امریکہ کے صدر ڈونلڈ ٹرمپ کو ان کی ان متنازع ٹوئٹس پر کڑی تنقید کا نشانہ بنایا جا رہا ہے جن میں انہوں نے ڈیموکریٹ پارٹی سے تعلق رکھنے والی غیر سفید فام خواتین ارکانِ کانگریس کو امریکہ چھوڑنے کا مشورہ دیا ہے۔
صدر ٹرمپ نے اتوار کو اپنی سلسلہ وار ٹوئٹس میں ڈیموکریٹ پارٹی سے تعلق رکھنے والی خواتین اراکین کانگریس کو مخاطب کرتے ہوئے کہا تھا کہ "ہمیں گورننس وہ خواتین سیکھانے کی کوشش کر رہی ہیں جن کا تعلق ان ممالک سے ہے جہاں کی حکومتیں مکمل تباہی کا شکار ہیں۔ یہ خواتین واپس جا کر وہاں کے مسائل حل کریں۔"
صدر ٹرمپ کا کہنا تھا کہ "یہ خواتین واپس چلی جائیں جہاں سے آئی ہیں اور اپنے ممالک میں جرائم ختم کریں اور حکومتی اصلاحات کریں اور پھر ہمیں بتائیں کہ یہ کیسے کرنا ہے۔ "
So interesting to see “Progressive” Democrat Congresswomen, who originally came from countries whose governments are a complete and total catastrophe, the worst, most corrupt and inept anywhere in the world (if they even have a functioning government at all), now loudly......
— Donald J. Trump (@realDonaldTrump) July 14, 2019
صدر کے اس بیان کو امریکہ میں اپوزیشن اور سیاسی حلقے نسل پرستی پر مبنی قرار دے رہے ہیں۔
بظاہر صدر نے کسی خاتون رکن کانگریس کا نام نہیں لیا تاہم سیاسی حلقوں کے مطابق صدر کا اشارہ منی سوٹا سے تعلق رکھنے والی الحان عمر، نیویارک کی الیگزینڈریا اوکاسیو، راشدہ طلیب اور آیانا پریسلی کی جانب ہے۔
یہ خواتین اراکین کانگریس صدر ٹرمپ کی پالیسیوں کی سخت ناقد ہیں۔ بعض ماہرین صدر ٹرمپ کی ان ٹوئٹس کے تانے بانے ان چاروں خواتین کی اسپیکر نینسی پیلوسی سے جھڑپ سے بھی ملا رہے ہیں۔
صدر ٹرمپ نے اپنی ٹوئٹ میں نینسی پیلوسی سے بھی کہا ہے کہ "وہ ان خواتین کی ان کے ممالک واپسی کے سفری اخراجات برداشت کر نے میں خوشی محسوس کریں گی۔"
سوائے الحان عمر کے دیگر تین خواتین اراکین کانگریس امریکہ میں ہی پیدا ہوئیں۔
صدر ٹرمپ کی ٹوئٹس کے ردعمل میں الیگزینڈریا اوکاسیو نے بھی ٹوئٹ کرتے ہوئے کہا کہ "جناب صدر میرا ملک امریکہ ہے اور میں نے اس سے وفاداری کا حلف اٹھایا ہے۔ آپ ہم سے اس لیے خفا ہیں کہ آپ وہ امریکہ نہیں دیکھنا چاہتے جہاں ہم رہتے ہوں۔"
You are angry because you can’t conceive of an America that includes us. You rely on a frightened America for your plunder.You won’t accept a nation that sees healthcare as a right or education as a #1 priority, especially where we’re the ones fighting for it.Yet here we are.
— Alexandria Ocasio-Cortez (@AOC) July 14, 2019
ان خواتین اراکین کانگریس کے ساتھ جھڑپ کے باوجود اسپیکر نینسی پیلوسی نے بھی ان کا بھرپور دفاع کیا ہے۔ اپنی ٹوئٹ میں انہوں نے صدر کے بیان کو نفرت پر مبنی قرار دیا ہے۔
I reject @realDonaldTrump’s xenophobic comments meant to divide our nation. Rather than attack Members of Congress, he should work with us for humane immigration policy that reflects American values. Stop the raids - #FamiliesBelongTogether!
— Nancy Pelosi (@SpeakerPelosi) July 14, 2019
نینسی پیلوسی کا کہنا تھا کہ صدر ٹرمپ کے بیانات ظاہر کرتے ہیں کہ وہ امریکہ کو سفید فاموں کا ملک بنانا چاہتے ہیں۔ ان کا مزید کہنا تھا کہ ہمارا معاشرے میں تنوع ہی ہماری اصل طاقت ہے۔
الحان عمر نے امریکی صدر کو مخاطب کرتے ہوئے کہا کہ وہ اس لیے ہم سے خوفزدہ ہیں کیوں کہ ہم کانگریس میں ان کے ایجنڈے کی مخالفت کرتے ہیں۔