ٹوئٹر کے مالک ایلون مسک نے ٹوئٹر کے لیے نیا سی ای او ملنے کا اعلان کیا ہے جس کے بارے میں ان کا کہنا ہے کہ ٹوئٹر کے نئے سی ای او 'بہترین' ہیں۔
انہوں نے اس کے ساتھ ہی اپنے پالتو کتے فلوکی کو ٹوئٹر کے نئے سی ای او کے طور پر متعارف کرایا ہے۔
ایلون مسک کے پاس جاپانی’شیبا اینو‘ نسل کا کتا ہے جس کو وہ فلوکی کے نام سے پکارتے ہیں۔
انہوں نے فلوکی کی ایک ایسی تصویر ٹوئٹر پر شیئر کی ہے جس میں وہ ایک کرسی پر بیٹھا ہوا ہے اور اس کے سامنے لگی تختی پر سی ای او لکھا ہوا ہے جب کہ اس کے ساتھ ساتھ دیگر دستاویزات اور ایک لیپ ٹاپ ٹیبل پر موجود ہے۔
So much better than that other guy!
— Elon Musk (@elonmusk) February 15, 2023
ایلون مسک نے دوسری ٹوئٹ میں کہا کہ یہ دوسرے فرد سے بہت بہتر ہے۔
ساتھ ہی انہوں نے دعویٰ کیا کہ یہ اعداد و شمار کے معاملے میں بھی بہت بہتر ہے۔
He’s great with numbers! pic.twitter.com/auv5M1stUS
— Elon Musk (@elonmusk) February 15, 2023
ایلون مسک نے فلوکی کے اسٹائل کی بھی تعریف کی ہے۔
And has 🔥🔥 style pic.twitter.com/9rcEtu9w1Z
— Elon Musk (@elonmusk) February 15, 2023
ٹوئٹر کے مالک کے اس ٹوئٹ کے بعد لوگ اس پر دلچسپ تبصرے بھی کر رہے ہیں۔
ایلون مسک نے گزشتہ برس 44 ارب ڈالر میں ٹوئٹر خریدنے کے بعد اس کے بھارتی نژاد سی ای او پراگ اگروال کو نکال دیا تھا۔
گزشتہ برس دسمبر میں انہوں نے ٹوئٹر پر ایک پول کرایا تھا کہ کیا وہ ٹوئٹر کے سربراہ کا عہدہ چھوڑ دیں۔ تو 57 فی صد لوگوں ان کو عہدہ چھوڑنے کا مشورہ دیا تھا۔
بعد ازاں انہوں نے ایک ٹوئٹ میں کہا تھا کہ جیسے ہی مجھے کوئی اتنا احمق مل جائے گا جو میری جگہ کام کر سکے تو میں سی ای او کے عہدے سے استعفیٰ دے دوں گا۔
I will resign as CEO as soon as I find someone foolish enough to take the job! After that, I will just run the software & servers teams.
— Elon Musk (@elonmusk) December 21, 2022
دوسری جانب منگل کو دبئی میں ورلڈ گورنمنٹ سمٹ سے ورچوئل خطاب میں ایلون مسک کا کہنا تھا کہ ممکنہ طور پر رواں برس کے آخر تک وہ ٹوئٹر کے نئے سی ای او کو تلاش کر لیں گے۔
ان کا کہنا تھا کہ رواں برس کا آخر ممکنہ طور پر ایک ایسا وقت ہوگا جب وہ کسی اور کو ٹوئٹر کے انتظامی امور چلانے کے لیے تلاش کر لیں گے۔