امریکی خلا نورد کرسٹینا کوچ کسی خلائی مشن کے دوران بین الاقوامی خلائی اسٹیشن میں سب سے زیادہ عرصہ گذارنے والی خاتون بن گئی ہیں۔
ان سے پہلے یہ ریکارڈ سابق سپیس سٹیشن کمانڈر پیگی وھٹسن کا تھا جنہوں نے 2016-2017 میں 288 دن خلائی سٹیشن پر گذارے تھے۔
پیگی وھٹسن نے اس موقع پر ایک ٹویٹ میں خوشی کا اظہار کرتے ہوئے کہا کہ ریکارڈ اسی لیے قائم ہوتے ہیں کہ کوئی اور انہیں توڑ دے۔ انہوں نے کہا کہ یہ ترقی کی نشانی ہے۔
Records are made to be broken...it is a sign of progress! Congrats @Astro_Christina! https://t.co/2cbcdfcxHc
— Peggy Whitson (@AstroPeggy) December 28, 2019
کرسٹینا نے ایک ٹویٹ میں کہا کہ پیگی نے اب سے ساڑھے پانچ سال قبل خلا میں چہل قدمی کی تربیت کے لئے میری مدد کی تھی اور اب ان کی تقلید کرنا میرے لیے ایک اعزاز کی بات ہے۔ انہوں نے کہا کہ اب وہ انتطار کر رہی ہیں کہ کب کوئی اور خاتون خلانورد ان کا ریکارڈ توڑیں گی۔
Five and a half years ago, @AstroPeggy took time to attend my first ever spacewalk training run as a mentor. It is beyond an honor to follow in her footsteps today. I can’t wait to pay it forward to the next explorers and watch them fly even higher. pic.twitter.com/jcrsWFp2D3
— Christina H Koch (@Astro_Christina) December 30, 2019
کرسٹینا کوچ نے یہ ریکارڈ ہفتے کے روز توڑ دیا۔ وہ مذید دو ماہ خلائی سٹیشن میں گذاریں گی۔ یوں وہ خلائی مشن پر تقریباً 328 دن یعنی لگ بھگ 11 ماہ تک رہیں گی۔
خلائی مشن عام طور پر چھ ماہ کے ہوتے ہیں لیکن امریکہ کی خلائی تحقیق کی ایجنسی ناسا نے اپریل میں اعلان کیا تھا کہ وہ کرسٹینا کے مشن کو فروری تک بڑھا رہی ہے۔
امریکہ کے کسی بھی خلا باز کے طویل ترین خلائی مشن کا ریکارڈ مرد خلاباز سکاٹ کیلی کا ہے جنہوں نے 2015-16 میں 340 دن خلا میں گذارے تھے۔ تاہم عالمی سطح پر یہ ریکارڈ 15 ماہ کا ہے جو ایک روسی کاسمونوٹ نے سابقہ میر خلائی سٹیشن پر رہتے ہوئے 1990 کی دہائی میں بنایا تھا۔
ناسا کا کہنا ہے کہ کوچ کے مشن کو فروری تک بڑھانے کا مقصد طویل خلائی سفر کے اثرات کا جائزہ لینا ہے تاکہ مستقبل میں چاند اور مریخ تک دور دراز کے خلائی سفر کے بارے میں تیاری کی جا سکے۔
امریکی خلا نورد خواتین جیسیکا میر اور کرسٹینا کوچ
ایک خاتون خلا نورد کی طرف سے طویل ترین عرصے تک خلا میں رہنے کا ریکارڈ قائم کرنے سے قبل کوچ نے ایک اور ریکارڈ اپنے نام کیا تھا جب انہوں نے اپنی ساتھی خاتون خلا نورد جیسیکا میر کے ساتھ مکمل طور پر خواتین پر مشتمل دو رکنی ٹیم کی حیثیت سے خلا میں چہل قدمی کے مشن میں حصہ لیا تھا۔ یہ کوچ کی خلا میں چوتھی چہل قدمی تھی۔