اسرائیل کے لبنان میں حملے؛ حزب اللہ کتنی کمزور ہوئی ہے؟
لبنان کی عسکری تنظیم حزب اللہ کو گزشتہ دو ہفتوں میں اپنی تاریخ کے سب سے زیادہ نقصان کا سامنا کرنا پڑا ہے۔ اس عرصے میں تنظیم کے قائد حسن نصر اللہ سمیت کئی اہم کمانڈرز کی ہلاکت اور اب اسے اسرائیلی فورسز سے زمینی لڑائی کا سامنا بھی ہے۔
دو ہفتے قبل حزب اللہ کے کارکنوں کے زیرِ استعمال ہزاروں کمیونی کیشن ڈیوائسز اچانک پھٹنے کے واقعات میں کم از کم 39 افراد ہلاک اور 3000 زخمی ہوگئے تھے۔ حزب اللہ نے ان دھماکوں کے لیے اسرائیل کو ذمے دار قرار دیا تھا۔
گزشتہ برس اکتوبر میں حزب اللہ کی اتحادی حماس کے اسرائیل پر حملے کے بعد لبنانی عسکری تنظیم نے بھی اسرائیل کی شمالی سرحد پر جھڑپیں شروع کر دی تھیں۔ اس کشیدگی میں اب تک حزب اللہ کے لگ بھگ 500 جنگجو ہلاک ہو چکے ہیں۔
گزشتہ ہفتے سے جاری اسرائیل کی لبنان پر بمباری میں حزب اللہ کے 100 سے زائد جنگجو مارے گئے ہیں جن میں حزب اللہ کے اعلیٰ عہدے دار اور کمانڈرز بھی شامل ہیں۔
حزب اللہ وقفے وقفے سے وسطی اسرائیل پر راکٹ فائر کر رہی ہے۔ تنظیم کے ترجمان محمد عفیف نے منگل کو خبردار کیا تھا کہ اسرائیل پر راکٹ حملے صرف آغاز ہیں اور وہ لبنان میں داخل ہونے پر اسرائیلی فوج سے مقابلے کے لیے تیار ہیں۔
اسرائیل کے حملے میں ایک لبنانی فوجی ہلاک
لبنان کی فوج نے اپنے ایک بیان میں کہا ہے کہ جنوبی لبنان میں اسرائیل کے حملے میں اس کا ایک اہل کار ہلاک ہوگیا ہے۔
بیان میں کہا گیا ہے کہ ہلاک ہونے والا فوجی جنوبی لبنان میں ایک چوکی پر ڈیوٹی انجام دے رہا تھا۔
لبنانی فوج نے مزید کہا ہے کہ اسرائیل کے حملے کے بعد جوابی فائر بھی کیے گئے ہیں۔
اسرائیل کی جنوبی لبنان میں مزید علاقے خالی کرنے کی وارننگ
اسرائیل نے جنوبی لبنان کے مزید دیہات اور قصبوں کو خالی کرنے کی وارننگ جاری کردی ہے۔
یہ دیہات اور قصبات 2006 کی جنگ کے بعد اقوام متحدہ کی جانب سے بفر زون قرار دیے گئے علاقے کے شمال میں ہیں۔
اس وارننگ کے بعد ممکنہ طور پر اسرائیل سرحدی علاقوں میں جاری اپنی کارروائیوں کا دائرہ وسیع کرکے انہیں جنوبی لبنان میں تک پھیلا سکتا ہے۔
جی سیون ممالک کی اسرائیل پر حملے کی مذمت ’متعصبانہ‘ ہے: ایران
ایران نے کہا ہے کہ اسرائیل پر اس کے حملے کی مذمت میں جاری کیا گیا جی سیون ممالک کا بیان ’متعصابانہ اور غیر ذمے دارانہ‘ ہے۔
وزارتِ خارجہ کے ترجمان کا کہنا ہے کہ جی سیون ممالک اور خاص طور پر امریکہ جارحیت کرنے والے فریق (اسرائیل) کی دفاعی، مالی اور سیاسی مدد کرنے کی پالیسی کی وجہ سے مغربی ایشیا میں عدم استحکام کے ذمے دار ہیں۔
ایران نے اسرائیل پر حملے کے خلاف احتجاج کے لیے جرمنی اور آسٹریا میں اپنے سفیر کی طلبی پر بھی ردِ عمل دیا ہے۔
ایرانی سرکاری میڈیا کے مطابق جمعرات کو تہران میں ان ملکوں کے سفیروں کو بھی جواباً طلب کیا گیا ہے۔
اسرائیل کا تین ماہ قبل غزہ میں حماس کے تین کمانڈرز ہلاک کرنے کا دعویٰ
اسرائیل کی فوج نے دعویٰ کیا ہے کہ اس نے غزہ کی پٹی میں لگ بھگ تین ماہ قبل حماس کے ایک سینیئر رہنما سمیت تین کمانڈرز کو ہلاک کردیا تھا۔
بیان میں کہا گیا ہے شمالی غزہ میں زیرِ زمین کمپاؤنڈ پر کیے گئے ایک حملے میں روحی مشتہی اور دیگر دو کمانڈر سامح السراج اور سامح عودہ ہلاک ہوگئے تھے۔ حماس نے اس بیان پر تاحال کوئی تبصرہ نہیں کیا ہے۔
اسرائیلی فوج کا کہنا ہے کہ تینوں کمانڈرز نے غزہ کے ایک زیرِ زمین کمپاؤنڈ میں پناہ لے رکھی تھی جسے وہ کمانڈ اینڈ کنٹرول سسٹم کے طور پر استعمال کر رہے تھے۔