پاکستان نے بھارت کے اس دعوے کو مسترد کر دیا ہے کہ ایک ڈرون طیارے کو مبینہ طور پر اسلام آباد میں واقع بھارت کے ہائی کمیشن کی عمارت کے اوپر پرواز کرتے ہوئے دیکھا گیا ہے۔
پاکستان کے دفترِ خارجہ کے ترجمان زاہد حفیظ چوہدری نے جمعے کو ایک بیان میں کہا کہ اس الزام کا نئی دہلی نے اسلام آباد کو کوئی ثبوت فراہم نہیں کیا۔
جمعے کو بھارت کے ذرائع ابلاغ میں وزارتِ خارجہ کےحوالے سے یہ دعویٰ کیا گیا تھا کہ گزشتہ ہفتے پاکستان میں بھارت کے ہائی کمیشن کی عمارت کے اوپر ڈرون طیارے کی مبینہ پرواز کے بعد نئی دہلی نے اسلام آباد سے معاملے کی تحقیقات کا مطالبہ کیا تھا اور پاکستان پر زور دیا گیا ہے کہ ایسے کسی واقعے کو دوبارہ رونما ہونے سے روکا جائے۔
A drone was spotted over the premises of the Indian High Commission in Islamabad, Pakistan on 26th June. This has been taken up officially with the Govt of Pakistan. We expect Pakistan to investigate the incident and prevent recurrence of such breach of security: @MEAIndia
— DD India (@DDIndialive) July 2, 2021
مبینہ ڈرون پرواز کو نئی دہلی نے بھارت کے ہائی کمیشن کی سیکیورٹی کی خلاف ورزی بھی قرار دیا ہے۔
رپورٹس میں دعویٰ کیا گیا ہے کہ بھارت نے اس مبینہ واقعہ کے رونما ہونے پر پاکستان سے تحریری احتجاج ریکارڈ کرایا ہے۔
#BREAKING: India officially confirms a drone being spotted inside Indian High Commission in Islamabad. India asks Pakistan to investigate the incident and prevent such breach of security. pic.twitter.com/ZguOJyIgF4
— Aditya Raj Kaul (@AdityaRajKaul) July 2, 2021
دوسری جانب پاکستان کے دفترِ خارجہ کے ترجمان نے بھارت کے ہائی کمیشن کے اوپر کسی بھی ڈرون پرواز کے دعوے کو نئی دہلی کا پروپیگنڈا قرار دیا ہے۔
پاکستان کے دفترِ خارجہ کے ترجمان کے مطابق انہوں نے بھارت کے ذرائع ابلاغ کی رپورٹس اور بھارت کی وزارتِ خارجہ کا بیان دیکھا ہے جس میں یہ الزام عائد کیا گیا ہے کہ اسلام آباد میں بھارت کے ہائی کمیشن کی عمارت کے اوپر ڈرون کی مبینہ پرواز کا الزام عائد کیا گیا ہے۔
We have seen the Indian MEA’s statement & reports in certain sections of the Indian media alleging a drone flying over the premises of Indian High Commission in Islamabad. These preposterous claims have no basis in facts. 1/3
— Spokesperson 🇵🇰 MoFA (@ForeignOfficePk) July 2, 2021
ترجمان کے بقول یہ مضحکہ خیز دعویٰ بے بنیاد ہے اور ان الزامات کو ثابت کرنے کے لیے کوئی ثبوت فراہم نہیں کیا گیا۔
پاکستان کے دفترِ خارجہ کے ترجمان کے حالیہ بیان پر نئی دہلی کا کوئی ردِ عمل سامنے نہیں آیا۔
Pakistan rejects these patently false allegations & diversionary Indian tactics, & will continue to stand by the people of #IIOJK in their just struggle for the right to self-determination, as enshrined in the UNSC resolutions. 3/3
— Spokesperson 🇵🇰 MoFA (@ForeignOfficePk) July 2, 2021
اسلام آباد میں بھارت کے ہائی کمیشن کے اوپر ڈرون طیارے کی اڑان کا الزام ایسے موقع پر سامنے آیا ہے جب حال ہی میں بھارت کی فوج نے دعویٰ کیا تھا کہ جون آخر میں بھارت کے زیرِ انتظام کشمیر میں فضائیہ کے ایک اڈے پر دو ڈرونز کے ذریعے حملے کی کوشش کو ناکام بنایا گیا تھا۔
بھارت کے نائب وزیرِ داخلہ جی کشن ریڈی نے ایک بیان میں کہا تھا کہ جموں کے فضائی اسٹیشن پر ہونے والے حملے میں پاکستان کے کردار کو خارج از امکان قرار نہیں دیا جا سکتا۔
پاکستان کے دفترِ خارجہ نے اس بیان کو بھی مسترد کرتے ہوئے کہا تھا کہ نئی دہلی بغیر کسی ثبوت کے پاکستان پر الزامات عائد کر رہا ہے۔