مستونگ میں دھماکہ، بچوں سمیت 7 افراد ہلاک
بلوچستان کے ضلع مستونگ میں پولیس کی گاڑی کے قریب دھماکے کے نتیجے میں اسکول کے بچوں سمیت سات افراد ہلاک اور متعدد زخمی ہونے کی اطلاعات ہیں۔
مقامی ذرائع ابلاغ کے مطابق پولیس کا کہنا ہے کہ دھماکے میں ہلاک ہونے والوں میں پانچ اسکول کے بچے، ایک پولیس اہلکار اور ایک راہ گیر شامل ہے جب کہ زخمیوں میں بھی زیادہ تر اسکول کے بچے ہیں۔
بم دھماکے میں زخمی ہونے والوں کو ڈی ایچ کیو اسپتال منتقل کیا گیا ہے۔
پولیس نے بتایا ہے کہ سول اسپتال چوک پر ہونے والے بم دھماکے میں وہاں کھڑی گاڑیوں اور رکشوں کو بھی نقصان پہنچا ہے جب کہ دھماکے سے پولیس موبائل بھی تباہ ہوئی ہے۔
مسافر طیارہ بذریعہ سڑک کراچی سے حیدرآباد منتقل
پاکستان میں پہلی بار ایک مسافر طیارے کو بذریعہ سڑک کراچی سے حیدرآباد منتقل کیا گیا ہے۔ مقامی میڈیا کے مطابق شاہین ایئر لائن کا ناکارہ بوئنگ 737 طیارہ سول ایوی ایشن انسٹی ٹیوٹ میں فائر فائٹرز کی تربیت کے لیے استعمال کیا جائے گا۔ 40 ٹن وزنی مسافر طیارے کو نجی کمپنی کے 72 ویلر ٹرالر کے ذریعے کراچی سے حیدرآباد منتقل کیا گیا ہے۔
دہشت گردی ایکٹ 1997 میں ترمیم کا بل پیش
- By ایم بی سومرو
وفاقی وزیرِ داخلہ محسن نقوی کی جانب سے دہشت گردی ایکٹ 1997 میں ترمیم کا بل قومی اسمبلی میں پیش کردیا گیا ہے۔
وزیرِ داخلہ کی عدم موجودگی میں وفاقی وزیرِ قانون اعظم نذیر تارڑ نے جمعے کو انسدادِ دہشت گردی ترمیمی بل ایوان میں پیش کیا جسے غور کے لیے کمیٹی کو بھجوا دیا گیا ہے۔
دھواں چھوڑنے والی ہیوی گاڑیوں کے خلاف کریک ڈاؤن کیا جائے، لاہور ہائی کورٹ
- By ضیاء الرحمن
لاہور ہائی کورٹ میں اسموگ کے تدراک کے لیے دائر درخواستوں پر جمعے کو سماعت کے دوران جسٹس شاہد کریم نے کہا کہ اسموگ بڑھتی جارہی ہے اس لیے ہمیں ورک فرام ہوم کی پالیسی کی طرف جانا ہوگا۔
پنجاب حکومت کے وکیل نے دورانِ سماعت عدالت کو بتایا کہ صوبائی حکومت نے اسموگ کے پیشِ نظر اسکول کے اوقات کار میں تبدیلی کی ہے۔ جسٹس شاہد کریم نے کہا کہ ہم نے دو سال قبل اسکولز جمعے اور ہفتے کے روز بند کیے تھے۔
جسٹس شاہد نے ہدایت کی کہ دھواں چھوڑنے والی ہیوی گاڑیوں کے خلاف کریک ڈاؤن کیا جائے اس کے علاوہ بسوں اور بڑی گاڑیوں کے اڈوں پر آگاہی بورڈ آویزاں کیے جائیں۔
اسموگ پر قابو پانے کے لیے صوبائی حکومت کی جانب سے اعلان کردہ گرین سمارٹ لاک ڈاؤن پر عدالت کا کہنا تھا کہ گرین لاک ڈاؤن کیا گیا ہے مگر چنگچی رکشے دوسری سٹرکوں یا علاقوں سے گزریں گے تو رش دوسری سٹرکوں پر ہوگا اس کی فزبیلٹی سمجھ نہیں آئی۔
اسموگ سے کیسے محفوظ رہا جائے؟
لاہور ان دنوں تواتر کے ساتھ دنیا کے آلودہ ترین شہروں کی فہرست میں پہلے نمبر پر آ رہا ہے۔ اسموگ کی وجہ سے شہریوں کو مشکلات کا سامنا ہے۔ دمے سمیت دیگر امراض میں مبتلا افراد کو آلودہ فضا متاثر کر رہی ہے۔ اسموگ سے محفوظ رہنے کے لیے کیا حفاظتی تدابیر اختیار کرنی چاہئیں؟ جانیے نوید نسیم کی اس رپورٹ میں۔
