سینٹرل بیورو آف انویسٹی گیشن (سی بی آئی) نے آبکاری پالیسی میں مبینہ بدعنوانی کے الزام میں دہلی کے نائب وزیرِ اعلیٰ منیش سسودیا کو گرفتار کر لیا ہے۔گرفتاری سے قبل سی بی آئی اہلکاروں نے ان سے آٹھ گھنٹے تک پوچھ گچھ کی۔
سی بی آئی کے ایک بیان میں کہا گیا ہے کہ سسودیا کو انسدادِ بدعنوانی قانون کی دفعہ سات اور تعزیرات ہند کی متعدد دفعات کے تحت اتوار کو گرفتار کیا گیا ہے۔
سی بی آئی کا یہ بھی کہنا ہے کہ منیش سسودیا کے سامنے بہت سے سوالات رکھے گئے تھے، جن کا انہوں نے اطمینان بخش جواب نہیں دیا۔ وہ تحقیقات میں تعاون نہیں کر رہے تھے۔
تحقیقاتی ادارے کے مطابق مذکورہ اسکینڈل میں ان کے ملوث ہونے کے ثبوت بھی پیش کیے گئے۔
سسودیا دہلی میں برسرِ اقتدار عام آدمی پارٹی کی حکومت کے دوسرے وزیر ہیں جنہیں گرفتار کیا گیا ہے۔
انفورسمنٹ ڈائریکٹوریٹ (ای ڈی) نے گزشتہ سال مئی میں وزیرِ صحت ستیندر جین کو فرضی کمپنی بنانے اور منی لانڈرنگ کے الزام میں گرفتار کیا تھا۔ وہ اس وقت سے تہاڑ جیل میں قید ہیں۔
منیش سسودیا دہلی حکومت اور عام آدمی پارٹی میں وزیر اعلیٰ اروند کیجری وال کے بعد دوسری اہم ترین شخصیت ہیں۔ وہ نائب وزیرِ اعلیٰ کے ساتھ ساتھ وزیرِ صحت اور لگ بھگ 18 اہم محکموں کے انچارج ہیں۔ دہلی حکومت میں مجموعی طور پر 33 محکمے ہیں۔
शिक्षा क्रांति के जनक @msisodia जी की Fake Case में गिरफ़्तारी केवल केजरीवाल जी के शिक्षा-स्वास्थ्य मॉडल को देशभर में फ़ैलने से रोकने के लिए की गई है।जिसके विरोध में @AAPHaryana के कार्यकर्ताओं ने BJP मुख्यालय पर जोरदार विरोध प्रदर्शन किया। 🔥 pic.twitter.com/er2qprn23H
— AAP (@AamAadmiParty) February 27, 2023
ان کی گرفتاری کے خلاف عام آدمی پارٹی نے پیر کو ملک کے مختلف مقامات پر احتجاجی مظاہرے کیے۔ اس موقعے پر پولیس کی جانب سے سخت حفاظتی انتظام کیا گیا۔
سسودیا کی گرفتاری کے خلاف جب اتوار کو عام آدمی پارٹی کے رہنماؤں اور کارکنوں نے سی بی آئی کے ہیڈ کوارٹرز کے سامنے احتجاج کیا، تو کم از کم 50افراد کو حراست میں لے لیا گیا۔
حراست میں لیے گئے افراد میں ارکانِ پارلیمان سنجے سنگھ اور روہت کمار مہرولیہ کے ساتھ ساتھ تین دیگر ارکان اسمبلی اور ایک سابق رکن اسمبلی بھی شامل ہیں۔
#WATCH | CBI brought Delhi Deputy CM Manish Sisodia to Rouse Avenue Court. pic.twitter.com/tozetCE9My
— ANI (@ANI) February 27, 2023
دہلی کے وزیر اعلیٰ اروند کیجری وال نے سسودیا کی گرفتاری کو ’گندی سیاست‘ کا شاخسانہ قرار دیتے ہوئے کہا کہ وہ بے قصور ہیں۔
ان کے بقول گرفتاری کے خلاف عوام میں شدید ناراضگی ہے، وہ اس کا جواب دیں گے۔ حکمران جماعت بھارتیہ جنتا پارٹی (بی جے پی) کی سی بی آئی نے سیاسی مخالفت کی وجہ سے انہیں گرفتار کیا ہے۔
عام آدمی پارٹی کا کہنا ہے کہ بی جے پی کیجری وال اور سسودیا کی مقبولیت سے خائف ہے جس کی وجہ سے یہ کارروائی کی گئی ہے۔
#Sambit Patra का Manish Sisodia को लेकर बयान- उन्होने बढ़ाया कमीशन... #sambitpatra #bjp #manishsisodia #aamaadmiparty #bharatatoznews pic.twitter.com/n6AulTpaqN
— भारत AtoZ NEWS (@bharatatoznews1) February 27, 2023
دوسری جانب بی جے پی کے ترجمان سمبت پاترا نے الزام عائد کیا کہ دہلی حکومت اسکولوں اور عبادت گاہوں کے پاس شراب کی دکانیں کھولنا چاہتی تھی تاکہ وہ کرپشن کرکے پیسہ بنا سکے۔
بی جے پی کا کہنا ہے کہ اگر سسودیا بے قصور ہیں، تو انہیں قانون کا سامنا کرنے میں ڈر کیوں ہے۔
دہلی حکومت نے گزشتہ برس آبکاری پالیسی میں ترمیم کرکے شراب کی دکانوں کو حکومت کے کنٹرول سے آزاد کر دیا تھا اور شراب کا کاروبار کرنے والوں کو آزادانہ طور پر شراب کی دکانیں کھولنے کی اجازت دے دی تھی۔
دہلی کے چیف سیکریٹری نے اس فیصلے کے خلاف دہلی کے لیفٹننٹ گورنر (ایل جی) کو ایک رپورٹ ارسال کی تھی، جس میں انہوں نے بدعنوانی کا الزام لگایا تھا۔
اس کے بعد لیفٹننٹ گورنر نے مرکزی وزارتِ داخلہ کو ارسال کردہ اپنی رپورٹ میں اس معاملے کی تحقیقات کی درخواست کی تھی۔
ان اقدامات کے بعد دہلی حکومت نے آبکاری پالیسی میں ترمیم کو منسوخ کر دیا تھا اور سابقہ پالیسی بحال کر دی گئی تھی۔
.@msisodia जी को गिरफ़्तार करने की क्या जरूरत पड़ी?❓क्या @msisodia देश छोड़ कर भाग रहे थे?❓क्या कोई नया सबूत उनके खिलाफ़ मिला है?❓क्या @msisodia जी ने सबूत नष्ट करने की कोशिश की?नहींरही बात Excise Policy की तो वो LG Anil Baijal साहब ने Approve की।—@Saurabh_MLAgk pic.twitter.com/y8JvMESCpp
— AAP (@AamAadmiParty) February 27, 2023
اس دوران بی جے پی کی جانب سے نائب وزیرِ اعلیٰ منیش سسودیا اور حکومت پر بدعنوانی کا الزام عائد کیا جاتا رہا۔
بی جے پی کا کہنا تھا کہ عام آدمی پارٹی کی حکومت نے شراب کا کاروبار کرنے والوں سے پیسے لے کر پالیسی میں ترمیم کی تھی۔
دریں اثنا سی بی آئی اور ای ڈی نے اپنی کارروائیاں تیز کر دیں۔ سی بی آئی نے سسودیا کے گھر اور دہلی کے 21 مقامات پر چھاپے مارے۔ ان چھاپوں کی بنیاد پر سی بی آئی اور ای ڈی نے کئی افراد کو گرفتار کیا۔
سی بی آئی نے 14 جنوری کو سسودیا کی رہائش گاہ کا دورہ کیا اور چھان بین کی۔ سسودیا نے اسے سی بی آئی کا چھاپہ قرار دیا تھا۔ اس سے قبل سی بی آئی نے ان سے پوچھ گچھ کی تھی۔
سی بی آئی نے 19 فروری کو سسودیا کو پھر پوچھ گچھ کے لیے بلایا جس پر انہوں نے ایک ہفتے کی مہلت مانگی تھی۔ انہوں نے 26 فروری کو سی بی آئی کے دفتر جا کر پوچھ گچھ میں حصہ لیا اور اسی دن انہیں گرفتار کر لیا گیا۔
مبصرین عام آدمی پارٹی کے اس الزام کی تائید کرتے ہیں کہ سیاسی مخاصمت کی وجہ سے یہ کارروائی کی گئی ہے۔ لیکن ان کا یہ بھی کہنا ہے کہ اگر سسودیا بدعنوانی میں ملوث نہیں ہیں تو انھیں گھبرانے کی ضرورت نہیں ہے۔
EMERGENCY LIKE SITUATION IN DELHI ‼️PM Modi%27s Police forcibly enter the AAP office to arrest AAP volunteers!The world%27s biggest party is so afraid of the world%27s smallest party? pic.twitter.com/gN4AIPRoWV
— AAP (@AamAadmiParty) February 27, 2023
سینئر تجزیہ کار شیتل سنگھ کا کہنا ہے کہ اس وقت بھارت کی سیاست ہی ایسی ہو گئی ہے کہ جو حکومت میں ہے وہ اپنے مخالفین کے خلاف کارروائی کرتا ہے اور اپنے لوگوں کو بچاتا ہے۔
ان کا کہنا تھا کہ بی جے پی کے متعدد رہنماؤں پر بھی بدعنوانی کے الزامات ہیں لیکن سرکاری ادارے ان کے خلاف کارروائی نہیں کرتے۔ اس کا مطلب یہ نہیں کہ دوسری جماعتوں کے رہنماؤں اور کارکنوں کو بدعنوانی کی چھوٹ ملنی چاہیے۔
شیتل سنگھ کے خیال میں عام آدمی پارٹی پر بدعنوانی کے جو الزامات لگائے جا رہے ہیں وہ غلط نہیں ہیں۔ جو گرفتاریاں ہوئی ہیں وہ بھی درست ہیں۔ تاہم ان کے مطابق سسودیا نے اس معاملے میں رشوت لی ہو، اس کا امکان کم ہے۔ کیوں کہ وہ ایک ایمان دار سیاست دان کے طور پر مشہور ہیں۔
مرکزی حکومت میں سیکریٹری کے عہدے پر رہنے والے سابق آئی اے ایس وجے شنکر پانڈے کا کہنا ہے کہ آبکاری محکمہ حکومتوں کے لیے کمائی کرنے کا سب سے بڑا ذریعہ ہے اور تمام حکومتیں اس سے ناجائز کمائی کرتی ہیں۔
انھوں نے ایک یو ٹیوب چینل پر ہونے والی بحث میں حصہ لیتے ہوئے کہا کہ حکومت کی پوری مشینری اس قسم کی بدعنوانیوں میں ملوث رہتی ہے۔
ان کے خیال میں دہلی حکومت پر جو الزامات لگائے گئے ہیں وہ درست ہیں۔
केजरीवाल के सिपाही हैंहम अंगारों पर चलकर आएं हैंगीदड़ भभकियों से डरने वाले नहीं,हम भगत सिंह, बाबा साहेब के अनुयायी हैं। pic.twitter.com/FO1pAaaBt2
— AAP (@AamAadmiParty) February 27, 2023
لیکن بعض مبصرین کا خیال ہے کہ یہ کارروائی پوری طرح سیاسی ہے اور اس سے عام آدمی پارٹی کو نقصان پہنچے گا۔ وہ سوال اٹھاتے ہیں کہ اگر منیش سسودیا یہ اعلان کر دیتے کہ وہ بی جے پی میں شامل ہو رہے ہیں تو کیا اس وقت بھی ان کے خلاف کارروائی ہوتی اور انہیں گرفتار کیا جاتا۔
حزب اختلاف کی جماعتوں ترنمول کانگریس، راشٹریہ جنتا دل، بھارت راشٹریہ سمیتی اور سماج وادی پارٹی نے سسودیا کی گرفتاری کی مذمت کی ہے۔
کانگریس کے ایک سینئر رہنما ابھیشیک منو سنگھوی نے بھی گرفتاری کی مذمت کی ہے تاہم دہلی کانگریس کے صدر نے گرفتاری کا خیرمقدم کیا ہے۔
واضح رہے کہ 12-2011 میں ’انڈیا اگینسٹ کرپشن‘ نامی تحریک شروع ہوئی تھی جس کی قیادت سماجی کارکن انا ہزارے کر رہے تھے۔ ان کے ساتھ اروند کیجری وال بھی تھے جو آئی آر ایس کی سرکاری ملازمت سے مستعفی ہو کر اس میں شامل ہوئے تھے۔
تحریک کی کامیابی کے بعد کیجری وال نے سیاسی جماعت بنانے کا خیال ظاہر کیا جسے انا ہزارے نے مسترد کر دیا تھا۔ اس کے بعد کیجری وال نے ان سے الگ ہو کر دو اکتوبر 2012 کو عام آدمی پارٹی کی بنیاد رکھی۔
انہوں نے اعلان کیا تھا کہ وہ حکومت کرنے نہیں بلکہ ملک کی سیاست کو ایک نئی سمت دینے آئے ہیں تاکہ صاف ستھری سیاست کا دور واپس آئے۔
I am told that most CBI officers were against Manish’s arrest. All of them have huge respect for him and there is no evidence against him. But the political pressure to arrest him was so high that they had to obey their political masters
— Arvind Kejriwal (@ArvindKejriwal) February 27, 2023
ملک کے بہت سے دانش ور ان کے ساتھ آگئے تھے لیکن جب کیجری وال نے انتخابی سیاست میں قدم رکھا تو ان کی پالیسیوں سے متنفر ہو کر بہت سے لوگ رفتہ رفتہ الگ ہو گئے۔
متعدد مبصرین کا کہنا ہے کہ کیجری وال بھی اسی سیاست میں رنگ گئے ہیں جس کی مخالفت کے ساتھ وہ ابھرے تھے۔ کیجری وال نے وزیرِ اعظم بننے کے عزائم کو بھی کبھی نہیں چھپایا۔
بہرحال اس وقت عام آدمی پارٹی کی حکومت دہلی اور پنجاب میں ہے۔ اسے گجرات کے حالیہ اسمبلی انتخابات میں اچھے ووٹ ملے تھے اور اب وہ قومی پارٹی بنتی جا رہی ہے۔
کچھ مبصرین کا کہنا ہے کہ بی جے پی کو عام آدمی پارٹی کی مقبولیت سے خطرہ محسوس ہوتا ہے اس لیے اس کے خلاف کارروائی کی جا رہی ہے۔