سابق وفاقی وزیرِ اطلاعات فواد چوہدری کا کہنا ہے کہ اسٹیبلشمنٹ سے تعلقات خراب نہ ہوتے تو ان کی جماعت حکومت میں ہوتی۔
فواد چوہدری کے اس بیان کے بعد سوشل میڈیا پر تحریکِ انصاف کے حامیوں، مخالفین اور صحافیوں کی جانب سے ردِ عمل میں کہا جا رہا ہے کہ فواد چوہدری کا بیان سابق وزیرِ اعظم عمران خان کے بیانیے کی نفی کرتا ہے۔
فواد چوہدری نے صحافی منصور علی خان کو دیئے گئے انٹرویو میں کہا کہ گزشتہ چند ماہ سے اسٹیبلشمنٹ سے تعلقا ت خراب تھے جنہیں درست کرنے کی بہت کوشش کی گئی ۔
انہوں نے کہا کہ کئی باتیں تھیں جو اسٹیبلشمنٹ سے دوری کی وجہ بنیں۔ تاہم انہوں نے اس کی وضاحت کرنے سے گریز کیا۔
فواد چوہدری کا یہ انٹرویو بدھ کی شب نجی ٹی وی چینل 'ایکسپریس نیوز' سے نشر ہوا تھا۔ جس کے بعد سے ٹوئٹر پر ان کے بیان پر سخت ردِ عمل آ رہا ہے جب کہ بعض کا کہنا ہے کہ وہ فواد چوہدری کے بیان سے متفق نہیں۔
محمد اعجاز نامی ٹوئٹر صارف نے لکھا کہ فواد چوہدری نے عمران خان کے اس بیانیے میں چھید کر دیا ہے جس کے مطابق ان کی حکومت گرانے کی سازش امریکہ نے کی تھی۔ انہوں نے مزید لکھا کہ فواد چوہدری الزام لگا رہے ہیں کہ تحریکِ انصاف کی حکومت کو مبینہ طور پر فوج نے فارغ کیا۔
Fawad Chaudhary plugs a big hole in Imran Khan’s narrative of American regime change conspiracy. Fawad accuses the military establishment of allegedly ousting the PTI govt. pic.twitter.com/vhpPZnmDbP pic.twitter.com/98CZiXC1dj
— Muhammad Ejaz (@Muhamma07423699) April 20, 2022
اپنے انٹرویو کے دوران فواد چوہدری کا یہ بھی کہنا تھا کہ ان کی ملاقات ایک سابق جج سے ہوئی تھی جن کا تبصرہ یہ تھا کہ تحریکِ انصاف کی مقبولیت میں پہلے سے زیادہ اضافہ ہوا ہے لیکن اصل نقصان اسٹیبلشمنٹ کے دو اداروں فوج اور عدلیہ کا ہوا ہے جن کا وقار مٹی میں مل گیا ہے۔
فواد چوہدری کے بیان پر ایاز علی نامی ایک ٹوئٹر صارف نے کہا کہ کیبل سچ تھی اور این ایس سی نے اس کی توثیق کی۔ ان کےبقول اسٹیبلشمنٹ اس لیے ناراض ہے کیوں کہ عمران خان پیپلزپارٹی اور مسلم لیگ (ن) کی طرح نہیں جو ڈکٹیشن لیں۔
Its your perception. The cable is true and endorsed by NSC. The establishment is angry because IK is not someone who take dictation like PPP & PMLN do. IK only intends to make Pakistan sovereign country, if Pakistan becomes sovereign the development will comes itself.
— AyAz Ali 🇵🇰🇵🇰 (@aap7786) April 21, 2022
انہوں نے لکھا کہ عمران خان کا واحد مقصد صرف پاکستان کو خودمختار ملک بنانا ہے۔ اگر پاکستان خودمختار ہوگا تو ترقی خود ہوگی۔
"Asal nuksaan establishment ke 2 idaaron ka hua hai, jinka waqar mitti me mil gaya hai..Ek #judiciary aur #Fauj."Imran Khan%27s party openly started taking on #PakiArmy, former federal minister #FawadChaudhary says "with every passing day we r reaching closer to civil-unrest." pic.twitter.com/U7lf0QptIk
— Jammu-Kashmir Now (@JammuKashmirNow) April 20, 2022
عبدالسمیع نامی ٹوئٹر صارف نے شیریں مزاری کی جانب سے حال ہی میں کردہ ٹوئٹ پر تبصرہ کرتے ہوئے کہا کہ " فواد چوہدری آپ سے اتفاق نہیں کرتے۔"
شیریں مزاری نے اپنی ٹوئٹ میں کہا تھا کہ عمران خان کے دورۂ روس کی وجہ سے امریکہ نے پاکستان میں حکومت کی تبدیلی کی سازش شروع کی۔
Fawad chaudhary doesn%27t agree with you.. pic.twitter.com/gPTaBXPPMj
— Abdul Sami (@sami_ravian) April 20, 2022
محمد جنید نامی ٹوئٹر صارف کہتے ہیں انہیں یہ نہیں معلوم کہ آیا فواد چوہدری نے یہ بیان جان بوجھ کر دیا یا نہیں لیکن یہ ضرور ہے کہ ان کی جانب سے اس طرح کی بات پہلی دفعہ نہیں کی گئی۔ اب امریکی دھمکی اور حکومت تبدیل کرنے کی سازش کے بیانیے کا کیا ہوگا؟
Don%27t know if Fawad Chaudhary does this on purpose or what but here is another one from him.He says PTI is not in govt because our relation with establishment wasn%27t good in the last few months.So what about US threat? Regime change conspiracy?What are these people 😄
— Muhammad Junaid Asif Sahi (@Junaid_Sahi) April 20, 2022
یاد رہے کہ 10 اپریل کو پاکستان کی قومی اسمبلی میں عمران خان کے خلاف عدم اعتماد کی تحریک منظور ہونے کے بعد عمران خان وزارتِ عظمیٰ سے محروم ہو گئے تھے۔
اسمبلی میں عدم اعتماد کی تحریک آنے سے قبل عمران خان کی جانب سے یہ مؤقف اپنایا گیا تھا کہ ان کی حکومت گرانے کی سازش امریکہ نے کی ہے جس کے لیے مقامی سہولت کاروں کی مدد حاصل ہے۔ تاہم امریکہ نے عمران خان کے ان الزامات کی بارہا تردید کی ہے۔
تحریکِ انصاف اپنی حکومت کے خاتمے کا الزام صرف امریکہ پر ہی نہیں لگا رہی بلکہ اس کی جانب سے نئی حکومت کو بیرونِ ملک سے مسلط کردہ حکومت قرار دیا جا رہا ہے اور اس حوالے سے ٹوئٹر پر 'امپورٹڈ حکومت نامنظور' کا ہیش ٹیگ بھی گزشتہ کئی روز سے ٹرینڈ کر رہا ہے۔
تاہم فواد چوہدری کے حالیہ انٹرویو کے بعد ٹوئٹر پر بیرونی سازش کے عمران خان کے بیانیے پر سوالات اٹھانے کا سلسلہ جاری ہے۔
ڈاکٹر اعجاز علی نامی ٹوئٹر صارف کہتے ہیں کہ تحریکِ انصاف کے زوال کی اصل وجہ وہ ہے جس کا ذکر فواد چوہدری کر رہے ہیں۔ کتنے افسوس کی بات ہے کہ قوم کو سازش کے پیچھے لگا کر بھیڑ بکریاں بنایا ہوا ہے۔
And this is the real non-sazishi reason for the PTI%27s downfall as told by Fawad chaudhary. Qaom ko sazish k peeche laga k bhair bakrian banaya howa hai. what a pity #PTIbots https://t.co/mp7oZm1ULa
— Dr. Ijaz Ali (Mahasin Khan) (@Mahasin_Khaan) April 20, 2022
علاوہ ازیں سابق وزیرِ اعظم عمران خان نے بدھ کی شب پہلی مرتبہ ٹوئٹر اسپیس پر اپنی جماعت کے حامیوں اور کارکنوں کے سوالات کے جواب دیے تھے۔ ان کی گفتگو سے ایسا تاثر مل رہا تھا کہ وہ اداروں کے ساتھ گزشتہ تین ہفتوں سے جاری تصادم کی صورتِ حال کو ختم کرنا چاہتے ہیں۔
فوج سے متعلق پوچھے گئے سوال پر عمران خان نے اپنے حامیوں کو کہا کہ فوج کے خلاف کبھی بات نہ کریں، فوج نہ ہو تو یہ ملک نہیں رہے گا۔ ان کی ذات سے زیادہ اس ملک کو فوج کی ضرورت ہے۔