کراچی میں جمعرات کو شدید بارش کے سبب شہر میں سیلابی صورتِ حال کا سامنا ہے جب کہ معمولات زندگی بری طرح متاثر ہیں۔ سندھ حکومت نے جمعے کو شہر میں عام تعطیل کا اعلان بھی کر دیا ہے۔
بارش کی وجہ سے مختلف حادثات میں کم سے کم چار افراد ہلاک ہو گئے ہیں جب کہ کئی علاقوں میں بجلی کا نظام بھی درہم برہم ہو گیا ہے۔
شہر کی بیشتر بڑی مارکیٹس اور کاروباری مراکز بند ہیں جب کہ سرکاری اور نجی اداروں اور فیکٹریوں میں بھی حاضری کم رہی۔
موسلا دھار بارشوں کے باعث ملیر ندی میں شدید طغیانی ہے۔ شہر کی اہم سڑکیں تالاب کا منظر پیش کر رہی ہیں۔
بارش سے زیادہ متاثر ہونے والی شاہراہوں میں شارع فیصل، ایم اے جناح روڈ، راشد منہاس روڈ، یونیورسٹی روڈ، شارع پاکستان، کورنگی روڈ، ایم آر کیانی روڈ، شاہ ولی اللہ روڈ، شہید ملت روڈ سمیت کئی دوسری سڑکیں شامل ہیں۔
کلفٹن میں سن سیٹ بلیورڈ پر سب میرین چورنگی انڈر پاس اور کے پی انڈر پاس میں پانی بھر گیا ہے۔
کئی علاقوں میں لوگوں نے گھروں میں پانی بھر جانے کے باعث چھتوں پر رات گزاری۔
لوگوں نے بتایا کہ انہوں نے مشکل سے اپنی جان بچائی جب کہ اُن کا قیمتی سامان بھی پانی کی نذر ہو گیا ہے۔
زیادہ متاثر ہونے والے علاقوں میں سرجانی، اورنگی، ملیر، محمود آباد، عیسیٰ نگری، لیاقت آباد، ناظم آباد، ڈیفنس، منظور کالونی، اختر کالونی، اولڈ سٹی ایریا، ریلوے کالونی، ہجرت کالونی اور دیگر علاقے شامل ہیں۔
بعض علاقوں میں کشتیوں کے ذریعے لوگوں کو محفوظ مقامات پرپہنچایا جارہا ہے۔ شہر میں کئی علاقوں میں 10 گھنٹے سے بجلی کی سپلائی معطل ہے۔
بارش سے فضائی آپریشن میں بھی تعطل پیدا ہوا جس کے باعث ملک کے سب سے بڑے شہر سے آنے اور جانے والی تقریباً ایک درجن پروازیں منسوخ کرنا پڑیں۔ کئی گھنٹوں بعد طیاروں کی آمد و رفت جزوی طور پر بحال کر دی گئی۔
Your browser doesn’t support HTML5
کراچی: بارش سے ڈوبنے والے علاقوں کے مکین کس حال میں ہیں؟
سول ایوی ایشن حکام کے مطابق تیز بارش کے سبب جمعرات کی صبح کراچی سے دبئی، تہران، شارجہ، ریاض، مسقط کی بین الاقوامی پروازیں اور فیصل آباد، لاہور، بہاول پور اور رحیم یارخان جانے والی مقامی پروازیں منسوخ کر دی گئیں۔
اسی طرح اسلام آباد، پشاور، رحیم یارخان، کوئٹہ اور تربت سے آنے والی پروازیں بھی منسوخ کرنا پڑیں۔
سول ایوی ایشن کے ترجمان نے وائس آف امریکہ کو بتایا کہ موسم کے کسی حد تک بہتر ہونے کے ساتھ ہی کچھ پروازوں کو اڑان کی اجازت دی گئی۔
پاکستان انٹرنیشنل ایئرلائنز (پی آئی اے) کے ترجمان کا کہنا ہے کہ کراچی سے اسلام آباد جانے والی ایک پرواز پی کے-301 کو خراب موسم کے باعث سکھر ایئر پورٹ پر اتار لیا گیا تھا، تاہم موسم بہتر ہوتے ہی اسے پرواز کی اجازت دے دی گئی۔
وزیر اعلیٰ سندھ سید مراد علی شاہ نے ایک بیان میں کہا ہے کہ کراچی کو شدید بارشوں کے باعث تباہی کی سی صورتِ حال کا سامنا ہے۔
کراچی میں ہونے والی بارش سوشل میڈیا پر بھی موضوع بحث ہے۔ جہاں صارفین سندھ حکومت کی کارکردگی پر سوال اُٹھا رہے ہیں۔
سوشل میڈیا پر بارش سے ہونے والی تباہ کاریوں کی ویڈیوز بھی گردش کر رہی ہیں۔
رانا سعید نامی ایک صارف نے کراچی کی ایک شاہراہ کی ویڈیو پوسٹ کی ہے جس میں کئی گاڑیاں پھنسی ہوئی ہیں۔
Right Now: Jail Chowrangi #karachi #karachirain #KarachiRains pic.twitter.com/KvoPtvTTKl
— Rana Saad Sabri (@saad1_official) August 27, 2020
اسپورٹس جرنلسٹ زینب عباس نے ٹوئٹ میں کراچی کی ایک تصویر پوسٹ کی ہے جس میں پورا علاقہ پانی میں ڈوبا ہوا ہے۔
Have wonderful memories from hosting in Karachi. My heart goes out to all the people who are coping with this,the city seems to be drowning in the rain! pic.twitter.com/W6xYJsuMex
— zainab abbas (@ZAbbasOfficial) August 27, 2020
خاتون صحافی ناجیہ اشعر نے ایک ویڈیو شیئر کی ہے جس میں لوگ کراچی کی شاہراہ پر پانی میں پھنسی پولیس وین سے اہل کاروں کو نکلنے میں مدد دے رہے ہیں۔
Police is being rescued. #KarachiRain #KarachiFlooded #KarachiSinks pic.twitter.com/uKGYTObqLZ
— Najia Ashar (@najiaashar) August 27, 2020
وزیر اعلٰی سندھ نے کمشنر کراچی کو ہدایت کی ہے کہ ملیر میں اسکولوں کی عمارتیں خالی کروا کر وہاں متاثرہ لوگوں کو پناہ دی جائے اور ملیر اور سکھن کے علاقوں میں پھنسے ہوئے لوگوں کو فوری طور پر محفوظ مقامات پر پہنچانے کے انتظامات کیے جائیں۔
جمعرات کو کراچی میں تین گھنٹوں کے دوران سب سے زیادہ بارش فیصل ایئر بیس پر ریکارڈ کی گئی۔ جہاں 130 ملی میٹر بارش ہوئی جب کہ مسرور ایئر بیس پر 98 ملی میٹر، ناظم آباد میں 105، کیماڑی میں 82، ایئر پورٹ کے گرد و نواح میں 74 اور نارتھ کراچی میں 80 ملی میٹر بارش ریکارڈ کی گئی۔
ادھر وزیر اعظم عمران خان نے اپنے ایک بیان میں کہا ہے کہ ان کی حکومت کراچی میں شدید بارش کی تباہ کاریوں سے کراچی کے شہریوں کو پیش آنے والی مشکلات سے پوری طرح باخبر ہے۔
اُنہوں نے کہا کہ وہ خود ریلیف اور ریسکیو آپریشن کی نگرانی کر رہے ہیں، اور اس بارے میں نیشنل ڈیزاسٹر مینجمنٹ اتھارٹی (این ڈی ایم اے) کو ہدایات جاری کر دی گئی ہیں۔
شدید بارشوں کے تناظر میں میری حکومت عوام خصوصاً کراچی کے لوگوں کو درپیش مشکلات سے بخوبی آگاہ ہے. میں امدادی کارروائیوں کی ذاتی طور پر نگرانی کر رہا ہوں اور صورتحال سے باقاعدہ طور پر باخبر رہنے کیلئے این ڈی ایم اے کے چیئرمین اور گورنر سندھ سے مستقل رابطے میں ہوں۔
— Imran Khan (@ImranKhanPTI) August 27, 2020
ماہرین موسمیات کا کہنا ہے کہ کراچی میں مسلسل اور موسلادھار بارش غیر معمولی نوعیت کی ہیں۔
پاکستان کی فضائیہ اور محکمہ موسمیات میں 36 برس خدمات انجام دینے والے سابق چیف میٹرولوجسٹ توصیف عالم کا کہنا ہے بلوچستان میں اگست کے مہینے میں 278 فی صد جب کہ سندھ میں 288 فی صد زیادہ بارشیں ریکارڈ کی گئیں جس کی وجہ دنیا بھر میں موسم کے تبدیل ہوتے رحجانات ہیں۔
چیئرمین پیپلزپارٹی بلاول بھٹو زرداری نے اپنی ٹوئٹ میں کہا ہے کہ سندھ میں 90 سال کے دوران یہ مون سون بارشوں کا یہ سب سے بڑا سلسلہ ہے۔
As of yesterday Sindh had seen its worst monsoons in 90years. Today super monsoon torrential rains & floods continue unabated. Please keep all those in your thoughts who have already been working 24/7 to assist citizens during this record breaking unprecedented natural disaster.
— BilawalBhuttoZardari (@BBhuttoZardari) August 27, 2020
خیبرپختونخوا میں بھی بارشیں، اپر چترال کا پشاور سے رابطہ منقطع
خیبرپختونخوا کے ایک دور افتادہ اور پسماندہ ضلع چترال میں گزشتہ کئی دنوں سے جاری بارشوں کے نتیجے میں آنے والے سیلابی ریلوں نے تباہی مچا دی ہے۔
وائس آف امریکہ کے نمائندے شمیم شاہد کے مطابق ضلع اپر چترال کو جانے والی واحد سڑک پر ریشن کے مقام پر واقع ایک پختہ پل کو سیلاب سے شدید نقصان پہنچا، جس سے ضلع اپر چترال کا ملک کے دیگر حصوں سے رابطہ مکمل طور پر منقطع ہو گیا ہے۔
حکام کے مطابق بارشوں اور سیلابوں سے مقامی آبادیوں میں بڑے پیمانے پر مالی نقصان ہوا ہے تاہم اس سلسلے میں کیے گئے حفاظتی انتظامات کی وجہ سے انسانی جانیں محفوظ رہیں، اور کسی ہلاکت کی کوئی اطلاع نہیں ملی۔
حکام نے سرکاری املاک کے علاوہ چار مکانوں کے مکمل تباہ ہونے اور ایک مسجد کو جزوی نقصان پہنچنے کی تصدیق کی ہے۔
چترال ٹاؤن کے چترال گول نالہ میں بھی اونچے درجے کا سیلاب ہے۔ حکام کے مطابق وادی کیلاش میں بھی سیلاب سے تباہی ہوئی ہے۔ وہاں چار مکانات منہدم ہو گئے ہیں، اور کئی مقامات پر رابطہ سڑکیں اور راستے بند ہو گئے ہیں۔
لوئر چترال کے کئی علاقوں کو بھی بارشوں اور سیلابی ریلوں سے نقصان پہنچا ہے۔