بھارت کے زیرِ انتظام کشمیر کے سرمائی صدر مقام جموں سے 52 کلومیٹر شمال میں ترکوٹا پہاڑیوں کے درمیان واقع تاریخی ویشنو دیوی مندر میں ہفتے کو بھگدڑ سے کم از کم 12 ہندو یاتری ہلاک اور 14 زخمی ہوگئے۔
حکام کے مطابق زخمیوں کو کٹرہ قصبے میں، جو ویشنو دیوی گھپا کے لیے یاتراکا بیس کیمپ ہے، وہاں واقع شری ماتا ویشنو دیوی نارائنا اسپتال میں داخل کرایا گیا ہے۔
اسپتال کے نیرو سرجن ڈاکٹر جے پی سنگھ نے بتایا کہ چار زخمیوں کی حالت تشویش ناک ہے اور انہیں وینٹی لیٹرز پر رکھا گیا ہے۔
انہوں نے کہا کہ باقی ماندہ زخمیوں کی حالت خطرے سے باہر ہے اور ان میں سے تین کو پہلے ہی اسپتال سے رخصت کیا جا چکا ہے۔
'بھگڈر یاتریوں کے غیر معمولی رش کے نتیجے میں ہوئی'
کشمیر کی پولیس کے سربراہ دل باغ سنگھ نے کہا کہ بھگدڑ ویشو دیوی بھون یا عمارت کے صدر دروازے پر موجود بعض افراد کے درمیان تلخ کلامی اور اس کے ساتھ ہی شروع ہونے والی دھکم پیل کے نتیجے میں ہوئی۔
اس موقعے پر موجود بعض یاتریوں نے الزام لگایا ہے کہ یہ واقعہ تاریخی عبادت گاہ پر پائی جانے والی بد نظمی کا نتیجہ ہے جب کہ ماتا ویشنو دیوی شرائن بورڈ نے اس الزام کی تردید کی ہے۔
سطح سمندر سے 11 ہزار 750 فٹ کی بلندی پر واقع ویشو دیوی نامی غار میں موجود ایک دیوی دُرگا کی مورتی کے درشن کرنے ہر سال ہندو عقیدت مند لاکھوں کی تعداد میں وہاں پہنچتے ہیں۔
سالانہ ہندو تہوار نو راترا کے موقعے پر ایک کروڑ سے بھی زیادہ یاتری ویشو دیوی مندر پر آتے ہیں۔
Your browser doesn’t support HTML5
بھارتی کشمیر: 'یو اے پی اے' قانون صحافیوں کی آواز دبانے کی کوشش؟
اس مقام سے ہندوؤں کی بے پناہ عقیدت کا اندازہ اس بات سے بھی لگایا جاسکتا ہے کہ ماتا ویشو دیوی شرائن بورڈ کو زائرین سے سالانہ ایک کروڑ 60 لاکھ ڈالر نذر و نیاز کی صورت میں حاصل ہوتے ہیں۔
حادثہ رات کے آخری پہر میں پیش آیا
حکام کا کہنا ہے کہ ماتا ویشنو دیوی مندر میں نئے سال کے موقع پر بڑی تعداد میں عقیدت مند درشن کے لیے جمع ہوئے تھے۔
انہوں نے کہا کہ حادثہ رات کے آخری پہر میں قریباً دو بج کر 45 منٹ پر پیش آیا جب ان کے بقول کسی معمولی بات پر بحث ہونے پر عقیدت مندوں نے ایک دوسرے کو دھکا دیا جس کے بعد بھگدڑ مچ گئی اور موقع پر افراتفری پھیل گئی۔
ہلاک ہونے والوں کا تعلق دہلی، ہریانہ، پنجاب، جموں و کشمیر اور بعض دوسری بھارتی ریاستوں سے تھا۔
بھارت کے زیرِ انتظام کشمیر کے انتظامی سربراہ لیفٹننٹ گورنر منوج سنہا نے کہا کہ انہوں نے واقعے کی اعلیٰ سطح کی تحقیقات کا حکم دے دیا ہے۔
انہوں نے ہلاک ہونے والے افراد کے لواحقین کے لیے دس دس لاکھ روپے اور زخمیوں کے لیے دو دو لاکھ روپے فی کس عبوری امداد کا اعلان کیا اور یہ بھی کہا کہ زخمیوں کے علاج پر آنے والا خرچہ ماتا ویشو دیوی شرائن بورڈ برداشت کرے گا۔
حادثے پر بھارتی صدر رام ناتھ کووند، وزیرِ اعظم نریندر مودی، وزیرِ داخلہ امیت شاہ، وزیرِ دفاع راج ناتھ سنگھ اور دوسرے وزرا سمیت حزبِ اختلاف کی بڑی جماعت کانگریس کے رہنما راہول گاندھی اور دوسری اہم شخصیات نے افسوس کا اظہار کیا ہے۔
وزیرِ اعظم مودی کا کہنا تھا کہ ماتا ویشنو دیوی مندر میں مچی بھگدڑ سے ہونے والی اموات سے وہ غمزدہ ہیں۔
انہوں نے کہا کہ انہوں نے جموں و کشمیر کے لیفٹننٹ گورنر منوج سنہا، وزیرِ اعظم کے دفتر میں تعینات وزیرِ مملکت اور رکن پارلیمنٹ ڈاکٹر جتیندر سنگھ، جن کا تعلق جموں سے ہے اور مرکزی وزیر نتیانند رائے سے فون پر بات کر کے صورت حال سے آگاہی حاصل کی ہے۔
جتیندر سنگھ نے کہا کہ وزیرِ اعظم صورتِ حال کو خود مانیٹر کر رہے ہیں اور انہوں نے زخمیوں کو ہر ممکن طبی امداد فراہم کرنے کی ہدایت کی ہے۔
Your browser doesn’t support HTML5
امر ناتھ کی سالانہ یاترا پر ماہرین ماحولیات کے تحفظات
نیز پرائم منسٹر ریلیف فنڈ سے ہلاک ہونے والوں کے اہل خانہ کو دو دو لاکھ روپے جب کہ زخمیوں کو پچاس پچاس ہزار روپے کی امداد فراہم کرنے کا اعلان کیا گیا ہے۔
یاترابحال ہوگئی
حادثے کے بعد کچھ وقت کے لیے ویشنو دیوی کے لیے یاترا معطل رکھنے کے بعد اسے بحال کر دیا گیا۔
نئے یاتریوں کی رجسٹریشن بھی دوبارہ شروع ہوگئی ہے۔
کئی یاتریوں نے صحافیوں کو بتایا کہ وہ حادثے کی وجہ سے ماتا ویشو دیوی کے درشن نہیں کرسکے اور اب مایوس ہوکر اپنے اپنے گھروں کو لوٹ رہے ہیں۔