ویسے تو پاکستان میں غیر ملکی سفارتکار اونچی فصیلوں والے انتہائی محفوظ علاقے میں رہتے ہیں۔ لیکن پاکستان میں تعینات جرمنی کے سفیر کچھ مختلف انداز میں رہتے ہیں۔ وہ پورے میں ملگ میں گھومتے پھرتے ہیں لوگوں سے ملتے ہیں۔ ٹوئٹر پر اپنے فالورز کو ملاقات کے لیے کبھی کبھار گھر پر بھی مدعو کر لیتے ہیں۔
جرمن سفیر مارٹن کابلر کو اگر سوشل میڈیا سٹار کہا جائے تو غلط نہیں ہو گا۔ ٹوئٹر پر اُن کے سوا لاکھ سے زیادہ فالور ہیں اور وہ ٹوئٹر پر بہت سرگرم دکھائی دیتے ہیں۔
مالٹے کا موسم ہوا چاہتا ہے! منکی شریف سے مزیدار مالٹے خریدے جو کہ وزیر تحفظ پرویز خٹک اور اناروں کا آبائ علاقہ ہے۔مگر آپ تصویر میں دیکھ سکتے ہیں مجھے پلاسٹک کے لفافے میں خریداری کرتے بہت برا لگا۔ مجھے بتائیے ہم پلاسٹک سے کیسے گریز کریں؟ #noplastic pic.twitter.com/7UXSucqbOo
— Martin Kobler (@KoblerinPAK) December 5, 2018
مارٹن عموماً سوشل میڈیا پر سماجی مسائل کی نشاہندہی کرتے ہیں اور ماحولیاتی تبدیلی، پانی کی کمی، پلاسٹک کا استعمال روکنے جیسے مضوعات پر کچھ اچھا کرنے کی ترغیب دیتے ہوئے نظر آتے ہیں لیکن گذشتہ چند دونوں کے دوران انھوں نے سیاسی معاملات پر بھی اپنے رائے کا اظہار کیا۔
اس سڑک کو دیکھیے جو ازاخیل بالا میں مقامی گاؤں کے لوگوں نے #Germany کے @kfwpress کے تعاون سے چالیس 40 لاکھ روپے میں بنائ یہ 1 کلو میٹر لمبی ہے اور 12 انچ موٹی ۔ اسی طرح کی سڑک @KPGovernment نے 1 کروڑ میں ناقص معیار کی( 6 انچ موٹائ) بنوائ۔ کیا آپ مجھے بتا سکتے ہیں کیوں؟؟ pic.twitter.com/8IKdTjEJPU
— Martin Kobler (@KoblerinPAK) December 5, 2018
بدھ کے روز مارٹن نے جرمنی کے تعاون سے خیبر پختونخوا کے ایک دیہات میں بنائی گئی سڑک کی تصویر پوسٹ کی اور لکھا کہ’ ازخیل بالا کی اس سڑک کو دیکھیں 12 انچ کی تہہ والی اس سڑک کی فی کلومیٹر لاگت 40 لاکھ روپے ہے اور خیبر پختونخوا کی حکومت نے چھ انچ تہہ والی ایسی ایک سٹرک ایک کروڑ روپے فی کلومیٹر کی لاگت میں بنائی۔ کوئی بتا سکتا ہے کہ ایسا کیوں ہے؟’
اس ٹویٹ پر مارٹن کو کڑی تنقید کا سامنہ کرنا پڑا۔ کیونکہ مارٹن نے اس ٹویٹ میں خیبر پختوانخوا کی حکومت کو بھی ٹیگ کیا تھا تو صوبائی وزیر برائے اطلاعات نے مارٹن کی ٹویٹ کے جواب میں لکھا۔
Excellency, the answer to your question is very simple. The road, you are pointing out to, does not show specifications and does not describe the kind of drainage system built along the road or the cross drainage structures.Shoukat YousafzaiMinister for Information and PRs, KP.
— Information & PRs KP (@infokpgovt) December 5, 2018
خیبر پختوانخوا کے وزارتِ اطلاعات کے ٹوئٹر اکاؤنٹ سے ایک ٹویٹ میں شوکت یوسف زئی کے حوالے سے لکھا گیا کہ ’بالکل آپ کے سوال کا جواب بہت سادہ ہے۔ جو سٹرک آپ نے بنوائی ہے اس کا تعمیراتی معیار نظر نہیں آ رہا ہے اور نہ سڑک کے کنارے سیوریج کا کوئی نظام دکھائی دے رہا ہے۔
ٹوئٹر پر جہاں بہت سے لوگوں نے جرمن سفیر کی ٹویٹ پر صوبائی حکومت سے مختلف سوالات پوچھے وہیں کچھ صارفین نے تو خود ہی اس کی وجہ بھی تلاش کر لی۔ ایک صارف اعجاز نے لکھا کہ ’جواب بہت سادہ ہے دیہات میں رہنے والی ہماری عوام اب ایماندار ہے اور وہ رشوت نہیں لیتی ہے۔‘
صحافی افتخار فردوس نے جرمن سفیر اور خیبر پختونخوا کی حکومت کی نوک جھونک پر لکھا کہ ’لگتا ہے کہ مسٹر کابلر کی ٹویٹ نے چائے کے کپ میں طوفان کھڑا کر دیا ہے۔
ایک صارف فوزیہ یزدانی نے مارٹن کی ٹویٹ کے جواب میں لکھا کہ ’یہ ٹویٹ اُن کے (مارٹن ) دائرہ کار سے باہر ہے۔ انھوں نے لکھا کہ ’ایک منجھے ہوا سفارتکار زیادہ جانتا ہے کہ اُسے مشکل چیز کو اپنے الفاظ میں کیسے کہنا ہے‘
تجزیہ کاروں اور سوشل میڈیا پر سرگرم افراد کا کہنا ہے کہ مختلف ممالک کے سفیر میزبان ملک کی پالیسوں کے بارے میں کھلے عام گفتگو نہیں کر سکتے اور انھیں سفارتی حدود میں ہی رہنا ہوتا ہے۔
I think a trip to the Foreign Office is due for @KoblerinPAK One cannot completely disagree with him but diplomats have their limitations. Commenting publicly on policies of host government...
— Mariana Baabar Pashteen (@MarianaBaabar) December 6, 2018
اخبار دی نیوز سے وابستہ صحافی ماریانہ بابر نے لکھا کہ ’میرے خیال میں مارٹن کابلر کو دفترِ خارجہ بلایا جانا چاہیے۔ اُن کی بات سے مکمل طور پر عدم اتفاق نہیں ہے لیکن میزبان ملک کی پالیسیوں پر سفارتکاروں کی اپنی حدود ہوتی ہیں۔