خیبر پختونخوا کی نگران کابینہ نے حلف اٹھا لیا ہے۔ حلف برداری کی تقریب گورنر ہاؤس میں ہوئی۔
نگران کابینہ کے ارکان سے صوبائی گورنر حاجی غلام علی نے حلف لیا۔
خیال رہے کہ کابینہ کے ارکان کا اعلامیہ آج ہی جاری کیا گیا تھا۔ صوبائی کابینہ کے حوالے سے نگران وزیرِ اعلیٰ اعظم خان نے ایک دن قبل گورنر سے ملاقات کی تھی۔
تحریک انصاف کے رہنما اور سابق وزیرِ اعلیٰ محمود خان نے کہا ہے کہ ان سے کابینہ کے ارکان کے حوالے سے کسی قسم کی مشاورت نہیں کی گئی۔
گورنر نے 15 رکنی کابینہ نامزد کی ہے۔ مقامی میڈیا کے مطابق جمعرات کو 14 ورزا نے حلف اٹھایا ہے جب کہ ایک وزیر منظور آفریدی ملک سے باہر ہیں جو وطن واپسی پر حلف اٹھائیں گے۔
تحریک انصاف کی خیبر پختونخوا کی نگران کابینہ کی تشکیل پر تنقید
پاکستان تحریک انصاف (پی ٹی آئی) نے الزام لگایا ہے کہ خیبر پختونخوا کی نگران کابینہ میں پاکستان ڈیموکریٹک موومنٹ (پی ڈی ایم) سے وابستہ لوگ شامل کیے گئے ہیں۔
تحریک انصاف کے رہنما اسد عمر کا کہنا تھا کابینہ میں پی ڈی ایم سے وابستہ افراد کو شامل کرکے ثابت کیا گیا ہے کہ موجودہ نظام میں آئین کی کوئی حیثیت نہیں ہے۔
خیبر پختون خواہ نگران کابینہ میں تمام پی ڈی ایم سے وابستہ لوگوں کی کابینہ بنا کر ایک دفعہ پھر ثابت کر دیا کہ آئن موجودہ نطام میں کوئی حیثیت نہیں رکھتا
— Asad Umar (@Asad_Umar) January 26, 2023
دوسری جانب پی ٹی آئی خیبر پختونخوا کے ترجمان شوکت یوسف زئی نے کہا کہ صوبائی نگران کابینہ کو غیر جانب دار رکھنے کے لیے تحریکِ انصاف نے کوئی نام نہیں دیا تھا البتہ اس میں حزبِ اختلاف کے نامزد افراد کو شامل کرنا افسوس ناک ہے۔
خیبرپختونخوا کی نگران کابینہ کی تشکیل پر پاکستان تحریک انصاف خیبرپختونخوا کے ترجمان @SAYousafzaiPTI کا ردِ عمل۔ pic.twitter.com/3vsVcd9qYI
— PTI (@PTIofficial) January 26, 2023
ان کا یہ بھی کہنا تھا کہ نگران کابینہ کی تشکیل گورنر ہاؤس کے بجائے ایوانِ وزیرِ اعلیٰ میں ہونی چاہیے تھی۔
انہوں نے انتخابات کے متاثر ہونے کا بھی اندیشہ ظاہر کیا۔
پاکستانی کرنسی کی گراوٹ جاری، ڈالر 260 روپے کا ہو گیا
پاکستان کی ایکسچینج کمپنیوں کی جانب سے ڈالر کا کیپ ختم کرنے کے بعد روپے کی قدر میں کمی کا سلسلہ جاری ہے۔
مقامی میڈیا کی رپورٹس کے مطابق اوپن مارکیٹ میں ڈالر 260 روپے تک پہنچ چکا ہے۔ امکان ظاہر کیا جا رہا ہے کہ جمعرات کو اس میں زیادہ اضافہ ہو سکتا ہے۔
ایکسچینج کمپنیز ایسوسی ایشن کی جانب سے منگل کو امریکی ڈالر پر کیپ ہٹانے کے اعلان کے بعد اوپن مارکیٹ کے ساتھ ساتھ انٹر بینک میں بھی مسلسل تیزی دیکھی جا رہی ہے۔
کراچی سے وی او اے کے نمائندے محمد ثاقب کے مطابق بدھ کو ڈالر کی قدر میں آخری اطلاعات تک 19 روپے 11 پیسے اضافہ ہو چکا ہےجس کے بعد یہ انٹر بینک میں 250 روپے کا ہو گیا ہے جب کہ اوپن مارکیٹ میں ایک ڈالر 260 روپے کے قریب پہنچ چکا ہے۔
مارکیٹ تجزیہ کاروں کے مطابق روپے کی قدر میں مزید کمی دیکھی جا سکتی ہے۔اس سے صورتِ حال میں آنے والے دنوں میں ترسیلات زر میں اضافے کے ساتھ برآمدات کی مد میں رکے ہوئے غیر ملکی زرمبادلہ میں تیزی آنے کی توقع ظاہر کی جا رہی ہے۔
ایکسچینج کمپنیوں کی جانب سے ڈالر کی قیمت سے کیپ ہٹانے کے بعد پاکستان اسٹاک مارکیٹ میں بھی تیزی دیکھی جا رہی ہے۔ انڈیکس میں ایک ہزار پوائنٹس کا اضافہ دیکھا گیا ہے۔
’فواد چوہدری کو گرفتار نہیں کیا جانا چاہیے تھا‘
پاکستان مسلم لیگ (ن) کے رہنما اور سابق وفاقی وزیرِ خزانہ مفتاح اسماعیل کا کہنا ہے کہ فواد چوہدری کو گرفتار نہیں کیا جانا چاہیے تھا اور نہ ہی ان کو ہتھکڑیاں لگائی جانی چاہیے تھیں۔
جمعرات کو گرفتار ہونے والے تحریکِ انصاف کے رہنما کے حوالے سے مفتاح اسماعیل نے ایک سوشل میڈیا پوسٹ میں کہا کہ فواد چوہدری نے الیکشن کمیشن کے حکام اور ان کے اہلِ خانہ کو دھمکیاں دے کر غلط کیا البتہ ان کو نوٹس جاری کیا جانا چاہیے تھا۔
IK was wrong to jail us for months without charge only—-because we opposed him. Fawad Chaudary was of course wrong to threaten ECP officials and families. He should have been served a notice. Fawad should not have been arrested and handcuffed.
— Miftah Ismail (@MiftahIsmail) January 26, 2023
انہوں نے مزید کہا کہ عمران خان کی جانب سے مسلم لیگ (ن) کے رہنماؤں کو صرف اس لیے جیل میں رکھا جانا غلط اقدام تھا کیوں کہ ہم حزبِ اختلاف میں تھے۔
خیبر پختونخوا کی 15 رکنی نگران کابینہ کا اعلان
خیبر پختونخوا کی 15 رکنی نگران کابینہ کا اعلان کر دیاگیا ہے۔گورنر حاجی غلام علی نے اعلامیہ جاری کر دیا ہے۔
نگراں کابینہ میں عبد الحلیم، سید مسعود شاہ، حامد شاہ، ساول نذیر ایڈووکیٹ، بخت نواز، فضل الہٰی، عدنان جلیل، شفیع اللہ خان، شاہد خان خٹک، حاجی غفران، خوش دل خان ملک، تاج محمد آفریدی، محمد علی شاہ، جسٹس ریٹائرڈ قیصر اور منظور خان آفریدی شامل ہیں۔
Breaking: Finally, the caretaker cabinet of Khyber Pakhtunkhwa.. pic.twitter.com/QiYhNWReFv
— Umer Farooq (@Umer_Pasanni) January 26, 2023
مقامی میڈیا کے مطابق نگران کابینہ کے اعلان سے قبل نگران وزیرِ اعلیٰ اعظم خان اور گورنر غلام علی کے درمیان طویل ملاقات ہوئی تھی۔
رپورٹس کے مطابق سابق وزیرِ اعلیٰ محمود خان سے کابینہ کی تشکیل کے لیے مشاورت نہیں کی گئی۔
' تحریکِ انصاف نے الیکشن کمیشن کے خلاف منظم انداز میں مہم چلائی'
وزیرِ اعظم شہباز شریف کے معاونِ خصوصی ملک احمد خان نے کہا ہے کہ تحریکِ انصاف نے الیکشن کمیشن کے خلاف منظم انداز میں مہم چلائی اور الیکشن کمیشن کے حکام اور ان کے اہلِ خانہ کو دھمکیاں دیں۔
اسلام آباد میں پریس کانفرنس کرتے ہوئے ملک احمد خان نے کہا کہ تحریکِ انصاف کی حکومت میں تین تین سال تک بے قصور افراد کو جیل میں رکھا گیا۔ اس حوالے سے انہوں شہباز شریف کے صاحب زادے سلیمان شہباز کی مثال دی۔
انہوں نے کہا کہ تحریک انصاف نے پہلے امریکہ پر اپنی حکومت کے خاتمے کا الزام لگایا، پھر جنرل قمر جاوید باجوہ کو ذمہ دار ٹھہرایا گیا اور اب نگران وزیرِ اعلیٰ پنجاب محسن نقوی کو ذمہ دار قرار دیا جا رہا ہے۔
انہوں نے الزام عائد کیا کہ معاشرے میں تقسیم کے ذمہ دار عمران خان ہیں۔