سینئر صحافی مطیع اللہ جان کے نامعلوم اغوا کار اُنہیں راولپنڈی سے 30 کلو میٹر دور فتح جنگ کے مقام پر گاڑی سے باہر نکال کر چلے گئے اور وہ اپنے گھر واپس پہنچ گئے ہیں۔
اسلام آباد کے سیکٹر جی سکس تھری سے منگل کی صبح اغوا ہونے والے سینئر صحافی مطیع اللہ جان 12 گھنٹوں کے بعد اپنے گھر واپس پہنچے۔
نامعلوم افراد نے اُنہیں اسلام آباد سے اغوا کیا اور اس کے بعد انہیں ایک کمرے میں بند کر دیا۔ شام کے وقت اغوا کار انہیں گاڑی میں لے کر مختلف سڑکوں پر گھماتے رہے اور رات گئے ان کے بھائی شاہد عباسی کو فتح جنگ کے قریب آنے کا کہا اور ایک پولیس چیک پوسٹ کے قریب انہیں ان کے بھائی کے حوالے کر دیا۔
اس بارے میں مطیع اللہ جان سے رہائی کے بعد ملنے والے ان کے صحافی دوست اعزاز سید نے ان کی رہائی کی تصدیق کی اور کہا کہ ان کی رہائی کے بعد ہماری ملاقات ہوئی ہے اور وہ بالکل ٹھیک ہیں۔ اغوا کاروں نے ان پر کسی قسم کا تشدد نہیں کیا۔
اس اغوا کا کیا مقصد تھا اور انہیں کیوں اغوا کیا گیا؟ اعزاز سید نے کہا کہ اس بارے میں مطیع اللہ جان ہی بہتر بتا سکتے ہیں۔ فی الحال انہوں نے اس بارے میں کوئی بات نہیں کی کہ اغوا کاروں کا کیا منصوبہ تھا اور انہیں اغوا کیوں کیا گیا اور پھر رہا کیوں کیا گیا۔
اس سے قبل، سوشل میڈیا پر مطیع اللہ جان کو زبردستی ایک گاڑی میں بٹھا کر لے جانے کی ویڈیوز بھی گردش کر رہی ہیں۔
مطیع اللہ جان کے اہلِ خانہ اور وفاقی وزیرِ اطلاعات سینیٹر شبلی فراز نے مطیع اللہ جان کے اغوا کی تصدیق کی تھی۔
منگل کو اسلام آباد میں ایک پریس کانفرنس کے دوران سینیٹر شبلی فراز نے کہا کہ انہوں نے اس معاملے پر وزیرِ داخلہ اعجاز شاہ سے بھی رابطہ کیا ہے۔
اس سے قبل آبپارہ تھانے میں مطیع اللہ جان کے اغوا کی ایف آئی آر درج کرائی گئی تھی۔
ایف آئی آر
شبلی فراز کا کہنا تھا کہ حکومت مطیع اللہ جان کا سراغ لگانے کی پوری کوشش کرے گی۔
مطیع اللہ جان پاکستان میں ریاستی اداروں بالخصوص فوج کی سیاست میں مداخلت پر کڑی تنقید کرتے رہے ہیں۔ چند روز قبل ججز سے متعلق ایک ٹوئٹ پر مطیع اللہ جان کو سپریم کورٹ نے توہینِ عدالت کا نوٹس بھی جاری کیا تھا اور اس نوٹس کی سماعت کے سلسلے میں انہیں بدھ کو عدالت میں پیش ہونا تھا۔
دریں اثنا اسلام آباد ہائی کورٹ نے مطیع اللہ جان کے اغوا پر سیکریٹری داخلہ اور اسلام آباد کے چیف کمشنر اور آئی جی پولیس کو نوٹس جاری کر دیے ہیں۔
عدالت نے حکم دیا ہے کہ مطیع اللہ جان کا سراغ نہ ملنے کی صورت میں تینوں حکام بدھ کو عدالت میں پیش ہوں۔
مطیع اللہ جان کی بازیابی کے لیے ان کے بھائی شاہد اکبر عباسی نے اسلام آباد ہائی کورٹ میں درخواست دائر کی تھی جس میں انہوں نے وزارتِ داخلہ، دفاع اور پولیس کو فریق بنایا ہے۔ درخواست میں پاکستان کی خفیہ ایجنسی انٹر سروسز انٹیلی جنس (آئی ایس آئی) کے ڈائریکٹر جنرل کو بھی فریق بنایا گیا ہے۔
مطیع اللہ جان کی اہلیہ کنیز صغریٰ نے وائس آف امریکہ کی گیتی آرا کو بتایا ہے کہ ان کے شوہر دن 11 بجے کے قریب اُنہیں لینے اسکول آئے تھے۔ وہ اُنہیں کال کرتی رہیں لیکن اُن سے رابطہ نہیں ہو رہا تھا جس کے بعد اسکول کے گارڈ نے بتایا کہ اُن کی گاڑی تو ڈیڑھ، دو گھنٹے سے باہر کھڑی ہے۔
Your browser doesn’t support HTML5
مطیع اللہ جان کے اغوا کار کون تھے؟
اُن کے بقول جب وہ اسکول سے باہر آئیں تو مطیع کی گاڑی کھلی ہوئی تھی جس میں ان کا ایک موبائل فون بھی موجود تھا۔ اس پر اُنہوں نے اپنے دیور سے رابطہ کیا جنہوں نے اُنہیں پولیس کو کال کرنے کا کہا۔
مطیع اللہ جان کی اہلیہ کا مزید کہنا تھا کہ اُن کے شوہر پر اس سے قبل بھی دو مرتبہ حملے ہو چکے ہیں۔ چند روز قبل جسٹس قاضی فائز عیسیٰ سے متعلق کیس کے فیصلے پر اُنہوں نے ایک ٹوئٹ کی تھی جسے اسلام آباد ہائی کورٹ نے نظر انداز کر دیا تھا، لیکن سپریم کورٹ نے اُنہیں توہینِ عدالت کا نوٹس جاری کیا تھا۔
مطیع اللہ جان کے بھائی ایڈوکیٹ شاہد اکبر عباسی نے وائس آف امریکہ کو بتایا کہ دو گاڑیوں میں سادہ کپڑوں میں ملبوس اور کالی وردیوں میں جدید اسلحے سے لیس افراد نے مطیع اللہ جان کو اغوا کیا۔
اُنہوں نے کہا کہ ایک سفید ڈبل کیبن گاڑی بھی اس کارروائی میں استعمال ہوئی ہے جس پر پولیس لائٹ نصب تھی لیکن اس کے دروازوں پر پولیس درج نہیں تھا۔ لہذٰا یہ تعین نہیں ہو سکتا کہ اُنہیں کس نے اغوا کیا۔
شاہد اکبر نے مزید بتایا کہ ان افراد نے زبردستی مطیع اللہ جان کو گاڑی سے نکالا اور اپنے ساتھ لے گئے۔ اُنہوں نے بتایا کہ مطیع اللہ جان نے اپنا ایک فون اسکول کے اندر اُچھالا لیکن مطیع اللہ جان کو اغوا کرنے والوں میں شامل ایک شخص اسکول کے اندر آ کر وہ فون بھی ساتھ لے گیا۔
اُنہوں نے بتایا کہ مقامی پولیس نے تاحال مطیع اللہ جان کو گرفتار کرنے کی تصدیق نہیں کی ہے۔
مطیع اللہ کے ٹوئٹر ہینڈل سے اُن کے بیٹے نے ایک ٹوئٹ کی ہے جس میں انہوں نے کہا ہے کہ اُن کے والد کو دن دیہاڑے اسلام آباد کے دل سے اغوا کر لیا گیا ہے۔
Matiullahjan, my father, has been abducted from the heart of the capital Islamad. I demand he be foundُ and the agencies behind it immediately be held responsible. God keep him safe.
— Matiullah Jan (@Matiullahjan919) July 21, 2020
مطیع اللہ جان کے بھائی نے چیف جسٹس آف پاکستان سے اپیل کی کہ وہ اس معاملے کا ازخود نوٹس لے کر اُن کی بازیابی یقینی بنائیں۔
کئی وفاقی وزرا سمیت حزبِ اختلاف کی جماعتوں کے رہنماؤں، صحافیوں اور انسانی حقوق کی تنظیموں نے مطیع اللہ جان کے لاپتا ہونے پر تشویش کا اظہار کرتے ہوئے حکام سے اُن کی فوری بازیابی کا مطالبہ کیا ہے۔
انسانی حقوق کی بین الاقوامی تنظیم ایمنسٹی انٹرنیشنل نے بھی مطیع اللہ جان کی پراسرار گمشدگی پر تشویش کا اظہار کیا ہے اور کہا ہے کہ انہیں ماضی میں بھی اپنی صحافت کی وجہ سے جسمانی تشدد کا سامنا رہا ہے۔
We are extremely concerned for the fate and wellbeing of @matiullahjan919. He has been the subject of physical attacks and harassment for his journalism. The authorities must establish his whereabouts immediately. #ReleaseMatiullah
— Amnesty International South Asia (@amnestysasia) July 21, 2020
ہیومن رائٹس کمیشن آف پاکستان نے بھی مطیع اللہ جان کے لاپتا ہونے پر تشویش کا اظہار کرتے ہوئے حکام سے اُن کی فوری بازیابی کا مطالبہ کیا ہے۔
HRCP demands that the government immediately ensure the safe recovery of journalist @Matiullahjan919, whose family confirms that he has gone #missing.
— Human Rights Commission of Pakistan (@HRCP87) July 21, 2020
سوشل میڈیا پر مطیع اللہ جان کے پراسرار طور پر غائب ہونے پر تبصروں کا سلسلہ بھی شروع ہو گیا ہے۔ #BringBackMatiullah کا ہیش ٹیگ پاکستان میں ٹاپ ٹرینڈ کر رہا ہے۔
سوشل میڈیا پر وہ ویڈیو بھی شیئر ہو رہی ہے جس میں مطیع اللہ جان کے اغوا کے مناظر دیکھے جا سکتے ہیں۔ ویڈیو میں دیکھا جا سکتا ہے کہ مطیع اللہ کو نامعلوم افراد زبردستی گاڑی میں بٹھا کر اپنے ساتھ لے جاتے ہیں۔
Exclusive CCTV footage of how senior journalist @Matiullahjan919 was abducted with impunity from G 6, heart of #Islamabad in broad day light.#BringBackMatiullah #Pakistan pic.twitter.com/UGFRDL0IKB
— Asad Ali Toor (@AsadAToor) July 21, 2020
وفاقی وزیر فواد چوہدری نے مطیع اللہ جان کے اغوا کو پریشان کن قرار دیا۔
ایک ٹوئٹ میں فواد چوہدری کا کہنا تھا کہ مجھے امید ہے اسلام آباد پولیس اور سیکیورٹی ادارے مطیع اللہ جان کی بازیابی کے لیے اقدامات کریں گے۔
مطیع اللہ جان کا اغواہء پریشان کن اور افسوسناک ہے، مجھے امید ہے اسلام آباد پولیس اور سیکیورٹی ایجنسیز @Matiullahjan919 کی بازیابی کیلئے ہر ممکن اقدامات اٹھائیں گی۔۔۔۔
— Ch Fawad Hussain (@fawadchaudhry) July 21, 2020
قومی اسمبلی میں قائد حزب اختلاف اور پاکستان مسلم لیگ (ن) کے صدر شہباز شریف نے بھی مطیع اللہ جان کے اغوا کی مذمت کی۔
شہباز شریف کا کہنا تھا کہ ایک سینئر صحافی کا غائب کر دیا جانا قابل مذمت اور شدید خدشات کو جنم دینے والا واقعہ ہے۔ان کا مزید کہنا تھا کہ حکومت کا ذرائع ابلاغ کی آزادی کو سلب کرنا اور اختلاف رکھنے والی آوازوں کو خاموش کرانا شرمناک عمل ہے۔
انہوں نے کہا کہ اگر مطیع اللہ جانب کو اگر کچھ بھی ہوتا ہے تو اس کے ذمہ دار وزیرِ اعظم عمران خان ہوں گے۔
Disappearance of senior journalist Matiullah Jan is highly condemnable & matter of deep concern. The government%27s campaign to muzzle the media & critical voices is simply shameful. If something happens to Matiullah, PM will be held responsible.
— Shehbaz Sharif (@CMShehbaz) July 21, 2020
پاکستان پیپلزپارٹی کے چیئرمین بلاول بھٹو زرداری نے بھی مطیع اللہ جان کے مبینہ اغوا کی مذمت کی ہے۔
بلاول بھٹو کا کہنا ہے کہ حکومت مطیع اللہ جان کی بحفاظت بازیابی یقینی بنائے۔
Extremely concerned at news that @Matiullahjan919 has been abducted from Islamabad. The selected government must immediately insure his safe return. This is not only an attack on media freedoms & democracy but on all of us. Today it is Matiuallah, tomorrow it could be you or I.
— BilawalBhuttoZardari (@BBhuttoZardari) July 21, 2020
سینئر سیاست دان افراسیاب خٹک کا کہنا ہے اسلام آباد میں سپریم کورٹ، پارلیمنٹ اور میڈیا جیسے جمہوری اداروں کی موجودگی میں یہ اقدام شرمناک ہے۔
Enforced disappearance of brave journalist Matiullah Jan in Islamabad under the very nose of Parliament, Supreme Court and media is a serious affront. The parliamentarians, judges & journalists can protest on Constitution Ave if they can’t do anything else.#BringBackMatiullah
— Afrasiab Khattak (@a_siab) July 21, 2020
مطیع اللہ جان ماضی میں کئی قومی اخبارات اور ٹی وی چینلز سے وابستہ رہے ہیں۔ اُنہوں نے اپنا یوٹیوب چینل قائم کر رکھا ہے جس میں وہ سپریم کورٹ، سیاست اور دیگر ریاستی اُمور سے متعلقہ پروگرام پیش کرتے ہیں۔
مطیع اللہ جان اس سے قبل وقت ٹی وی، ڈان نیوز، رائٹرز اور پاکستان کے سرکاری ٹی وی پی ٹی وی سے بھی وابستہ رہے ہیں۔
یاد رہے کہ پاکستانی فوج کے سابق ترجمان میجر جنرل آصف غفور نے 2018 میں ایک پریس کانفرنس میں ریاست مخالف پروپیگنڈا کرنے والے صحافیوں کی فہرست پیش کی تھی جس میں مطیع اللہ جان کا نام بھی شامل تھا۔