بھارت کے کرکٹ بورڈ (بی سی سی آئی) نے کھلاڑیوں کے کرونا ٹیسٹ مثبت آنے کے بعد انڈین پریمیئر لیگ (آئی پی ایل) کے جاری سیزن کو ملتوی کر دیا ہے۔
ایونٹ میں شامل چنئی سپر کنگز اور کولکتہ نائٹ رائڈرز کے کھلاڑیوں کے پیر کو کرونا ٹیسٹ مثبت آئے تھے جس کے بعد دونوں ٹیمیں آئسولیشن میں چلی گئی تھیں۔
آئی پی ایل کے آفیشل ٹوئٹر اکاؤنٹ سے منگل کو ایک ٹوئٹ میں بتایا گیا ہے کہ لیگ کو غیر معینہ مدت تک کے لیے ملتوی کر دیا گیا ہے۔
بیان کے مطابق آئی پی ایل کی گورننگ باڈی اور بی سی سی آئی نے ہنگامی اجلاس کے دوران ایونٹ کو فوری طور پر معطل کرنے کا فیصلہ کیا ہے۔
لیگ کے ملتوی کرنے کے اعلان سے چند گھنٹے قبل ہی چنئی سپر کنگ نے ایک ٹوئٹ میں بتایا تھا کہ ٹیم کے بالنگ کوچ لکشمی پتھی بالاجی اور ایک عملے کے رکن کا ٹیسٹ مثبت آیا ہے جس کے بعد پوری ٹیم آئسولیشن میں چلی گئی ہے۔
UPDATE: The Indian Premier League Governing Council (IPL GC) and Board of Control for Cricket in India (BCCI) in an emergency meeting has unanimously decided to postpone IPL 2021 season with immediate effect.Details - https://t.co/OgYXPj9FQy pic.twitter.com/lYmjBId8gL
— IndianPremierLeague (@IPL) May 4, 2021
چنئی سپر کنگ کی پوری ٹیم کے آئسولیشن میں جانے کے بعد منگل کو اس کا راجستھان رائلز کے خلاف میچ بھی ری شیڈول کر دیا گیا تھا۔
اس سے قبل کولکتہ نائٹ رائڈرز کے دو کھلاڑیوں میں وائرس کی تشخیص کے بعد رائل چیلنجرز بنگلور اور کولکتہ کے درمیان پیر کو ہونے والا میچ بھی نہیں ہو سکا تھا۔
کولکتہ نائٹ رائڈرز کے کھلاڑی سندیپ واریئر اور ورون چکراورتھی کا پیر کو کرونا ٹیسٹ مثبت آیا تھا جس کے بعد پوری ٹیم قرنطینہ میں چلی گئی تھی۔
آئی پی ایل میں مجموعی طور پر 60 میچز کھیلے جانے تھے اور اب تک 29 میچز ہوئے تھے۔
"There%27s plenty of cricket to be played, but the most important thing right now is the health and safety of all concerned." - @VenkyMysore@chakaravarthy29 @StarSportsIndia #SandeepWarrier #KKR #IPL2021 pic.twitter.com/iO1psuVZ7H
— KolkataKnightRiders (@KKRiders) May 3, 2021
بھارتی کرکٹ بورڈ نے آئی پی ایل کے رواں سیزن کے لیے احمد آباد، دہلی، ممبئی، چنئی، بنگلورو اور کولکتہ کا انتخاب کیا تھا اور یہ تمام شہر گزشتہ ماہ عالمی وبا سے بری طرح متاثر تھے۔
بائیو سیکیور ببل کے باوجود کھلاڑیوں کے متاثر ہونے اور بھارت میں وبا کے تیزی سے پھیلاؤ کے باعث تین آسٹریلوی کھلاڑی پہلے ہی ایونٹ ادھورا چھوڑ کر چلے گئے تھے۔ ان کھلاڑیوں میں ایڈم زمپا، اینڈریو ٹائی اور کین رچرڈسن شامل ہیں۔