برطانیہ کے وزیراعظم بورس جانسن کرونا وائرس میں مبتلا ہوگئے ہیں۔ وہ پہلے سربراہ حکومت ہیں جو عالمگیر وبا کی زد میں آئے ہیں۔ انھوں نے اپنی قیام گاہ ٹین ڈاؤننگ سٹریٹ ہی میں تنہائی اختیار کرلی ہے اور وہیں سے سرکاری امور انجام دیں گے۔
ان سے پہلے برطانوی ولی عہد شہزادہ چارلس اور ان کے بعد برطانوی وزیر صحت میٹ ہینکوک کا وائرس ٹیسٹ بھی مثبت آیا۔
55 سالہ بورس جانسن نے جمعرات کو دارالعوام میں وزیراعظم کے ہفتہ وار سوال جواب سیشن میں شرکت کی تھی۔ ہلکے بخار اور کھانسی کی شکایت پر ان کا ٹیسٹ کیا اور نصف شب کو نتیجہ ملا کہ وہ کرونا وائرس میں مبتلا ہیں۔
Over the last 24 hours I have developed mild symptoms and tested positive for coronavirus.I am now self-isolating, but I will continue to lead the government’s response via video-conference as we fight this virus.Together we will beat this. #StayHomeSaveLives pic.twitter.com/9Te6aFP0Ri
— Boris Johnson #StayHomeSaveLives (@BorisJohnson) March 27, 2020
وزیراعظم جانسن نے جمعے کو ٹوئیٹر پر ایک ویڈیو پیغام میں بتایا کہ ان میں کرونا وائرس کی معمولی علامات ظاہر ہوئی ہیں۔ لیکن وہ سرکاری خدمات انجام دیتے رہیں گے، کیونکہ جدید ٹیکنالوجی کی مدد سے حکومتی ٹیم کے ساتھ رابطہ رکھنا ممکن ہے جو کرونا وائرس کا مقابلہ کر رہی ہے۔
بورس جانسن کے اعلان کے کچھ دیر بعد وزیر صحت میٹ ہینکوک نے بتایا کہ ان کا کرونا وائرس کا ٹیسٹ بھی مثبت آیا ہے اور وہ تنہائی اختیار کر رہے ہیں۔
Following medical advice, I was advised to test for #Coronavirus.I‘ve tested positive. Thankfully my symptoms are mild and I’m working from home & self-isolating. Vital we follow the advice to protect our NHS & save lives#StayHomeSaveLives pic.twitter.com/TguWH6Blij
— Matt Hancock (@MattHancock) March 27, 2020
کئی مشہور شخصیات کرونا وائرس کا شکار ہو چکی ہیں۔ لیکن، بورس جانسن پہلے سربراہ حکومت ہیں جو اس کی زد میں آئے ہیں۔ مارچ کے آغاز میں کینیڈا کے وزیراعظم جسٹن ٹروڈو اپنی اہلیہ کا ٹیسٹ مثبت آںے کے بعد تنہائی میں چلے گئے تھے۔ لیکن وائرس میں مبتلا نہیں ہوئے تھے۔
امریکہ کے صدر ڈونلڈ ٹرمپ اور جرمن چانسلر اینگلا مرکل کے بھی کرونا وائرس کے ٹیسٹ کیے گئے تھے۔ لیکن، ان کے منفی نتائج آئے تھے۔