تارکینِ وطن کے ایک اور قافلے کی اطلاعات کے پیش نظر، امریکی فوج کو اریزونا سے ٹیکساس سٹی کے ’ایگل پاس‘ پر تعینات کیا جا رہا ہے، تاکہ وہاں داخل ہونے والی بندرگاہوں کی نگرانی کے کام کو ٹھوس بنایا جا سکے۔
کیپٹن بِل سپارکس نے بدھ کے روز اخباری نمائندوں کو بتایا کہ ’’قائم مقام وزیر دفاع شناہن نے ڈیوٹی پر مامور تقریباً 250 فوجی اہلکار وہاں تعینات کرنے کا اختیار دیا ہے‘‘۔
اُنھوں نے بتایا کہ اس میں ملٹری پولیس، طبی اہلکار اور انجینئر شامل ہیں جو داخل ہونے والی بندرگاہوں کی سیکورٹی کو مضبوط بنائیں گے۔
محکمہٴ ہوم لینڈ سیکورٹی کی وزیر، کرسٹن نیلسن نے منگل کے روز لکھا ہے کہ 2000 مہاجرین پر مشتمل ایک قافلہ ٹیکساس سرحد کی جانب بڑھ رہا ہے۔ اُنھوں نے مزید کہا کہ ’’محکمہ وہ تمام اقدامات کرے گا جس سے قانون نافذ کرنے والے اہل کاروں کے تحفظ کو یقینی بنایا جاسکے‘‘۔
ٹیکساس کے محکمے برائے عوامی تحفظ نے ایگل پاس کی جانب ریاستی پولیس بھی روانہ کر دی ہے۔
Tremendous numbers of people are coming up through Mexico in the hopes of flooding our Southern Border. We have sent additional military. We will build a Human Wall if necessary. If we had a real Wall, this would be a non-event!
— Donald J. Trump (@realDonaldTrump) February 5, 2019
صدر ڈونلڈ ٹرمپ نے منگل کے روز ایک ٹوئیٹ میں کہا ہے کہ ’’ہم نے اضافی فوج روانہ کی ہے۔ اگر ضروری ہوا تو ہم انسانی دیوار تشکیل دیں گے۔ اگر ہمارے پاس ایک حقیقی دیوار ہوتی تو ایسا کرنا غیر ضروری کام ہوتا‘‘۔
دریں اثنا، میکسیکو کے گورنر نے ریاست کی زیادہ تر نیشنل گارڈ ٹروپس کو امریکہ میکسیکو سرحد سے ہٹا دیا ہے۔