پاکستان کرکٹ ٹیم کی ورلڈ کپ میں ناکام مہم کے بعد بھارت سے واپسی کے ساتھ ہی اس پر تنقید شروع ہو گئی ہے۔ لیکن ایسی ہی ایک تنقید سابق ٹیسٹ کرکٹر عبدالرزاق کو مہنگی پڑ گئی جس میں انہوں نے بالی وڈ اداکارہ ایشوریا رائے سے متعلق متنازع ریمارکس دیے۔
کراچی کے ایک مقامی ہوٹل میں ہونے والی ایک تقریب میں عبدالرزاق سمیت ان کھلاڑیوں نے شرکت کی جنہوں نے 2009 میں پاکستان کو ٹی ٹوئنٹی کا عالمی چیمپئن بنایا تھا۔
مہمانوں میں شاہد آفریدی، کامران اکمل، عمر گل اور شعیب ملک سمیت کئی کرکٹرز شامل تھے۔ البتہ ایونٹ کے بعد صرف عبدالرزاق سب کو یاد رہ گئے۔
اس تقریب میں جب سابق آل راؤنڈر سے پاکستان کرکٹ ٹیم کی حالیہ کارکردگی پر پوچھا گیا تو انہوں نے موجودہ کھلاڑیوں کی نیت پر سوال اٹھا دیا۔
بقول عبدالرزاق، 2009 میں ٹیم اس لیے ایونٹ جیتی تھی کیوں کہ کھلاڑیوں کو کپتان کی نیت صاف ہونے پر بھروسہ تھا۔ ان کے خیال میں موجودہ بورڈ کی پالیسی ہی نہیں کہ وہ کھلاڑیوں کو بنائیں، انہیں سکھائیں۔
بابر اعظم @babarazam258 کی کپتانی کو مخاطب کرتے ہوئے چیمپیئن آل راؤنڈر عبدالرزاق نے کہا کہ جب نیتیں ہی صاف نہیں تو نتیجہ کیسے اچھا آسکتا ہے۔۔عبدالرزاق نے بڑی مثال بھی دی ۔@TheRealPCBMedia pic.twitter.com/YoSx44DQjv
— ZAHID GHAFFAR (@zahidghaffar) November 13, 2023
اس موقع پر انہوں نے بھارتی سپر اسٹار ایشوریا رائے کا ذکر کرتے ہوئے کہا کہ 'اگر ہماری سوچ یہ ہے کہ ایشوریا رائے سے شادی کر کے اُن سے نیک پرہیزگار بچے کی توقع کریں تو یہ کبھی نہیں ہو سکتا۔"
عبدالرزاق نے تنقید کے بعد ایک ویڈیو بیان میں معذرت کر لی، لیکن اس سے پہلے سابق کرکٹرز اور سوشل میڈیا صارفین نے عبدالرزاق کو خوب آڑے ہاتھوں لیا۔
سابق فاسٹ بالر شعیب اختر نے سوشل میڈیا پلیٹ فارم 'ایکس' پر لکھا کہ عبدالرزاق کو اس قسم کا بیان نہیں دینا چاہیے تھا۔
ان کا کہنا تھا کہ عبدالرزاق کو اس قسم کا مذاق یا موازنہ نہیں کرنا چاہیے تھا، کسی بھی عورت کو اس طرح بے عزت نہیں کیا جا سکتا۔
I highly condemn the inappropriate joke/comparison made by Razzaq. No woman should be disrespected like this.People seated beside him should have raised their voice right away rather than laughing & clapping.
— Shoaib Akhtar (@shoaib100mph) November 14, 2023
جس وقت عبدالرزاق نے یہ کمنٹ دیا تھا، اس وقت اسٹیج پر ان کے ساتھ سابق کپتان شاہد آفریدی بھی موجود تھے جو اس کمنٹ پر اپنی ہنسی نہیں چھپا سکے تھے۔
شعیب اختر کے خیال میں اسٹیج پر بیٹھے افراد کو اس بیان کی مذمت کرنی چاہیے تھی۔
ایونٹ کے ایک دن بعد جب ایک ٹی وی شو پر شاہد آفریدی سے اس حوالے سےسوال کیا گیا تو ان کا کہنا تھا کہ رزاق کی بات ان کی سمجھ میں نہیں آئی تھی، انہیں بعد میں اندازہ ہوا کہ وہ غلط بات پر ہنس گئے۔
شاہد آفریدی کا مؤقف تھا کہ انہیں کلپ دیکھنے کے بعد بہت عجیب لگا اور وہ رزاق سے کہیں گے کہ وہ اس بیان پر معافی مانگیں۔
“Such remarks shouldn%27t have been made," asserted Shahid Afridi over Abdul Razzaq%27s statement about Aishwarya Rai; and urged him to apologize.#SamaaTV #WorldCup23 #Cricket23 #AbdulRazzaq @SAfridiOfficial @Mushy_online @yousaf1788 @umairbashirr @sawerapasha pic.twitter.com/T3cEvV96vi
— SAMAA TV (@SAMAATV) November 14, 2023
اسی شو پر موجود سابق ٹیسٹ کرکٹر مشتاق احمد نے بھی اپنے سابق ساتھی کی بات پر حیرت کا اظہار کیا اور کہا کہ سب کی عزتیں سانجھی ہیں اور اس قسم کی بیان بازی نہیں ہونی چاہیے تھی۔
سابق کپتان محمد یوسف نے بھی ایکس پر اپنا مؤقف دیتے ہوئے عبدالرزاق کے بیان کو شرمناک قرار دیا۔
ان کا کہنا تھا کہ عبدالرزاق کو فوری معافی مانگنی چاہیے۔
As a cricketer I feel sorry that Abdul Razzaq made comments about Indian actress in a media talk. I hope he will be ashamed of what he said and apologize.
— Mohammad Yousaf (@yousaf1788) November 14, 2023
عبدالرزاق کے بیان پر پاکستان اور بھارتی میڈیا نے ان پر اور ان کے ساتھ ہنسنے والوں پر تنقید کی۔
ایک خاتون صارف کے خیال میں عبدالرزاق پر عوامی سطح پر بیان دینے کی پابندی ہونی چاہیے، ایشوریا رائے یا کسی بھی خاتون کو ان کی تائید کی ضرورت نہیں۔
What is he on? 😡 #AbdulRazzaq you need a speech ban. #AishwaryaRai or any other woman does not need your validation. Get.A. Life! https://t.co/kvHc3yCOPs
— shazia saqib habib (@Shaz004) November 14, 2023
صحافی فریحہ سلطان نے عبدالرزاق کے کمنٹ پر ساتھ بیٹھے کرکٹرز کے ردِعمل کو افسوس ناک قرار دیا۔
Once again, he%27s made sexist and derogatory remarks, a recurring pattern. Disheartening to see #ShahidAfridi Afridi and #UmarGul laughing & enjoying along. Kudos to #AishwaryaRai for raising her daughter with grace; her manners stand out in stark contrast to his pic.twitter.com/13hFKoarYX
— Fareeha Sultan (@fsultan77) November 14, 2023
ایک بھارتی صارف نے عبدالرزاق کے اس کمنٹ کو انتہائی نا مناسب اور شرمناک قرار دیا۔
ایسے میں عبدالرزاق کے کچھ پرانے بیانات کو بھی شئیر کیا گیا، ایک میں وہ اسٹیج کی مشہور ڈانسر دیدار سے اپنی دوستی کا ذکر کر رہے تھے۔
اپنے ویڈیو بیان میں عبدالرزاق نے کہا کہ وہ کوئی اور مثال دینا چاہتے تھے، لیکن اُن کی زبان پھسل گئی اور ایشوریا رائے کا نام منہ سے نکل گیا جس پر وہ معذرت کرتے ہیں۔
خیال رہے کہ سابق کرکٹر عبدالرزاق کا شمار پاکستان کے بہترین آل راؤنڈرز میں ہوتا تھا۔ وہ پاکستان کے لیے 265 ایک روزہ میچز، 46 ٹیسٹ اور 32 ٹی ٹوئنٹی میچز کھیل چکے ہیں۔
وہ 1999، 2003، 2007 اور 2011 ورلڈ کپ اسکواڈز کا حصہ بھی رہ چکے ہیں۔ اس کے علاوہ وہ ٹی ٹوئنٹی ورلڈ کپ کے 2009، 2010 اور 2012 ایڈیشنز میں پاکستان کی نمائندگی کر چکے ہیں۔