انٹرنیشنل کرکٹ کونسل (آئی سی سی) نے پیر کو مختلف درجہ بندیوں میں دہائی کے بہترین کھلاڑیوں اور ٹیموں کا اعلان کیا ہے۔ البتہ کوئی بھی پاکستانی کھلاڑی کسی بھی کیٹیگری میں ایوارڈ حاصل نہیں کر سکا۔
بھارت کے اسٹار بلے باز وراٹ کوہلی کو مجموعی طور پر اس دہائی کا بہترین کھلاڑی قرار دینے کے علاوہ اس دہائی میں ایک روزہ کرکٹ کا بہترین کھلاڑی بھی قرار دیا گیا ہے۔
حیران کن طور پر افغانستان کے آل راؤنڈر راشد خان کو 2010 سے 2020 کے عرصے کے دوران سب سے بہترین ٹی ٹوئنٹی کھلاڑی قرار دیا گیا ہے۔
جن دیگر درجہ بندیوں میں کھلاڑیوں کو ایوارڈز دیے گئے ہیں اُن میں آسٹریلوی بلے باز اسٹیو اسمتھ کو بہترین ٹیسٹ کرکٹر، بھارت کے سابق کپتان مہندرا سنگھ دھونی کو اسپرٹ آف کرکٹ ایوارڈ سے نوازا گیا ہے۔
آئی سی سی نے جیوری اور عوام کی رائے کو مدِ نظر رکھتے ہوئے کھیل کے تینوں فارمیٹس کی بہترین ٹیموں کا بھی اعلان کیا ہے. ان ٹیموں میں بھی کوئی پاکستانی کھلاڑی جگہ نہیں پا سکا۔
آسٹریلیا کی خاتون کرکٹ ایلس پیری کو اس دہائی کی سب سے بہترین خاتون کرکٹر کا ایوارڈ دیا گیا ہے۔
🇮🇳 VIRAT KOHLI is the ICC Men’s ODI Cricketer of the Decade 👏👏🔝 Only player with 10,000-plus ODI runs in the #ICCAwards period💯 39 centuries, 48 fifties🅰️ 61.83 average✊ 112 catchesA run machine 💥🙌 pic.twitter.com/0l0cDy4TYz
— ICC (@ICC) December 28, 2020
پاکستان کے لیگ اسپنر یاسر شاہ کو دہائی کے بہترین ٹیسٹ کرکٹر کی کیٹگری میں نامزد کیا گیا تھا۔ تاہم وہ ایوارڈ جیتنے میں ناکام رہے۔
آئی سی سی کی جانب سے جاری کیے گئے اعلامیے کے مطابق ان ایوارڈز کے لیے سینئر صحافیوں اور سابق کرکٹرز کی جیوری کے علاوہ لوگوں سے بھی رائے لی گئی۔
سینئر اسپورٹس جرنلسٹ عبدالماجد بھٹی کہتے ہیں کہ پاکستان کے کئی کھلاڑیوں نے گزشتہ 10 سالوں کے دوران بہترین کارکردگی کا مظاہرہ کیا۔ لیکن اس دہائی کی کسی بھی ٹیم میں کسی پاکستانی کھلاڑی کو شامل نہیں کیا گیا جو سراسر نا انصافی ہے۔
عبدالماجد بھٹی کہتے ہیں کہ یاسر شاہ، یونس خان، عمر گل، سعید اجمل، بابر اعظم سمیت کئی ایسے کھلاڑی تھے جنہوں نے انفرادی طور پر اس دہائی میں بہترین کارکردگی کا مظاہرہ کیا اور پاکستان کو میچ جتوائے۔
عبدالماجد بھٹی سمجھتے ہیں کہ بھارت کا آئی سی سی پر اثر و رسوخ عیاں ہے۔ آئی سی سی کے چیف ایگزیکٹو آفیسر بھارتی ہیں جب کہ نیوزی لینڈ سے تعلق رکھنے والے آئی سی سی کے صدر بھی بھارت کی آشیرباد سے ہی صدر بنے تھے۔
پاکستان کرکٹ ٹیم کے سابق کپتان راشد لطیف نے بھی آئی سی سی ایوارڈز پر دلچسپ تبصرہ کرتے ہوئے ٹوئٹ کی کہ لگتا ہے کہ آئی سی سی نے انڈین پریمیئر لیگ (آئی پی ایل) کی بہترین ٹیم کا اعلان کیا ہے۔
TYPO Error {They forget to write IPL-T20s team for the decade}
— Rashid Latif ®️🇵🇰🌹 (@iRashidLatif68) December 27, 2020
بھارت کے اسپورٹس جرنلسٹ وکرانت گپتا نے بھی ایک ٹی وی شو کے دوران کسی بھی پاکستانی کھلاڑی کو شامل نہ کیے جانے پر سوال اُٹھایا۔
اُن کا کہنا تھا کہ پاکستان کی جانب سے یونس خان نے ٹیسٹ کرکٹ میں جب کہ عمر گل نے ٹی ٹوئنٹی کرکٹ میں اچھی کارکردگی کا مظاہرہ کیا۔
البتہ اُن کا کہنا تھا کہ بابر اعظم کو اس لیے کسی بھی درجہ بندی میں نامزد نہیں کیا۔ کیوں کہ اس عرصے کے دوران کم سے کم پانچ سال تک کرکٹ کھیلنے والوں کی نامزدگی کی گئی جب کہ بابر اعظم نے 2016 میں پاکستان کے لیے ڈیبیو کیا تھا۔
لیکن بعض ناقدین کا کہنا ہے کہ بھارتی بالر جسپریت بھمرا نے بھی 2016 میں ہی ڈیبیو کیا تھا، پھر اُنہیں کیوں بہترین ٹی ٹوئنٹی ٹیم میں شامل کیا گیا؟
عبدالماجد بھٹی کہتے ہیں کہ اگر معاملہ جیوری تک محدود رہتا تو ٹھیک تھا تاہم اس بار آئی سی سی نے عوام سے بھی رائے لی ہے۔
اُن کے بقول بھارت کی آبادی ڈیڑھ ارب کے لگ بھگ ہے جب کہ وہاں سوشل میڈیا اور ٹیکنالوجی کا استعمال بھی پاکستان کے مقابلے میں کہیں زیادہ ہے۔ لہٰذا یہی وجہ ہے کہ یہ پہلو بھی ان ایوارڈز پر اثر انداز ہوا۔
جیوری میں شامل ایک رُکن نے نام ظاہر نہ کرنے کی شرط پر وائس آف امریکہ کو بتایا کہ جیوری کے علاوہ کرکٹ شائقین کی رائے کو شامل کرنے سے شکایات پیدا ہوئیں۔
اُن کے بقول آئی سی سی کو چاہیے کہ اس معاملے پر دو الگ الگ کیٹیگریز بنائے۔ ایک وہ جس میں خالصتاً کرکٹ ماہرین کی رائے جب کہ دوسری میں صرف فینز سے رائے لی جائے۔
سوشل میڈیا پر دلچسپ تبصرے
سوشل میڈیا پر بھی آئی سی سی ایوارڈز کے معاملے پر پاکستان اور بھارت کے شائقین آمنے سامنے ہیں۔
پاکستانی شائقین کسی بھی پاکستانی کھلاڑی کو شامل نہ کرنے پر غصے کا اظہار کر رہے ہیں تو وہیں بھارتی ٹوئٹر صارفین اسے پاکستانی کرکٹ ٹیم کی ناقص کارکردگی کا شاخسانہ قرار دے رہے ہیں۔
ایک پاکستانی صارف فاضلی واحد نے ایک دلچسپ تصویر پوسٹ کی ہے جس میں آئی سی سی کو بھارتی کرکٹ بورڈ کے زیرِ اثر دکھایا گیا ہے۔
Inside @ICC headquarters.#ICCAwards pic.twitter.com/3lQkMSiSWA
— Fazle Wahid (@Fazlesays) December 28, 2020
ایک بھارتی صارف روہت نے ٹوئٹ کے ساتھ ایک تصویر بھی پوسٹ کی ہے جس میں طنز کیا گیا ہے کہ کارکردگی نہ ہو تو بہترین ٹیموں اور کھلاڑیوں میں نام بھی نہیں آتا۔
Not a single Pakistani player selected for #ICCAwards Pakistani player :- pic.twitter.com/v8Dsy8sNps
— Rohit 👻 (@RihanSarcasm) December 27, 2020
ایک پاکستانی صارف علی وڑائچ نے آئی سی سی کی بہترین ٹی ٹوئنٹی ٹیم میں شامل جنوبی افریقہ کے بلے باز اے بی ڈویلیئرز اور انڈین بالر جسپریت بھمرا کا موازنہ عمر گل اور بابر اعظم کے ساتھ کرتے ہوئے اعداد و شمار پر مبنی ٹوئٹ کی ہے۔
comparison for you@ICC#ICCAwards pic.twitter.com/3GNEuM2qXc
— Ali Warraich🇵🇰🇵🇰 (@AliWarr72764583) December 27, 2020
ایک ٹوئٹر صارف نے گزشتہ سال انگلینڈ میں کھیلے گئے کرکٹ ورلڈ کپ میں پاکستان اور آسٹریلیا کے میچ کے دوران پاکستانی فیلڈر سے کیچ چھوٹنے کے بعد ایک پاکستانی مداح کے ردِ عمل کی تصویر کو شیئر کیا ہے کہ ان ایوارڈز کے بعد پاکستانی فینز کا ردِعمل بھی ایسا ہی ہے۔
#ICCAwardsAfter announcing Team Of The Decade by ICC.Pakistani fans: pic.twitter.com/l9srWO2H9z
— S O M E N A T H (@somenathpaul_) December 27, 2020