افغانستان میں تبدیل ہوتی صورتِ حال، سابق امریکی فوجی بھی حیران
امریکہ کی ریاست میزوری میں مقیم امریکی فوج کے سابق افسر اسٹیو ہاچرسن اس وقت حیرانی کا شکار تھے جب وہ اپنے گھر میں ٹی وی اسکرین پر افغانستان میں تیزی سے تبدیل ہوتی ہوئی صورتِ حال کا مشاہدہ کر رہے تھے۔
اسٹیو ہاچرسن کا وائس آف امریکہ سے گفتگو میں کہنا تھا کہ یہ سب دیکھنا کافی مشکل تھا۔
اسکائپ کے ذریعے دیے گئے انٹرویو میں ویت نام کا حوالے دیتے ہوئے ان کا کہنا تھا کہ آپ نے سائیگان کا سقوط ہوتے ہوئے اس کی ویڈیوز دیکھی ہوں گی۔ بالکل وہی سب دہرایا جا رہا تھا۔ وہاں پر لوگوں کی تربیت کی گئی تھی اور بہت سارے اخراجات بھی کیے گئے تھے البتہ سب کچھ بے کار چلا گیا۔
افغانستان کے دارالحکومت کابل میں طالبان کی واپسی اسٹیو ہاچرسن کے لیے ذاتی صدمہ بھی ہے۔
وہ ان فوجی اہلکاروں میں شامل تھے جن کو 19 برس قبل 2002 میں افغانستان بھیجا گیا تھا۔ وہ کابل کے شمال میں واقع بگرام ایئربیس میں تعینات تھے۔ ان کی ذمہ داری ریڈار کے ذریعے جنگی طیاروں کی معاونت کرنا تھا۔
ان کا شمار امریکہ کے ان ابتدائی فوجیوں میں ہوتا ہے جن کو افغانستان سے دہشت گروں کے خاتمے کے لیے بھیجا گیا تھا۔ وہ افغانستان میں امریکہ کے ساتھ ساتھ اتحادی افواج کے طیاروں کو بھی کارروائیوں میں معاونت فراہم کرتے تھے۔
ان کا کہنا تھا کہ وہ سب کرنے کا نتیجہ یہ تھا کہ گزشتہ 20 سال سے ہم سب محفوظ تھے۔
اشرف غنی اہلِ خانہ کے ہمراہ متحدہ عرب امارات میں موجود
افغانستان کے سابق صدر اشرف غنی متحدہ عرب امارات (یو اے ای) میں موجود ہیں۔
یو اے ای کی وزارتِ خارجہ نے تصدیق کی ہے کہ اشرف غنی اور ان کے اہلِ خانہ متحدہ عرب امارات میں مقیم ہیں۔
بیان میں مزید کہا گیا ہے کہ صدر غنی اور ان کے اہلِ خانہ کو یو اے ای میں انسانی بنیادوں پر خیر مقدم کیا گیا۔
واضح رہے کہ 15 اگست کو افغانستان کے دارالحکومت کابل کے مرکزی راستوں تک طالبان کے پہنچنے پر اشرف غنی مستعفی ہو کر ملک سے چلے گئے تھے۔ البتہ اس کے بعد سے واضح نہیں تھا کہ وہ کہاں ہیں۔ اب ان کی متحدہ عرب امارات میں موجودگی کی تصدیق ہو گئی ہے۔
جلال آباد میں احتجاج، فائرنگ سے ایک شخص ہلاک
افغانستان کے صوبے جلال آباد میں احتجاج پر مبینہ فائرنگ سے ایک شخص ہلاک اور چھ کے زخمی ہونے کی اطلاعات ہیں۔
افغانستان کے یومِ آزادی سے ایک دن قبل جلال آباد میں ملک کے جھنڈے لیے کئی افراد جمع ہوئے۔ انہوں نے ایک مقام سے طالبان کا جھنڈا اتارا اور ملک کا جھنڈا لگا دیا۔
سوشل میڈیا پر زیرِ گردش ویڈیوز میں دیکھا جا سکتا ہے کہ طالبان ہوائی فائرنگ کرتے ہوئے ہجوم کی جانب بڑھ رہے ہیں۔ ساتھ ہی کچھ افراد لوگوں کو لاٹھیوں سے منتشر کر رہے ہیں۔
وہاں موجود صحافیوں نے الزام عائد کیا کہ انہوں بھی تشدد کا نشانہ بنایا گیا۔
مقامی محکمہ صحت کے ایک عہدیدار نے نام ظاہر نہ کرنے کی شرط پر ’اے پی‘ کو بتایا کہ ایک شخص ہلاک اور چھ افراد زخمی ہوئے ہیں۔
افغانستان سے متعلق اتنی تشویش کیوں ہے؟