تحریک انصاف کی حکومت نے پرنسٹن یونیورسٹی کے معاشیات کے پروفیسر اور احمدی جماعت سے تعلق رکھنے والے عاطف میاں کو معاشی مشاورتی کونسل سے مذہبی حلقوں کی جانب سے شدید تنقید اور دباؤ کے بعد نکال دیا ہے۔
عاطف میاں کی مشاورتی کونسل سے نامزدگی واپس لینے کا اعلان کرتے ہوئے ملک کے وزیر اطلاعات چوہدری فواد حسین نے ٹویٹ کی کہ ’’حکومت علما اور تمام معاشرتی طبقات کو ساتھ لے کر ہی آگے بڑھنا چاہتی ہے اور اگر ایک نامزدگی سے مختلف تاثر پیدا ہوتا ہے تو یہ مناسب نہیں۔‘‘
عاطف میاں نے ٹویٹر پر لکھا ہے کہ چونکہ حکومت پاکستان کو مذہبی حلقوں کی جانب سے بہت زیادہ دباؤ کا سامنا تھا اس لئے میں نے حکومت کے استحکام کی غرض سے معاشی مشاورتی کونسل سے استعفی دے دیا ہے۔ عاطف میاں نے یہ بھی کہا کہ انہیں جب بھی موقع ملا وہ پاکستان کی خدمت کرنے کے لئے تیار رہیں گے اور وہ امید رکھتے ہیں کہ معاشی مشاورتی کونسل اپنے مینڈیٹ کے مطابق کام کرنے میں کامیاب رہے گی۔
1/ For the sake of the stability of the Government of Pakistan, I have resigned from the Economic Advisory Council, as the Government was facing a lot of adverse pressure regarding my appointment from the Mullahs (Muslim clerics) and their supporters.
— Atif Mian (@AtifRMian) September 7, 2018
اس اعلان کے بعد پاکستان میں #AtifMian ٹویٹر پر سب سے اوپر ٹرینڈ کرتا رہا۔ اس فیصلے پر سوشل میڈیا صارفین نے شدید تنقید کی اور اسے انتہاپسندوں کے سامنے جھکنے سے منسوب کیا۔
صحافی اور تجزیہ نگار رضا رومی نے لکھا ہے کہ جیسا کہ ہمیں اندازہ تھا پاکستانی حکومت دائیں بازو کے شدید دباؤ کے سامنے جھک گئی اور عاطف میاں کی نامزدگی کا فیصلہ محض ان کے مذہبی عقائد کی بنیا پر واپس لے لیا۔ انہوں نے مزید لکھا کہ یہ شرمناک ہے کہ پاکستان میں آج بھی عوام میں احمدیوں کے لئے برداشت نہیں ہے۔
عمران خان کی سابق اہلیہ جمائمہ گولڈ سمتھ نے ٹویٹر پر لکھا ہے کہ یہ ناقابل دفاع اور مایوس کن فیصلہ ہے کہ نئے پاکستان کی حکومت نے عاطف میاں کو صرف اس لئے پیچھے ہٹنے کے لئے کہہ دیا کہ وہ احمدی عقیدہ رکھتے ہیں۔ جمائمہ نے لکھا کہ پاکستان کے بانی نے ایک احمدی کو اپنا وزیر خارجہ مقرر کیا تھا۔
معروف قانون دان اور تاریخ دان یاسر لطیف ہمدانی نے لکھا ہے کہ قائد اعظم محمد علی جناح نے شدید تنقید کا سامنا کیا مگر پھر بھی کسی احمدی کو مسلم لیگ سے نہیں نکالا اور نہ ہی چوہدری ظفراللہ خان وزیر خارجہ کے عہدے سے ہٹایا۔ انہوں نے لکھا کہ نہ صرف جناح ہی، بلکہ لیاقت علی خان اور خواجہ ناظم الدین نے بھی یہ مطالبہ پورا نہ کیا۔
Jinnah was attacked abused called Kafir e Azam but he did not expel Ahmadis from the Muslim League or remove Zafrullah Khan from FM position. Not just Jinnah but also Liaquat and Nazimuddin also. @ImranKhanPTI ?
— Yasser Latif Hamdani (@theRealYLH) September 7, 2018
جبران ناصر نے لکھا ہے کہ عاطف میاں کا نام پاکستان میں ٹویٹر ٹرینڈز میں سب سے اوپر ہے۔ مگر اس بات پر گفتگو نہیں ہو رہی کہ وہ بحیثیت ایک ماہر معاشیات کے پاکستان کے لئے کیا خدمات سر انجام دے سکیں گے بلکہ بات یہ ہو رہی ہے کہ انہوں نے خدا سے عبادت کرنے کے لئے کون سا راستہ چنا ہے۔ انہوں نے لکھا کہ ہم سب خدا بنے بیٹھے ہیں، اب خدا ہی ہم سب پر رحم کرے۔
No.1 Trend in Pakistan not to discuss his achievements, expertise and services he can provide to the country but to discuss how he wishes to reach out to God. While pretending to be guardians of faith we have all assumed role of God ourselves so may God have mercy on us #AtifMian pic.twitter.com/gCWb4luw2S
— M. Jibran Nasir (@MJibranNasir) September 7, 2018
اے این پی کی بشریٰ گوہر کا کہنا تھا کہ حکومت نے شہریوں کے آئینی حقوق پر شکست تسلیم کی ہے۔
عاطف میاں کے استعفی کے بعد معاشی مشاورتی کونسل کے ایک اور رکن اور امریکہ کے ہارورڈ کینیڈی سکول میں بطور پروفیسر کام کرنے والے عاصم اعجاز خواجہ نے ٹویٹر پر اپنے پیغام میں لکھا ہے کہ انہوں نے بھی کونسل کی رکنیت سے استعفی دے دیا ہے۔ انہوں نے کہا کہ وہ اس سلسلے میں مدد کرنے کے لئے تو تیار تھے مگر جب اصولوں پر ایسے سمجھوتے کئے جائیں تو ان کے لئے کام کرنا ممکن نہیں تھا۔ انہوں نے یہ بھی لکھا کہ ایک مسلمان کے طور پر میں اس فیصلے کی حمایت نہیں کر سکتا۔
صحافی اور معروف اینکر ضرار کُھہڑو نے لکھا ہے کہ تحریک انصاف نے مسلم لیگ ن کے خلاف مذہب کا کارڈ استعمال کیا یہاں تک کہ احسن اقبال پر گولی تک چل گئی، تو کیا حکومت میں آ کر سب کچھ ختم ہوجانا تھا؟ انہوں نے لکھا کہ جب انتہاپسندوں کی مدد کی جاتی ہے تو وہ مضبوط ہوتے چلے جاتے ہیں اور آپ کمزور۔ تحریک لبیک یارسول اللہ کے ووٹ بینک کے بڑھنے پر مبارکباد!
You used religion card against PML-N, kept on using it even after Ahsan Iqbal was shot. And what? once you had one it would all go away? Nah bro, when you pander to the extreme right, the extreme right gains. You lose. Congrats on increasing TLP power and votebank
— Zarrar Khuhro (@ZarrarKhuhro) September 7, 2018