افغانستان شاہرہ ریشم کے ذریعے چین کے ساتھ تجارت کرنا چاہتا ہے: طالبان وزیر
افغانستان میں طالبان حکومت کے وزیر نورالدین عزیزی نے کہا ہے کہ واخان راہداری یا شاہراہ ریشم چین اور افغانستان کے درمیان تجارت کی سطح کو بڑھا سکتی ہے اور سامان کی آمدورفت کے لیے ایک قابل اعتماد راستہ بن سکتی ہے۔
عزیزی نے کہا کہ امارت اسلامیہ افغانستان نے اس راہداری کو کھولنے کے لیے اپنی تیاریوں کا اعلان کیا ہے اور عوامی جمہوریہ چین کے حکام سے کہا ہے کہ وہ اس راستے کو کھولنے کے عمل کو تیز کریں۔
انہوں نے یہ بات منگل کو چین میں ایک نمائش کے آن لائن افتتاح کے موقع پر گفتگو کرتے ہوئے کہی۔
ایک اور خبر کے مطابق افغانستان کے صحافیوں کے مرکز کی طرف سے جاری ہونے والے ایک بیان میں بتایا گیا ہے کہ ننگرہار کے صوبائی حکام کے ممکنہ طور پر بدعنوانی میں ملوث ہونے کی رپورٹ دینے پرحمیشا بہار ایف ایم ریڈیو کے منیجر اتل ستانکزئی کو گرفتار کر لیا گیا ہے ۔
حمیشا بہار ایف ایم ریڈیو نے اپنے براڈکاسٹنگ منیجر اتل ستانکزئی کی گرفتاری کی تصدیق کی ہے۔
جرمنی کا یوکرین کو 350 جنریٹر فراہم کرنے کا اعلان
ایجنسی فرانس پریس نے رپورٹ کیا ہے کہ جرمنی یوکرین کو350 سے زیادہ جنریٹر فراہم کرے گا۔
ایک حکومتی ترجمان نے منگل کو کہا کہ روسی میزائل حملوں کے بعد یوکرین کے توانائی کے بنیادی ڈھانچے کو شدید نقصان پہنچا ہے۔
حکومت کے ترجمان اسٹیفن ہیبسٹریٹ نے کہا کہ چانسلر اولاف شولز نے یوکرین کے صدر ولادیمیر زیلنسکی سے بات کی اور کہا کہ جرمنی جنریٹر بھیجے گا اور اس کےساتھ توانائی کے بنیادی ڈھانچے کی مرمت کے لیے57 ملین ڈالر کی مالی امداد فراہم کرے گا۔
خبر رساں ادارے رائٹرز کے مطابق پولینڈ حکومت نے منگل کو کہا ہے کہ ان کا ملک یوکرینی پناہ گزینوں کو چار ماہ قیام کرنے کے بعد ان سے خوراک اور رہائش کا معاوضہ لینے کا ارادہ رکھتا ہے۔
24 فروری کو روس کے یوکرین پر حملے کے بعد دس لاکھ سے زیادہ یوکرینی پناہ گزینوں نے مغربی پڑوسی ملک پولینڈ میں عارضی طور پر قیام پذیر ہیں جنہیں پولینڈ کی حکومت اور عوام امداد فراہم کر رہے تھے۔
رپورٹ میں بتایا گیا ہے کہ اب تارکین وطن کے لیے وسائل کم ہو رہے ہیں اورپناہ گزینوں کورہائش تلاش کرنے اور پولینڈ سے مدد حاصل کرنے میں مشکل کا سامنا کرنا پڑ رہا ہے ۔
رپورٹ میں مزید کہا گیا ہے کہ پناہ گزینوں کو روز مرہ ضروریات کی بڑھتی ہوئی قیمتوں کے بحران اور بجٹ کے دباؤ کا سامنا ہے۔
طالبان حکومت کے تحت پہلی بین الاقوامی تجارتی نمائش
طالبان حکومت کابل میں چھ سو سے زائد ملکی اور غیر ملکی کمپنیوں کی شرکت کے ساتھ پہلی بین الاقوامی تجارتی نمائش "امام ابو حنیفہ" کا انعقاد کر رہی ہے۔
یہ نمائش آج کابل کے بین الاقوامی نمائشی مرکز میں شروع ہو رہی ہے ۔
افغانستان چیمبر آف کامرس اینڈ انویسٹمنٹ کے زیر اہتمام یہ نمائش آٹھ روز جاری رہے گی
افغانستان:سمنگان میں مدرسے پر حملے کی مذمت
امریکی حکام نے صوبہ سمنگان کے صوبائی دارالحکومت ایبک میں ایک دینی مدرسے میں طلباء کے قتل کی مذمت الگ الگ ٹویٹس میں کی ہے۔
افغانستان کے لیے امریکہ کے خصوصی نمائندے تھامس ویسٹ نے ایک ٹویٹ میں کہا کہ آج صبح سمنگان سے خوفناک خبر آئی۔ مدرسے پر حملے میں ہلاک اور زخمی ہونے والوں میں بچے بھی شامل ہیں۔ امریکہ معصوم شہریوں کے خلاف اس حملے کی مذمت کرتا ہے۔ تمام افغان بچوں کو بلا خوف سکول جانے کا حق ہے۔
افغانستان میں خواتین اور انسانی حقوق کے لیے امریکی دفتر خارجہ کی نمائندہ رینا امیری نے بھی دھماکے کو دل دہلا دینے والا قرار دیا۔
دوحہ میں امریکی سفارت خانے کی چارج ڈی افیئرز کیرن ڈیکر نے بھی کہا کہ وہ سمنگان میں مدرسے پر ہونے والے نفرت انگیز حملے کی مذمت میں شامل ہیں ۔ افغان بچوں کی پرورش اور حفاظت کی جانی چاہیے۔ ہمیں اپنے بچوں کی زندگیوں سے دہشت کا خاتمہ کرنا ہوگا۔