پولیس نے امریکی شہر فلاڈیلفیا میں فائرنگ کے ایک واقعے میں 6 پولیس افسروں کو زخمی کرنے والے مشتبہ شخص کو آج جمعرات کے روز گرفتار کر لیا ہے۔ اس کی گرفتاری ایک گھنٹے تک جاری رہنے والے پولیس مقابلے کے بعد ہوئی جس میں چھ پولیس اہل کار زخمی ہو گئے۔ تاہم بتایا جاتا ہے کہ زخمی ہونے والے تمام پولیس اہل کاروں کی حالت خطرے سے باہر ہے۔
پولیس کے ترجمان کا کہنا ہے کہ مشتبہ شخص کو حراست میں لینے کے بعد پولیس نے شہر کے نائس ٹاؤن علاقے میں واقع اس گھر کو تلاشی کے بعد محفوظ قرار دے دیا ہے جہاں مذکورہ شخص نے مورچہ قائم کر رکھا تھا۔
مسلح شخص کا نام مارس ہل ہے۔ پولیس کا کہنا ہے کہ اس شخص کے ریکارڈ میں منشیات سے منسلک بہت سے جرائم کی نشاندہی ہوئی ہے۔
یہ واقعہ بدھ کے روز اس وقت شروع ہوا جب ایک پولیس اہل کار وارنٹ پہنچانے کے لیے اس گھر پر پہنچا۔ دو پولیس اہل کار چار گھنٹے سے زیادہ وقت تک مسلح شخص کے ساتھ اس گھر میں محصور رہے۔ تاہم بعد میں انہیں بحفاظت باہر نکال لیا گیا۔
حکام نے مسلح شخص کے ساتھ رابطے کی بار بار کوشش کی اور اسے متعدد بار فون بھی کیا۔ پولیس کے مطابق مسلح شخص نے ہر مرتبہ فون اٹھایا لیکن اس نے کوئی بات نہیں کی۔
پولیس کے ترجمان نے بتایا ہے کہ گولی لگنے سے زخمی ہونے والے 6 پولیس اہل کاروں کو طبی دیکھ بھال کے بعد بدھ کو رات گئے اسپتال سے فارغ کر دیا گیا۔
فائرنگ کے اس واقعے کے نتیجے میں قریب واقع ٹیمپل یونیورسٹی ہیلتھ سائینسز سینٹر کیمپس کو فوری طور پر بند کر دیا گیا تھا۔ پولیس نے ایک ٹوئٹ میں سینٹر میں موجود افراد کو ہدایت کی، ’’دروازے مقفل رکھیں، خاموش رہیں، پولیس کارروائی کر رہی ہے۔
Lockdown is in effect for Health Sciences Center Campus. Seek shelter. Secure doors. Be silent. Be still. Police are responding.
— Temple University (@TempleUniv) August 14, 2019
صدر ٹرمپ نے ایک ٹوئٹ میں کہا ہے کہ مسلح شخص کے خطرناک مجرمانہ ریکارڈ کے باعث اسے کبھی بھی آزاد گھومنے کی اجازت نہیں دی جانی چاہئیے تھی۔
The Philadelphia shooter should never have been allowed to be on the streets. He had a long and very dangerous criminal record. Looked like he was having a good time after his capture, and after wounding so many police. Long sentence - must get much tougher on street crime!
— Donald J. Trump (@realDonaldTrump) August 15, 2019
امریکہ کے مختلف علاقوں میں حالیہ مہینوں کے دوران فائرنگ کے متعدد واقعات پیش آئے ہیں جن میں درجنوں افراد ہلاک ہو چکے ہیں۔