پاکستان کی فوج کے شعبہ تعلقات عامہ (آئی ایس پی آر) کے ڈائریکٹر جنرل آصف غفور نے خفیہ ادارے آئی ایس آئی کے سربراہ سے متعلق سینیٹر حاصل بزنجو کے تبصرے کو بے بنیاد قرار دیا ہے۔
اپوزیشن جماعتوں کی جانب سے چیئرمین سینیٹ کے لیے نامزد امیدوار حاصل بزنجو نے جمعرات کو موجودہ چیئرمین سینیٹ صادق سنجرانی کے خلاف تحریک عدم اعتماد کی ناکامی پر مایوسی کا اظہار کیا تھا۔
سوشل میڈیا پر زیر گردش ایک ویڈیو میں سینیٹر حاصل بزنجو کو یہ کہتے ہوئے دیکھا جا سکتا ہے کہ "میں سمجھتا ہوں کہ یہ ایک کھیل تھا اگر آج ہارے ہیں تو اس کی ذمہ دار آئی ایس آئی ہے۔"
Remarks by Senator Mir Hasil Bizenjo implicating head of national premier institution are unfounded. The tendency to bring entire democratic process into disrepute for petty political gains doesn’t serve democracy.
— DG ISPR (@OfficialDGISPR) August 1, 2019
سینیٹر حاصل بزنجو کے تبصرے پر ڈی جی آئی ایس پی آر نے اپنے ٹوئٹ میں کہا کہ اعلیٰ قومی ادارے کے سربراہ کے خلاف سینیٹر حاصل بزنجو کے ریمارکس بے بنیاد ہیں۔
آصف غفور کے بقول چھوٹے جمہوری فوائد کی خاطر پورے جمہوری عمل کو بدنام کرنے کا رجحان جمہوریت کی خدمت نہیں کرتا۔
یاد رہے کہ جمعرات کو چیئرمین سینیٹ صادق سنجرانی کے خلاف عدم اعتماد کی تحریک کے حق میں 50 اور مخالفت میں 45 ووٹ پڑے جب کہ 5 ووٹ مسترد ہوئے۔ اپوزیشن جماعتوں کی قرارداد مطلوبہ ووٹ نہ ملنے کی وجہ سے مسترد کی گئی تھی۔
اپوزیشن جماعتوں کے سربراہان نے تحریک عدم اعتماد کی ناکامی پر تشویش کا اظہار کیا تھا اور پارلیمنٹ ہاؤس کے باہر مشترکہ پریس کانفرنس کے دوران اس معاملے پر کُل جماعتی کانفرنس بلانے کا اعلان کیا تھا۔