لاطینی امریکہ میں کرونا وائرس سے بدترین متاثر ملک برازیل میں منگل کو 1179 افراد ہلاک ہوئے، جو ملک میں 24 گھنٹوں کے دوران ہلاکتوں کا نیا ریکارڈ ہے۔ ان میں سے 324 اموات صرف ایک صوبے ساؤپولو میں ہوئی ہیں۔
برازیل چوتھا ملک ہے جہاں ایک دن میں ایک ہزار سے زیادہ اموات ہوئی ہیں۔ باقی تین ممالک امریکہ، فرانس اور برطانیہ ہیں۔ اٹلی اور اسپین میں ہلاکتوں کی مجموعی تعداد بہت زیادہ ہے۔ لیکن وہاں بھی ایک دن میں ایک ہزار اموات نہیں ہوئی تھیں۔
21 کروڑ آبادی والے ملک برازیل میں کرونا وائرس کے پہلے مریض کی تصدیق 18 مارچ کو ہوئی تھی اور ابتدا میں وبا کے پھیلنے کی رفتار سست تھی۔ لیکن اس ماہ کیسز اور اموات میں تیزی آئی۔ اب مریضوں کی تعداد کے لحاظ سے یہ امریکہ اور روس کے بعد تیسرے نمبر پر ہے۔ یہاں 2 لاکھ 75 ہزار کیسز اور 18 ہزار اموات ہوچکی ہیں۔
ساؤپولو کے مئیر نے چند دن پہلے خبردار کیا تھا کہ ان کا سوا کروڑ آبادی کے شہر کے اسپتال مریضوں سے بھر چکے ہیں اور شہریوں نے احتیاطی تدابیر اختیار نہ کیں تو صورتحال قابو سے باہر ہوسکتی ہے۔
برازیل کے صدر جائر بولسونارو کرونا وائرس کے خطرے کو مسلسل مسترد کرتے آئے ہیں۔ ان کا کہنا ہے کہ یہ معمولی سا فلو ہے۔ لوگوں کا قرنطینہ میں رہنے اور لاک ڈاؤن کرنے سے معیشت پر زیادہ برے اثرات پڑ سکتے ہیں۔ بحران شروع ہونے کے بعد ایک وزیر صحت کو اختلافی رائے رکھنے پر صدر نے برطرف کردیا تھا جبکہ دوسرے نے خود مستعفی ہونے کا فیصلہ کیا۔
صدر بولسونارو سوشل میڈیا پر اظہار خیال کرتے رہتے ہیں۔ حال میں انھوں نے ایک ٹوئیٹ میں لکھا کہ لوگ کام کرنا چاہتے ہیں، تاکہ اپنے اہلخانہ کے لیے رزق کما سکیں۔
دریں اثنا، جانز ہاپکنز یونیورسٹی اور ورڈومیٹرز کے مطابق، دنیا بھر میں کرونا وائرس کے مریضوں کی تعداد 50 لاکھ 45 ہزار اور اموات کی تعداد 3 لاکھ 27 ہزار سے زیادہ ہوگئی ہے۔
گزشتہ 24 گھنٹوں کے دوران برطانیہ میں 363، میکسیکو میں 334، اٹلی میں 161، روس میں 135، بھارت میں 132، کینیڈا میں 115، فرانس میں 110 اور اسپین میں بھی 110 مریض دم توڑ گئے۔ امریکہ میں بدھ کی سہہ پہر تک ساڑھے چھ سو مریض چل بسے تھے، جس کے بعد مجموعی تعداد 94 ہزار سے زیادہ ہوگئی تھی۔
دنیا میں سب سے زیادہ کیسز بھی امریکہ میں ہیں جن کی تعداد 15 لاکھ 80 ہزار ہے۔ روس 3 لاکھ 8 ہزار کیسز کے ساتھ دوسرے نمبر پر ہے جبکہ برازیل، اسپین، برطانیہ اور اٹلی میں بھی 2 لاکھ سے زیادہ مریضوں کی تصدیق ہوئی ہے۔
