سابق وزیرِ اعظم راجیو گاندھی کی انیسویں برسی کو جمعے کے روز یومِ انسدادِ دہشت گردی کے طور پر منایا گیا، اور اِس کے ساتھ ہی اُنھیں بھرپور خراجِ عقیدت پیش کیا گیا۔
صدرِ جمہوریہ پرتیبا پاٹیل ، راجیو کی بیوہ اور کانگریس صدر سونیا گاندھی اور دیگر سیاست دانوں نے نئی دہلی میں اُن کی یادگار پر جاکر اُنھیں گلہائے عقیدت پیش کیا۔
راجیو گاندھی کے بیٹے اور کانگریس کے جنرل سیکریٹری راہول گاندھی اور بیٹی پریانکا گاندھی ، وزیرِ داخلہ پی چدم برم، وزیرِ دفاع اے کے اینٹونی اور کانگریس کے ارکانِ پارلیمان کی جانب سے بھی نذرانہٴ عقیدت پیش کیا گیا۔
واضح رہے کہ 21مئی 1991ء کو چنئی کے نزدیک سری پیروم بدور میں ایل ٹی ٹی اِی نے اُنھیں ایک بم دھماکے میں ہلاک کر دیا تھا۔
اِس موقع پر وزارتِ داخلہ کی جانب سے جاری کردہ ایک بیان میں کہا گیا ہے کہ عوام میں دہشت گردی، تشدد اور اُس کے خطرناک اثرات پر بیداری پیدا کرنے کی غرض سے انسدادِ دہشت گردی کا دِن منایا جا رہا ہے۔
اُدھر ایک تقریب میں وزرائے داخلہ اور دفاع سمیت متعدد سیاست دانوں نے دہشت گردی کے مقابلے کا عہد کیا۔ ساتھ ہی نئی دہلی اور دیگر ریاستوں میں مختلف فلاحی پروگراموں کے انعقاد کے ساتھ ساتھ دہشت گردی کے خلاف لڑائی کے عزم کا اظہار بھی کیا گیا۔
