پاکستان میں نگراں حکومت نے پیٹرولیم مصنوعات کی قیمتوں میں کمی کی ہے جس کے بعد پیٹرول کی قیمت 323 روپے سے کم ہو کر 283 روپے فی لیٹر پر آ گئی ہے۔
وفاقی وزارتِ خزانہ نے اتوار اور پیر کی درمیانی شب پیٹرولیم مصنوعات کی قیمتوں میں کمی کا اعلامیہ جاری کیا۔
اس اعلامیے کے مطابق پیٹرول کی قیمت میں 40 روپے کی کمی کی گئی ہے جس کے بعد اس کی نئی قیمت 283 روپے 38 پیس فی لیٹرہو گئی ہے۔اسی طرح ڈیزل کی قیمت میں بھی 15 روپے کی کمی کا اعلان کیا گیا ہے
سرکاری اعلامیے کے مطابق ڈیزل کی نئی قیمت 303 روپے 18 پیسے ہو گئی ہے قبل ازیں ڈیزل کی قیمت 318 روپے 18 پیسے تھی۔
The new price of #petrol is Rs 283.38 per litre and Rs 303.18 per litre for #HSD. pic.twitter.com/iUfmuNJtgj
— Ministry of Finance (@FinMinistryPak) October 15, 2023
واضح رہے کہ نگراں حکومت کے قیام کے بعد پیٹرولیم مصنوعات کی قیمتوں میں تیزی سے اضافہ ہوا تھا۔
قیمتوں میں اضافے کی وجہ پاکستانی روپے کی قدرمیں ڈالر کے مقابلے میں تیزی سےآنے والی کمی تھی۔ ستمبر کے مہینے کے آغاز میں انٹر بینک میں ایک ڈالر 307 روپے سے اوپر تک چل گیا تھا۔
گزشتہ ایک ماہ میں پاکستان کا روپیہ مستحکم ہوا ہے اور اب ایک ڈالر لگ بھگ 277 روپے کا ہو چکا ہے۔
Interbank closing #ExchangeRate for todayhttps://t.co/QIg5sty6p2#SBPExchangeRate pic.twitter.com/Bex2xUMoIx
— SBP (@StateBank_Pak) October 13, 2023
واضح رہے کہ پاکستان میں نگراں حکومت اگست کے وسط میں قائم ہوئی تھی۔ اس سے قبل مسلم لیگ (ن) کے رہنما شہباز شریف کی وزارتِ عظمی میں پاکستان ڈیموکریٹک موومنٹ (پی ڈی ایم) کی اتحادی حکومت قائم تھی۔
اس اتحادی حکومت نے یکم اگست کو پیٹرولیم مصنوعات کی قیمتوں میں اضافہ کیا تھا جب پیٹرول کی قیمت میں 19 روپے 95 پیسے کا اضافہ کرکے 272 روپے 95 پیسے فی لیٹر مقرر کی گئی تھی۔ اس سے قبل پیٹرول کی قیمت 235 روپے فی لیٹر تھی۔
اسی طرح ڈیزل کی قیمت میں اگست میں 19 روپے 90 پیسے کا اضافہ کرکے 273 روپے فی لیٹر مقرر کی گئی تھی۔ اس سے پہلے ڈیزل 253 روپے 50 پیسے فی لیٹر تھا۔
— Ministry of Finance (@FinMinistryPak) August 1, 2023
نگراں حکومت کے قیام کے بعد 15 اگست کو پیٹرول کی قیمت میں 17 روپے اور ڈیزل کی قیمت میں 20 روپے کا اضافہ کیا گیا۔
بعد ازاں یکم ستمبر کو نگراں حکومت نے ایک بار پھر پیٹرولیم مصنوعات کی قیمتوں میں اضافے کا اعلان کیا اور ملک کی تاریخ میں پہلی بار پیٹرول اور ڈیزل کی قیمت 300روپے فی لیٹر سے تجاوز کر گئی تھی۔
یکم ستمبر کو پیٹرول کی قیمت میں 14 روپے 91 پیسے کا اضافہ کرکے نئی قیمت 305 روپے 36 پیسے مقرر کی گئی جب کہ ڈیزل کی فی لیٹر قیمت میں 18 روپے 44 پیسے کا اضافہ کرکے 311 روپے 84 پیسے فی لیٹر قیمت مقرر ہوئی۔
— Ministry of Finance (@FinMinistryPak) August 31, 2023
پیٹرولیم مصنوعات کی قیمتوں میں اضافے کا یہ سلسلہ یہاں پر رکا نہیں بلکہ 16 ستمبر کو نگراں حکومت کا جو اعلامیہ جاری ہوا اس میں ایک بار پھر قیمتوں میں بڑے اضافے سے شہریوں کو پریشانی کا سامنا کرنا پڑا۔
ستمبر کے وسط میں پیٹرول کی قیمت میں 26 روپے 2 پیسے کا اضافہ ہوا اور اس کی فی لیٹر قیمت 331 روپے 38 پیسے پر جا پہنچی تھی جب کہ ڈیزل 329 روپے 18 پیسے فی لیٹر کا ہو گیا تھا۔
— Ministry of Finance (@FinMinistryPak) September 15, 2023
اکتوبر کے آغاز میں پیٹرولیم مصنوعات کی قیمتوں میں کمی آنا شروع ہوئی اور حکومت نے اس میں معمولی کمی کا اعلان کیا۔
اکتوبر میں پیٹرول کی قیمت میں آٹھ روپے کمی کرکے فی لیٹر قیمت 323 روپے 38 پیسے جب کہ ڈیزل کی قیمت میں 11 روپے کمی کرکے 318 روپے 18 پیسے فی لیٹر مقرر کی گئی۔
New prices of #Petroleum products for the fortnight starting 1st October, 2023. pic.twitter.com/dfStj7ZHYb
— Ministry of Finance (@FinMinistryPak) September 30, 2023
اب پیٹرول کی قیمت تو ایک بار پھر تین سو روپے سے کم ہو گئی ہے البتہ ڈیزل کی فی لیٹر قیمت اب بھی تین سو روپے سے بلند ہے۔