پاکستان کے ویٹ لفٹر محمد نوح دستگیر بٹ نے برطانیہ کے شہر برمنگھم میں جاری کامن ویلتھ گیمز میں ملک کے لیے پہلا گولڈ میڈل حاصل کر لیا ہے۔ اس طرح ایونٹ میں پاکستان کے میڈلز کی تعداد دو ہو گئی ہے۔
چوبیس سالہ ویٹ لفٹر نے بدھ کو 109 کلوگرام سے زیادہ وزن کے مقابلے میں مجموعی طور پر 405 کلوگرام وزن اٹھا کر نہ صرف گولڈ میڈل حاصل کیا بلکہ کامن ویلتھ گیمز کا نیا ریکارڈ بھی قائم کر دیا ہے۔
نوح دستگیر نے اسنیچ میں 173 جب کہ کلین اینڈ جرک میں 232 کلو وزن اٹھایا۔ اس مقابلے میں نیوزی لینڈ کے ویٹ لفٹر ڈیوڈ لیٹی نے دوسری پوزیشن حاصل کی، جب کہ بھارت کے گردیپ سنگھ تیسرے نمبر پر رہے۔
Lifting their way to glory.💪We saw two new #CommonwealthGames Records in the Weightlifting this evening from @TeamEngland and @NOCPakistan. 👏 pic.twitter.com/LlolPev1pj
— Commonwealth Sport (@thecgf) August 3, 2022
نوح دستگیر بٹ سے قبل بدھ کو ہی پاکستان کے شاہ حسین شاہ نے جوڈو کی 90 کلو گرام کیٹیگری میں اپنے جنوبی افریقی حریف کو شکست دے کر کانسی کا تمغہ حاصل کیا تھا۔
کامن ویلتھ گیمز کی تاریخ میں یہ دوسرا موقعہ ہے کہ کسی پاکستانی ویٹ لفٹر نے طلائی تمغہ جیتا ہو۔ اس سے قبل 2006 میں شجاع الدین ملک نے میلبرن میں ہونے والے مقابلوں میں 85 کلوگرام وزن کے مقابلے میں یہ اعزاز حاصل کیا تھا۔
نوح کی کامیابی پر وزیراعظم شہباز شریف نے اپنے ایک ٹویٹ میں انہیں مبارک باد دیتے ہوئے کہا کہ 'ویل ڈن بٹ صاحب۔'
Well done, Butt saab. https://t.co/C87hZIO8q9
— Shehbaz Sharif (@CMShehbaz) August 3, 2022