|
حماس کے ایک سینئر اہل کار کا کہنا ہے کہ اگر اسرائیل مصر میں جاری مذاکرات کے دوران مطالبات تسلیم کرتا ہے تو غزہ میں 24 سے 48 گھنٹوں کے دوران جنگ بندی ممکن ہو سکتی ہے۔
فرانسیسی خبر رساں ادارے 'اے ایف پی' کے مطابق حماس اہل نے قاہرہ میں جاری مذاکرات کی حساسیت کو دیکھتے ہوئے اپنا نام ظاہر نہ کرنے کی شرط پر یہ بات کہی۔
مذکورہ اہلکار کا کہنا تھا کہ اگر اسرائیل، شمالی غزہ میں بے گھر فلسطینیوں کی واپسی اور امداد میں اضافے پر رضا مند ہوتا ہے تو اس پیش رفت کے نتیجے میں اگلے 24 اور 48 گھنٹوں میں جنگ بندی کا معاہدہ ہو سکتا ہے۔
دوسری طرف امریکی صدر بائیڈن کی انتظامیہ کا ہفتے کو کہنا تھا کہ اسرائیل نے غزہ میں جنگ بندی کے لیے فریم ورک کم و بیش قبول کر لیا ہے جس میں یرغمالوں کی رہائی بھی شامل ہے۔
Your browser doesn’t support HTML5
امریکہ کی اسرائیل کے لیے حمایت پر ووٹرز ناراض
بائیڈن انتظامیہ کے عہدیدار کا صحافیوں سے اپنا نام ظاہر نہ کرنے کی شرط پر کہنا تھا کہ اب گیند حماس کے کورٹ میں ہے۔
عہدیدار کے مطابق معاہدے کے مطابق غزہ میں مزید امداد کی فراہمی بھی ممکن ہو سکے گی۔
عہدیدار کا مزید کہنا تھا کہ مصر میں اتوار کو مذاکرات دوبارہ شروع ہوں گے اور ثالث مصر اور قطر حماس کی طرف سے جواب کی توقع رکھتے ہیں۔
دوسری طرف برطانوی خبر رساں ادارے 'رائٹرز' کے مطابق حماس کے ایک سینئر اہل کا کہنا تھا کہ حماس کا وفد جنگ بندی سے متعلق مذاکرات کرنے اتوار کو قاہرہ پہنچا۔
رپورٹس کے مطابق مذاکرات کی سربراہی حماس کے نائب چیف خلیل الحیا کر رہے ہیں۔
SEE ALSO: غزہ: امدادی مرکز پر فائرنگ سے 100 سے زیادہ ہلاکتیں، اموات کی مجموعی تعداد 30 ہزار سے تجاوزجنگ بندی سے متعلق مذاکرات سے واقف ایک فلسطینی اہل کار نے رائٹرز کو بتایا کہ وہ ابھی تک کسی معاہدے کو حتمی شکل دینے کے قریب نہیں ہیں۔
علاوہ ازیں مذاکرات میں حصہ لینے کے لیے اسرائیلی وفد کی بھی قاہرہ آمد متوقع ہے۔
اے ایف پی کے مطابق حماس کے زیرِ انتظام غزہ میں وزارت صحت کا کہنا ہے کہ گزشتہ 24 گھنٹوں کے دوران کم از کم 90 فلسطینی ہلاک ہوئے ہیں۔ جن میں ایک ہی خاندان کے 14 افراد بھی شامل ہیں جن کے گھر کو جنوبی رفح میں واقع پناہ گزین کیمپ کو نشانہ بنایا گیا تھا۔
اس خبر کے لیے معلومات خبر رساں اداروں 'اے ایف پی' اور 'رائٹرز' سے لی گئی ہیں۔