صدر ڈونلڈ ٹرمپ نے ابھی کچھ دیر پہلے اپنے ایک ٹویٹ میں کہا ہے کہ سربراہ ملاقات سے متعلق شمالی کوریا کے ساتھ ہماری بہت تعمیری بات چیت ہو رہی ہے۔
اگر ایسا ہوا تو امکان ہے کہ یہ ملاقات سابقہ پروگرام کے مطابق سنگا پور میں ہی ہو گی اور اسی تاریخ یعنی 12 جون کو ہی ہو گی۔ اور اگر ضروری ہوا تو یہ تاریخ آگے بھی جا سکتی ہے۔
We are having very productive talks with North Korea about reinstating the Summit which, if it does happen, will likely remain in Singapore on the same date, June 12th., and, if necessary, will be extended beyond that date.
— Donald J. Trump (@realDonaldTrump) May 26, 2018
اس سے قبل امریکی وزیر خارجہ مائیک پومپیو نے کہا تھا کہ شمالی کوریا نے دو طرفہ مشاورت کے اس سلسلے میں شرکت روک دی ہے جو صدر ڈونلڈ ٹرمپ اور کم یانگ ان کے درمیان سر براہی ملاقات کے لیے ضروری ہوتی۔
مسٹر پومپیو نے سینیٹ کی خارجہ کمیٹی کے سامنے پیشی کے دوران صدر ٹرمپ کی جانب سے اس تاریخی فیصلے کی منسوخی کے بارے میں اضافی توجیہات پیش کیں تھیں۔
دوسری جانب شمالی کوریا نے امریکہ کے صدر ڈونلڈ ٹرمپ کی جانب سے کم جونگ ان کے ساتھ ملاقات منسوخ کیے جانے پر افسوس کا اظہار کرتے ہوئے کہا تھا کہ وہ امریکہ کے ساتھ کسی بھی وقت بات چیت کے لیے تیار ہے۔