹی خدشات کے پیشِ نظر افغانستان سے شہریوں کے انخلا کا عمل مزید جاری نہیں رکھا جا سکتا۔
انہوں نے کہا کہ آسٹریلیا نے کابل سے اب تک 4100 افراد کو نکالا ہے جن میں آسٹریلوی شہریوں سمیت افغان باشندے بھی شامل ہیں جب کہ مزید 800 افراد آسٹریلیاں پہنچ رہے ہیں۔
آسٹریلیا کے وزیرِ خارجہ میرس پین نے آسٹریلوی شہریوں اور ان افراد پر زور دیا ہے جن کے پاس آسٹریلیا کا ویزہ ہے کہ وہ کابل ایئرپورٹ سے دور رہیں۔
واضح رہے کہ آسٹریلیا مغربی ملکوں کے عسکری اتحاد نیٹو کا رکن ہے اور افغان جنگ کے دوران اس کے 39 ہزار سے زیادہ اہلکاروں نے خدمات انجام دیں۔ لگ بھگ 20 برس تک جاری رہنے والی اس جنگ کے دوران آسٹریلیا کے 41 فوجی ہلاک ہوئے ہیں۔
بورس جانسن انخلا کا عمل جاری رکھنے کے لیے پرعزم
برطانوی وزیرِ اعظم بورس جانسن نے کابل ایئرپورٹ پر دھماکوں کے بعد ہنگامی اجلاس کی صدارت کی جس کے دوران کابل ایئرپورٹ کی صورتِ حال اور انخلا کے عمل کا جائزہ لیا گیا۔
بورس جانسن نے اس عزم کا اظہار کیا ہے کہ کابل ایئرپورٹ پر ہونے والے دھماکوں کے باوجود ان کی حکومت انخلا کا عمل جاری رکھے گی۔
انہوں نے کہا کہ برطانیہ کی جانب سے آخری لمحے تک انخلا کا آپریشن جاری رہے گا۔
افغانستان سے 13 ہزار سے زیادہ افراد کو نکال لیا: برطانیہ
برطانیہ نے کہا ہے کہ کابل سے اب تک 13 ہزار افراد کو نکالا جا چکا ہے جن میں سفارتی عملے سمیت برطانوی و افغان شہری شامل ہیں۔
برطانوی وزارتِ دفاع کے مطابق افغانستان سے شہریوں کے انخلا کے لیے جاری آپریشن پٹنگ کے تحت اب تک 13 ہزار 146 افراد کو نکالا جا چکا ہے۔
برطانوی وزارتِ خارجہ نے جمعرات کی شب جاری ایک بیان میں کہا ہے کہ کابل ایئرپورٹ کے اطراف بڑے پیمانے پر دہشت گردی کے حملے کا خدشہ موجود ہے۔