پاکستان کے وزیرِ اعظم عمران خان اور افغان صدر اشرف غنی کے درمیان ٹیلی فونک رابطہ ہوا ہے، جس کے دوران دونوں رہنماؤں نے سیکورٹی صورت حال اور 28 ستمبر کو ہونے والے افغان انتخابات پر تبادلہ خیال کیا ہے۔
افغان صدارتی محل کے ترجمان صادق صدیقی کے مطابق صدر اشرف غنی نے عمران خان پر زور دیا ہے کہ وہ افغانستان میں تشدد میں کمی کے لیے تعاون کریں۔
جمعرات کو کابل میں پریس کانفرنس کے دوران افغان صدارتی محل کے ترجمان نے کہا کہ عمران خان نے صدر اشرف غنی کو یقین دہانی کرائی ہے کہ اُن کی حکومت پرامن افغان الیکشن کی خواہاں ہے۔
Pleased to have received phone call from prime minister Imran Khan last night. He offered his condolences regarding the loss of lives due to terrorist attacks in Parwan and Kabul. We also discussed the peace process and upcoming elections.
— Ashraf Ghani (@ashrafghani) September 19, 2019
یاد رہے کہ 28 ستمبر کو افغانستان میں صدارتی انتخابات ہونے والے ہیں جن میں صدر اشرف غنی مسلسل دوسری بار عہدۂ صدارت کے امیدوار ہیں۔
افغان انتخابات سے قبل کابل سمیت دیگر شہروں میں متعدد دھماکوں میں سیکڑوں افراد ہلاک ہوچکے ہیں، جب کہ منگل کو ہونے والا دھماکہ اشرف غنی کے انتخابی جلسے کے قریب اس وقت ہوا تھا جب انہیں تقریر کے لیے وہاں پہنچنا تھا۔
پاکستان کے وزیر اعظم عمران خان نے ٹیلی فونک گفتگو کے دوران حالیہ دھماکوں میں قیمتی انسانی جانوں کے ضیاع پر اشرف غنی سے افسوس کا اظہار کیا اور دھماکوں کی مذمت بھی کی۔
عمران خان نے دھماکے میں اشرف غنی کے محفوظ بچ جانے پر اظہار اطمینان اور اُن کے لیے نیک خواہشات کا اظہار کیا۔
انہوں نے کہا کہ پاکستان، افغانستان میں مکمل امن اور سلامتی کے لیے کی جانے والی کوششوں کی حمایت جاری رکھے گا۔
As there’s precedence of Pakistan’s help in reduction of violence during past elections, I ask Pakistan to help mitigate violence in the next one. PM Khan promised help within their capacity.
— Ashraf Ghani (@ashrafghani) September 19, 2019
افغان صدر اشرف غنی نے اپنے ایک ٹوئٹ میں کہا کہ ماضی کی مثالیں موجود ہیں کہ پاکستان نے انتخابات میں تشدد کے خاتمے کے لیے تعاون کیا ہے۔ ایک مرتبہ پھر پاکستان کو کہتا ہوں کہ وہ رواں ماہ ہونے والے انتخابات میں بھی تشدد میں کمی کے لیے مدد کریں۔
اُن کے بقول، عمران خان نے ان سے وعدہ کیا ہے کہ وہ اپنی تمام صلاحیتوں کے مطابق تعاون کریں گے۔