اریجیت سنگھ کا پسوڑی، 'آپ نے ایک ماسٹر پیس کو برباد کر دیا'

بالی وڈ فلم 'ستیا پریم کی کتھا' میں پاکستانی گانے 'پسوڑی' کو شامل کرنے پر شائقین کی جانب سے ملا جلا ردِ عمل سامنے آ رہا ہے۔ بعض اس گانے کو اریجیت کی آواز میں پسند کر رہے ہیں جب کہ کئی 'پسوڑی ' کو بالی وڈ فلم میں استعمال کرنے پر برہم دکھائی دیتے ہیں۔

پیر کو اداکار کارتک آریان اور اداکارہ کیارا اڈوانی کی فلم 'ستیا پریم کی کتھا' کا گانا 'پسوڑی نو' ریلیز کیا گیا۔ یہ گانا پاکستان کے معروف میوزک شو کوک اسٹوڈیو کے سیزن 14 کا گانا تھا جسے دنیا بھر میں خوب پسند کیا گیا تھا۔

'پسوڑی' کو گلوکار علی سیٹھی اور گلوکارہ شے گل نے گنگنایا تھا۔ اب اس گانے کو بالی وڈ میں گلوگار اریجیت سنگھ کی آواز میں پیش کیا گیا ہے۔

کارتک اور کیارا کی فلم 'ستیا پریم کی کتھا' 29 جون کو سنیما گھروں میں ریلیز کی جائے گی۔ فلم کی ہدایات سمیر ودوانز نے دی ہیں جب کہ اسے 'پین انڈیا لمیٹڈ' کمپنی کے بینر تلے پیش کیا جائے گا۔

بالی وڈ فلم میں پاکستانی گانے 'پسوڑی' کو شامل کرنے پر سوشل میڈیا صارفین کی جانب سے ملے جلے ردِ عمل سامنے آ رہے ہیں۔

ثنا نامی صارف نے کہا کہ "آپ نے ایک ماسٹر پیس کو برباد کر دیا۔"

راہل کہتے ہیں کہ "بچپن میں سنا تھا کہ نقل کے لیے بھی عقل چاہیے ہوتی ہے، اسے ثابت کرنے کے لیے کیا عملی مثال قائم کی ہے۔"

ڈاکٹر اویشیک نامی صارف نے کہا "کاپی کرنا بند کرو۔"

ایک صارف نے لکھا کہ "مجھے کچھ ہو رہا ہے، انہوں نے تو گانے کے لیرکس بھی برباد کر دیے۔"

ایک صارف نے پسوڑی کے اس نئے ورژن کی تعریف کی۔

یاد رہے کہ 'پسوڑی' 2022 میں گوگل پر سب سے زیادہ سرچ کیا جانے والا گانا تھا۔ اس گانے کو یوٹیوب پر اب تک 50 کروڑ سے زائد بار دیکھا جا چکا ہے۔