امریکی صدر ڈونالڈ ٹرمپ نے بدھ کے روز اٹارنی جنرل جیف سیشنز پر زور دیا کہ خصوصی کونسل رابرٹ موئلر کی جانب سے سال 2016 کے امریکی صدارتی انتخابات پر مبینہ روسی مداخلت کے معاملے پر تفتیش کو بند کریں، حالانکہ ایک سال سے زیادہ عرصہ قبل سیشنز نے اپنے آپ کو چھان بین کے عمل سے الگ کر لیا تھا، چونکہ اُن کے روس کے ساتھ رابطے رہ چکے ہیں۔
ٹرمپ نے کہا ہے کہ اُن کی صدارتی انتخابی مہم کی جانب سے روس سے رابطوں کے بارے میں موئلر کی 14 ماہ سے جاری تفتیش ’’انتہائی وحشتناک صورت‘‘ اختیار کر چکی ہے۔
اُنھوں نے اپنے ٹوئیٹ میں کہا ہےکہ سیشنز ’’اب دھاندلی کی داستان بند کریں، قبل اِس کے کہ اس سے ہمارے ملک پر کوئی مزید دھبہ لگے‘‘۔
امریکی صدر نے کہا ہے کہ ’’بوب موئلر مکمل طور پر پھنس کر رہ گئے ہیں، اور ڈیموکریٹ پارٹی سے تعلق رکھنے والے 17 ناراض نمائندوں کے غلیظ کام میں الجھ گئے ہیں، جو معاملہ امریکہ کے لیے ذلت کا باعث ہے‘‘۔
..This is a terrible situation and Attorney General Jeff Sessions should stop this Rigged Witch Hunt right now, before it continues to stain our country any further. Bob Mueller is totally conflicted, and his 17 Angry Democrats that are doing his dirty work are a disgrace to USA!
— Donald J. Trump (@realDonaldTrump) August 1, 2018
ٹرمپ کی جانب سے سیشنز پر یہ دباؤ ایسے میں سامنے آیا ہے جب ٹرمپ کی صدارتی انتخابی مہم کے سابق سربراہ، پال منافورٹ کے خلاف ٹیکس اور بینک دھوکہ دہی مقدمے کی سماعت کا آج دوسرا دِن ہے۔
صدر نے ایک اور ٹوئیٹ میں اِس مقدمے کو ’’ایک فریب‘‘ قرار دیا ہے؛ جو واشنگٹن سے باہر واقع کمرہٴ عدالت میں ہونے والی سماعت سے اپنے آپ کو دور رکھنے کی کوشش کر رہے ہیں۔
منافرٹ پر الزام ہے کہ اُنھوں نے یوکرین کے معطل شدہ مطلق العنان، وکٹر ینوکاوچ کی حمایت کے لیے لاکھوں ڈالر وصول کیے، جن پر اُنھوں نے پردہ ڈالے رکھا، جس کے کچھ ہی سال بعد اُنھوں نے ٹرمپ کی انتخابی مہم کے ساتھ کام کیا۔
ٹرمپ نے کہا ہے کہ ’’پال منافرٹ رونالڈ ریگن، باب ڈول، اور متعدد دیگر انتہائی معروف اور عزت دار سیاسی قائدین کے ساتھ کام کر چکے ہیں‘‘۔
Paul Manafort worked for Ronald Reagan, Bob Dole and many other highly prominent and respected political leaders. He worked for me for a very short time. Why didn’t government tell me that he was under investigation. These old charges have nothing to do with Collusion - a Hoax!
— Donald J. Trump (@realDonaldTrump) August 1, 2018
اُنھوں نے کہا کہ منافرٹ نے اُن کے لیے بہت ہی کم عرصے کے لیے کام کیا۔
بقول اُن کے ’’حکومت نے مجھے یہ کیوں نہیں بتایا کہ وہ زیر تفتیش ہیں۔ اِن پرانے الزامات کا روس کے ساتھ من گھڑت گھٹ جوڑ سے کوئی واسطہ نہیں‘‘۔