خیبر پختونخوا کے قبائلی ضلع باجوڑ کے انتظامی مرکز خار میں جمعیت علماء اسلام (ف) کے کنونشن میں ہونے والے دھماکے کو پولیس نے خود کش حملہ قرار دیا ہے۔ امریکہ سمیت کئی ممالک نے دھماکے کی مذمت کی ہے۔
وائس آف امریکہ کے نمائندے شمیم شاہد کے مطابق خیبر پختونخوا کی پولیس کے انسپکٹر جنرل اختر حیات خان کا کہنا ہے کہ باجوڑ میں اتوار کو ہونے والا دھماکہ خود کش تھا۔
آئی جی پولیس کے مطابق خود کش حملے میں 10 کلو بارودی مواد استعمال کیا گیا تھا جب کہ جلسے کے مقام سے بال بیئرنگ بھی ملے ہیں۔
مقامی میڈیا کی رپورٹس کے مطابق آئی جی پولیس کا کہنا ہے کہ دھماکے کے مقام سے خود کش حملہ آور کے اعضا بھی مل گئے ہیں۔
ریسکیو1122 کی 7 ایمبولینسز پشاور باچا خان ائیر پورٹ پر تعینات جہاں باجوڑ دھماکے کے ہیلی کاپٹر کے ذریعے لانے والے 8زخمیوں کو ریسکیو1122 ایمبولینسز میں سی ایم ایچ ہسپتال منتقل کیا جارہا ہےریسکیو1122 ایمبولینسز میں میڈیکل ٹیکنشنز موجود ہیں جو راستے میں طبی امداد فراہم کریں گے pic.twitter.com/Bqt9yFmNFY
— KP_Rescue1122 (@KPRescue1122) July 30, 2023
پولیس نے دھماکے کے بعد علاقے میں سرچ آپریشن شروع کر دیا تھا۔ مقامی میڈیا کے مطابق سیکیورٹی اداروں نے کئی مشتبہ افراد کو حراست میں لے لیا ہے۔
ٹی ٹی پی کی دھماکے کی مذمت
تحریکِ طالبان پاکستان (ٹی ٹی پی) نے ایک مبینہ بیان میں باجوڑ میں ہونے والے دھماکے کی مذمت کی ہے۔
قبل ازیں خیبر پختونخوا میں ہونے والے دھماکوں کی ذمے داری ٹی ٹی پی قبول کرتی رہی ہے۔
پاکستان کے قبائلی علاقوں میں ماضی میں شدت پسند تنظیمیں داعش اور القاعدہ بھی سرگرم رہی ہیں۔ البتہ اتوار کو ہونے والے دھماکے کی ذمے داری تاحال کسی نے قبول نہیں کی۔
ٹی ٹی پی نے اپنےبیان میں کہا ہے کہ اس کا ہدف صرف فوجی ادارے اور ان کے معاونین ہیں۔
رپورٹس کے مطابق سیکیورٹی اداروں کو شبہ ہے کہ اس حملے میں شدت پسند تنظیم داعش ملوث ہو سکتی ہے۔
سی ٹی ڈی باجوڑ میں مقدمہ درج
خار میں ہونے والے خود کش حملے کا مقدمہ پولیس کے محکمۂ انسدادِ دہشت گردی (سی ٹی ڈی) باجوڑ میں درج کر لیا گیا ہے۔
خار کے ایس ایچ او نیاز محمد کی مدعیت میں درج مقدمے میں نامعلوم حملہ آور کو نامزد کیا گیا ہے۔ ایف آئی آر میں دہشت گردی، قتل، اقدام قتل اور دیگر دفعات شامل کی گئی ہیں ۔
سی ٹی ڈی باجوڑ کے سپرنٹنڈنٹ پولیس (ایس پی) امجد خان کا کہنا تھا کہ جائے وقوعہ پر جیو فیکسنگ کا عمل مکمل کرلیا گیا ہے جب کہ تحقیقات کے لیے قائم انکوائری ٹیم نے بھی اس مقام کا دورہ کیا ہے جس نے شواہد اکھٹے کیے۔
انہوں نے بتایا کہ تحقیقاتی ٹیم نے زخمیوں کے بیانات بھی قلم بند کیے ہیں۔
اموات میں اضافہ
اتوار کو خار میں دھماکے میں ہلاک ہونے والے افراد کی تعداد 54 ہو گئی ہے۔ ہلاکتوْں کی تصدیق ڈسٹرکٹ ہیتھ افسر (ڈی ایچ او) نے کی ہے۔
ریسکیو 1122 کے مطابق دھماکے کے بعد زخمیوں کو ڈسٹرکٹ اسپتال باجوڑ اور ڈی ایچ کیو تیمرگرہ منتقل کیا گیا تھا۔ بعد ازاں ایسے زخمیوں کو پشاور کے لیڈی ریڈنگ اسپتال اور کمبائنڈ ملٹری اسپتال (سی ایم ایچ) منتقل کیا گیا جن کی حالت تشویش ناک تھی۔
مختلف اسپتالوں میں زخمیوں کی اموات سے ہلاکتوں میں اضافہ ہوا ہے۔
اتوار کو مقامی انتظامیہ نے بتایا تھا کہ لگ بھگ 100 سے زائد زخمیوں کو مختلف اسپتالوں میں منتقل کیا گیا۔
دوسری جانب دھماکے میں زخمی ہونے والے کئی افراد کو ہیلی کاپٹرز کے ذریعے پشاور منتقل کیا گیا ہے۔ زخمیوں میں بعض افراد کی حالت تشویش ناک بتائی جا رہی ہے۔
امریکہ کی مذمت
امریکہ نے باجوڑ میں جے یو آئی کے کنونشن میں ہونے والے دھماکے کی مذمت کی ہے۔
اسلام آباد میں امریکہ کے سفارت خانے سے جاری ایک بیان میں کہا گیا ہے کہ امریکی سفارت خانہ دھماکے میں اموات پر افسوس کا اظہار کرتا ہے۔
We reiterate our commitment to supporting Pakistan%27s efforts in combating terrorism and ensuring the safety and security of its citizens. 3/3
— U.S. Embassy Islamabad (@usembislamabad) July 30, 2023
بیان میں مزید کہا گیا ہے کہ امریکہ کا سفارت خانہ اس پر تشدد کارروائی کی بھر پور مذمت کرتا ہے جس میں بے گناہ افراد کی جانیں گئی ہیں۔
یہ بھی کہا گیا ہے کہ اس طرح کی دہشت گردی کے اقدامات کسی بھی پر امن اور جمہوری معاشرے میں قابلِ قبول نہیں ہیں۔ امریکی سفارت خانے نے پاکستانی عوام سے مشکل وقت میں اظہارِ یکجہتی کیا ہے۔
اس کے ساتھ ساتھ پاکستان کی انسدادِ دہشت گردی کے اقدامات کی بھر پور حمایت بھی کی گئی ہے۔
سعودی عرب نے بھی پاکستان میں ہونے والے خود کش حملے کی مذمت کی ہے۔
#بيان | تعرب وزارة الخارجية عن إدانة المملكة العربية السعودية واستنكارها للهجوم الذي وقع في إقليم خيبر بختونخوا شمال غربي باكستان، وأدى لسقوط قتلى وجرحى. pic.twitter.com/vRKGcWe2Im
— وزارة الخارجية 🇸🇦 (@KSAMOFA) July 30, 2023
سعودی عرب کی وزارتِ خارجہ کے بیان میں کہا گیا ہے کہ سعودی حکومت دنیا میں کہیں بھی تشدد اور دہشت گردی کو مسترد کرتی ہے اور پاکستان کی بھر پور حمایت کا اظہار کرتی ہے۔
'دشمن پاکستان میں جمہوری نظام کے خلاف ہے'
باجوڑ میں ہونے والے دھماکے کے بعد ایک بیان میں پاکستان کے وزیرِ اعظم شہباز شریف کا کہنا تھا کہ سیاسی جماعتوں پر حملے سے واضح ہے کہ دشمن پاکستان میں جمہوری نظام کے خلاف ہے جس کی قطعاً اجازت نہیں دی جائے گی ۔
شہباز شریف کا کہنا تھا کہ باجوڑ کے انتظامی مرکز خار میں جمیعت علماء اسلام (ف) کے ورکرز کنونشن پر حملے کی جتنی بھی مذمت کی جائے کم ہے۔
باجوڑ، خار میں جمیعتِ علماءِ اسلام (ف) کے ورکرز کنوینشن پر حملے کی جتنی بھی مزمت کی جائے کم ہے. سیاسی جماعتوں پر حملے سے واضح ہے کہ دشمن پاکستان میں جمہوری نظام کے خلاف ہے جسکی قطعاً اجازت نہیں دی جائے گی. ذمہ داران کی نشاندہی کرکے انہیں قرار واقعی سزا دی جائے گی. پاکستانی قوم،…
— Shehbaz Sharif (@CMShehbaz) July 30, 2023
انہوں نے کہا کہ اس واقعے کے ذمے داروں کو قرار واقعی سزا دی جائے گی۔
پاکستان میں خود کش دھماکوں میں اضافہ
پاکستان انسٹیٹیوٹ فار کونفلیکٹ اینڈ سیکیورٹی اسٹڈیز (پی آئی سی ایس ایس) کے اعداد و شمار کے مطابق رواں برس کے ابتدائی سات ماہ میں پاکستان میں 18 خودکش حملے ہوئے ہیں جن میں دو سو سے زائد افراد ہلاک ہو چکے ہیں۔
اعداد و شمار سے واضح ہو رہا ہے کہ پاکستان میں گزشتہ دو برسوں کے مقابلے میں رواں برس خود کش حملوں میں اضافہ ہوا ہے۔
18 suicide attacks in 7 months of 2023, three more than in entire year of 2022. Only 4 suicide attacks occurred in 2021. 9 out of 18 suicide attacks in 2023 happened in ex FATA. #Pakistan #Bajaur #Terrorism
— PICSS (@PICSSIsb) July 31, 2023
پی آئی سی ایس ایس کے مطابق پاکستان میں 2022 میں 15 جب کہ 2021 میں چار خودکش حملے کیے گئے تھے۔
اعداد و شمار کے مطابق پاکستان میں 2023 میں ہونے والے 18 میں نو خودکش حملے سابقہ فاٹا کے علاقوں میں ہوئے ہیں۔