افغانستان میں طالبان حکومت کی جانب سے خواتین کے لیے یونیورسٹیز کے دروازے بند کرنے پر اُنہیں عالمی سطح پر شدید تنقید کا سامنا ہے۔
امریکہ، پاکستان، برطانیہ، قطر اور اقوامِ متحدہ سمیت انسانی حقوق کی عالمی تنظیموں نے طالبان کے اس اقدام پر تشویش کا اظہار کیا ہے۔
وائس آف امریکہ افغان سروس کے مطابق طالبان نے نجی اور سرکاری جامعات کے داخلی راستوں پر اضافی سیکیورٹی تعینات کر دی ہے، تاکہ پابندی کے باوجود یونیورسٹیز میں داخلے کی کوشش کرنے والی طالبات کو روکا جا سکے۔
ایک طالبہ نے نام ظاہر نہ کرنے کی شرط پر وائس آف امریکہ کو بتایا کہ درجنوں طالبان جنگجوؤں نے اُن سمیت دیگر طالبات کو کابل یونیورسٹی کیمپس میں داخلے سے روک دیا۔
طالبان کی وزارتِ تعلیم نے منگل کو ایک حکم نامہ جاری کر کے جامعات سمیت اعلیٰ تعلیم کے دیگر تعلیمی اداروں میں تاحکم ثانی طالبات کو داخل ہونے سے روک دیا تھا۔
افغانستان میں طالبان نے خواتین پر جامعات کے دروازے بھی بند کردیے ہیں۔ طالبان نے نجی و سرکاری جامعات کے داخلی راستوں پر اضافی نفری تعینات کر رکھی ہے تاکہ یونیورسٹیوں میں داخلے کی کوشش کرنے والی طالبات کو روکا جا سکے۔ #VOAUrdu #Afghanistan pic.twitter.com/k4m6ry62eJ
— VOA Urdu (@voaurdu) December 21, 2022
امریکہ، پاکستان اور انسانی حقوق کی تنظیموں سمیت اقوامِ متحدہ کا اظہارِ تشویش
انسانی حقوق کی تنظیم ہیومن رائٹس واچ نے طالبان کے اس اقدام کی شدید مذمت کرتے ہوئے کہا کہ طالبان کا یہ شرمناک اقدام ہے جو افغانستان میں خواتین کو تعلیم کے بنیادی حق سے محروم کر دے گا۔
ہیومن رائٹس واچ نے اپنے بیان میں کہا ہے کہ طالبان آئے روز اپنے اس نوعیت کے اقدامات سے یہ ثابت کر رہے ہیں کہ وہ افغان عوام بالخصوص خواتین کے حقوق کا احترام نہیں کر رہے۔
پاکستان نے بھی طالبان حکومت کے اس اقدام پر تشویش کا اظہار کرتے ہوئے زور دیا ہے کہ طالبان خواتین کو جامعات جانے سے روکنے کے فیصلے پر نظرِ ثانی کریں۔
🔊: PR NO. 5️⃣6️⃣4️⃣/2️⃣0️⃣2️⃣2️⃣Pakistan urges Afghan authorities to revisit the decision to suspend university and higher education for female students in Afghanistan🔗⬇️https://t.co/QBnrQh9K2q pic.twitter.com/ohiJ5eztUi
— Spokesperson 🇵🇰 MoFA (@ForeignOfficePk) December 21, 2022
قطر نے بھی طالبان حکومت کے اس اقدام پر مایوسی کا اظہار کیا ہے۔
خیال رہے کہ قطر وہ ملک ہے جس نے افغان طالبان کو اپنے دارالحکومت دوحہ میں اپنا سیاسی دفتر قائم کرنے کی اجازت دی تھی جب کہ امریکہ اور طالبان کے درمیان مذاکرات کے کئی ادوار بھی یہاں ہوئے تھے۔
Statement | Qatar Expresses Deep Concern, Disappointment over Decision to Suspend Study of Girls, Women in Afghanistan%27s Universities#MOFAQatar pic.twitter.com/pE65ghWLbu
— Ministry of Foreign Affairs - Qatar (@MofaQatar_EN) December 21, 2022
امریکہ کے اقوام متحدہ میں ڈپٹی سفیر رابرٹ ووڈ نے ایک بیان میں کہا کہ ’’طالبان بین الاقوامی برادری کے باضابطہ رکن بننے کی توقع تب تک نہیں کر سکتے جب تک وہ تمام افغان شہریوں، خصوصاً خواتین اور لڑکیوں کے انسانی حقوق اور بنیادی آزادیوں کا احترام نہیں کرتے۔‘‘
اقوامِ متحدہ کے سیکریٹری جنرل کے ترجمان نے ایک بیان میں کہا کہ سیکریٹری جنرل کو افغان طالبان کی جانب سے خواتین کو یونیورسٹیز میں جانے سے روکنے پر تشویش ہے۔
Secretary-General @antonioguterres deeply alarmed by news reports that the Taliban have suspended access to universities to women and girls. Full statement: https://t.co/4mRxlpJ2rb
— UN Spokesperson (@UN_Spokesperson) December 21, 2022
اُن کا کہنا تھا کہ خواتین کی تعلیم کا راستہ روکنا نہ صرف ان کے حقوق کی پامالی ہے بلکہ ملک کے مستقبل پر بھی اس کے بھیانک اثرات مرتب ہوں گے۔
افغانستان میں برطانیہ کے ناظم الامور ہوگو شارٹر نے بھی طالبان حکومت کے اس اقدام کی مذمت کی ہے۔
اپنی ٹوئٹ میں اُن کا کہنا تھا کہ یہ افغان عوام ملک کی معاشی صورتِ حال اور استحکام کے لیے بڑا دھچکہ ہے۔
The UK strongly condemns this latest move by the Taliban. A serious blow to #Afghanistan%27s people, economic prospects, and stability. 🇬🇧 will continue to work with all partners to support Afghan women & girls. https://t.co/WHzmp6jl5K
— Hugo Shorter (@HugoShorter) December 20, 2022
طالبان حکمرانوں کی جانب سے یونیورسٹی کی تعلیم تک خواتین کی رسائی روکنے کے اقدام کی مذمت کرتے ہوئے اپنے ایک بیان میں کہا ہے کہ ’’ ہم افغانستان میں خواتین اور لڑکیوں کی تعلیم کے حق پر اس نئے حملے کی مذمت کرتے ہیں۔ خواتین پر یونیورسٹیوں کے دروازے بند کرنا غلط جانب ایک بڑا قدم ہے جو خواتین اور ملک کے مستقبل کو تباہ کر دے گا۔ہم طالبان حکام سے فوری طور پر یہ اور اس نوعیت کی دوسری پابندیاں اٹھانے کا مطالبہ کرتے ہیں۔
اپنے بیان میں ان کا مزید کہنا تھا کہ لڑکوں اور لڑکیوں کی تعلیم کے حوالے سے افغانستان کئی دہائیوں سے مشکلات کا شکار رہا ہے۔ ملک کو ترقی دینے کے لیے ضروری ہے کہ طالبان حکام آبادی کے ہر حصے کی تعلیمی ضروریات کی ذمہ داری قبول کریں۔
ٹرنر نے بین الاقوامی برداری پر بھی زور دیا ہے کہ وہ افغانستان کے لیے انسانی اور تعلیم سے متعلق امداد کی فراہمی جاری رکھے اور طالبان کے اقدامات کی اجتماعی سزا طالب علموں اور کمزور طبقوں کو نہ دے۔
Neil Turner, Norwegian Refugee Council’s (NRC) country director in Afghanistan, condemned Taliban%27s move to ban women from universities."Closing universities to women is a giant step in the wrong direction that will devastate their futures & the future of the country," he said. pic.twitter.com/SgfuAh50b1
— Chashm News (@chashmNews_) December 21, 2022
خیال رہے کہ طالبان نے امریکہ کے ساتھ فروری 2020 میں طے پانے والے دوحہ معاہدہ میں وعدہ کیا تھا کہ وہ افغانستان میں انسانی حقوق کی پاسداری کریں گے جب کہ خواتین کی تعلیم کی بھی مخالفت نہیں کریں گے۔
گزشتہ برس اقتدار میں آنے کے بعد طالبان نے خواتین کی تعلیم پر پابندیاں عائد کرتے ہوئے پہلے لڑکیوں کے لیے سیکنڈری اسکولز بند کیے جس کے بعد اب طالبات کے جامعات میں داخلے پر بھی پابندی عائد کر دی ہے۔
طالبان کی اعلیٰ تعلیم کی وزارت کے ایک بیان میں کہا گیا ہے کہ یونیورسٹیوں کے نصاب کو شریعہ کے مطابق ڈھالنے کے بعد انہیں جلد ہی دوبارہ کھول دیا جائے گا۔