بھارت کے محکمہ ڈاک نے ماضی کی نامور فلمی اداکارہ نرگس اور مدھو بالا کی تصویر والی ڈاک ٹکٹیں جاری کرنے کا فیصلہ کیا ہے۔ نرگس اور مدھو بالا ہی نہیں بلکہ محکمہ ڈاک کچھ اور ہیروئنوں کی تصاویر والی ٹکٹیں بھی جاری کررہا ہے جن میں نوتن، مینا کماری، ساوتری، لیلا نائیڈو، دیویکا رانی اور کانن جیسی ماضی کی منجھی ہوئی اداکارائیں شامل ہیں۔
بھارت کا محکمہ ڈاک رواں ماہ کی تیرہ تاریخ کو ڈاک ٹکٹوں کی ایک خصوصی نمائش کا بھی اہتمام کررہا ہے جس کی خاص بات یہ ہوگی کہ اس نمائش میں وہ تمام ٹکٹس پیش کی جائیں گی جو اب تک فلمی شخصیات پر جاری ہوچکی ہیں۔
محکمے نے ایک اور بھی اسکیم شروع کی ہے جس میں کوئی بھی شخص صرف ایک سو پچاس روپے دے کر اپنی تصویر والا ڈاک ٹکٹ جاری کراسکتا ہے۔اس اسکیم کا مقصد لوگوں میں پھر سے خط و کتابت کا رجحان پیدا کرنا ہے کیوں کہ ای میل آجانے سے محکمہ ڈاک کی آمدنی روز بہ روز کم ہورہی ہے۔