حماس ہتھیار ڈال دے اور یرغمالوں کو رہا کردے تو جنگ ختم ہو سکتی ہے: اسرائیلی وزیرِ اعظم کا جنرل اسمبلی سے خطاب

اسرائیل کے لبنان پر فضائی حملے جب کہ حزب اللہ کی جانب سے اسرائیل پر راکٹ داغنے کا سلسلہ جمعے کو بھی جاری رہا۔

لبنان کے سرحدی علاقے شیبا کے میئر محمد سعب نے خبر رساں ادارے 'رائٹرز' کو بتایا کہ جمعے کو ایک اسرائیلی حملے میں چار بچوں سمیت ایک ہی خاندان کے نو افراد ہلاک ہوئے۔

لبنان کی وزارتِ صحت کا کہنا ہے کہ لبنان میں پیر سے اب تک اسرائیلی حملوں میں 600 سے زیادہ افراد ہلاک ہو چکے ہیں۔

حزب اللہ کا کہنا ہے کہ اس نے جمعے کو اسرائیل کے کریات اتا شہر کی طرف راکٹ داغے۔ البتہ اسرائیل کے مضبوط فضائی دفاعی نظام نے حزب اللہ کے متعدد راکٹوں کو تباہ کردیا۔

اسرائیل نے یمن سے تل ابیب کی جانب آنے والے میزائل کو فضا میں ہی تباہ کر دیا ہے۔

لبنان کی سرحد کے ساتھ اسرائیلی فوج نے زمینی کارروائی کے لیے مشقیں شروع کر دی ہیں۔

اسرائیلی ایئرفورس کے کمانڈر میجر جنرل ٹامر بار نے کہا ہے کہ فضائیہ لبنان میں زمینی کارروائی کی تیاری کرنے والے فوجیوں کی مدد کے لیے تیار ہے اور ایران سے اسلحے کی ترسیل کو روکا جائے گا۔

اسرائیلی فوج کی جانب سے فراہم کردہ ویڈیو کے مطابق ایئرفورس کمانڈر نے اہلکاروں سے بات کرتے ہوئے کہا کہ ہم شمالی کمانڈ کے ساٹھ زمینی کارروائی کے لیے کاندھے سے کاندھا ملا کر کھڑے ہیں۔ اگر کارروائی شروع ہوئی تو ہم تیار ہیں۔ ان کے بقول یہ وہ فیصلہ ہے جو ابھی ہونا ہے۔

اسرائیل کئی بار یہ عزم کر چکا ہے کہ وہ غزہ تنازع کے بعد حزب اللہ کی جانب سے حملوں کے نتیجے میں شمالی سرحد سے علاقہ چھوڑ کر نقل مکانی کرنے والوں کو واپس اپنے گھروں کو لائے گا۔

لبنان میں جنگ بندی مطالبے کو مسترد کرنے کے بعد اسرائیل نے بیروت پر جمعے کی شب حملہ کیا جس میں لبنانی وزارتِ صحت کے مطابق دو افراد ہلاک اور 15 زخمی ہوئے ہیں۔

خبر رساں ادارے 'رائٹرز' کے مطابق حزب اللہ نے تصدیق کی ہے کہ اسرائیلی حملے میں اس کی فضائیہ یونٹ کے سربراہ محمد سورور مارے گئے ہیں۔

صرف جمعرات کو اسرائیلی حملوں میں 28 افراد ہلاک ہوئے ہیں اور پیر سے اب تک لبنان میں ہلاک ہونے والوں کی تعداد 600 سے تجاوز کر گئی ہے۔