یوکرین: دنیا روس کے فضائی حملوں کے خلاف کارروائی کرے
یوکرینی حکام دنیا سے مطالبہ کر رہے ہیں کہ وہ روس کی جانب سے یوکرین کے شہری بنیادی ڈھانچے کو نشانہ بنانے والے فضائی حملوں کے خلاف کارروائی کرے۔
یوکرین کے وزیر خارجہ دیمیٹرو کولیبا نے جمعرات کو ٹویٹ کیا کہ روس غیر مسلح شہریوں کے خلاف انتہائی بزدلانہ اور وحشیانہ جنگ جاری رکھے ہوئے ہے۔
ان کے اس بیان سے پہلے صدر ولادیمیر زیلنسکی ویڈیو کے ذریعے اقوام متحدہ کی سلامتی کونسل کے سامنے آئے اور کہا کہ روسی میزائلوں نے اسپتالوں، اسکولوں، نقل و حمل کے اہداف اور رہائشی علاقوں کو نشانہ بنایا۔
زیلنسکی نے کہا کہ یوکرین دنیا کی طرف سےانتہائی سخت ردعمل کا منتظر ہے۔
اقوام متحدہ میں روس کے سفیر واسیلی نیبنزیا نے یوکرین اور اس کے مغربی حامیوں کی طرف اس بیان کو غیر محتاط دھمکیاں اور الٹی میٹم قرار دیتے ہوئے مسترد کر دیا۔
چین میں کرونا وائرس کے کیسز بڑھنے لگے، سخت حفاظتی پابندیاں نافذ
چین میں سرکاری اعداد و شمار کے مطابق کوویڈ کے کیسز وبا کے آغاز کے بعد د اس کے باوجود دوبارہ بڑھ گئے ہیں جب کہ حکومت نے کرونا وائرس کے پھیلاؤ پر کنٹرول کے لیے سخت لاک ڈاؤن اور سفری پابندیوں پر مشتمل زیرو ٹالرینس کی پالیسی اپنارکھی ہے ۔
چین کی ایک ارب 40 کروڑ کی بڑی آبادی اور وبا کے عروج کے زمانے میں مغربی ممالک میں ہونے والے کیسز کے مقابلے میں موجودہ کیسز کی تعداد نسبتاً کم ہےلیکن بیجنگ کی کووڈ کے خلاف سخت پالیسی کے تحت کیسز میں معمولی اضافے سے بھی پورے شہر بند ہو سکتے ہیں اور متاثرہ مریضوں کو سخت قرنطینہ میں رکھا جا سکتا ہے۔
چین کے نیشنل ہیلتھ بیورو نے کہا کہ بدھ کے روز ملک میں 31,454کیسز ریکارڈ کیے گئے جن میں سے 27,517 افراد میں مرض کی علامات کے بغیر ہیں ۔
کووڈ کے لیے انتہائی سخت پالیسی کی وجہ سے آبادی کے بڑے حصے میں تھکاوٹ اور ناراضی پائی جاتی ہے کیونکہ وہ لگ بھگ تین برسوں سے انہیں ان پابندیوں کا سامنا کرنا پڑ رہا ہے ۔ چین کی ا س پالیسی کے خلاف گاہے گاہے مظاہرے ہوتے ہیں اور دنیا کی دوسری سب سے بڑی معیشت کی پیداواری صلاحیت کو نقصان پہنچا ہے۔
طالبان خواتین کے خلاف تشدد روکنے اور حقوق کی فوری فراہمی کے اقدامات کریں: اقوام متحدہ
اقوام متحدہ نے افغانستان میں حکام سے مطالبہ کیا ہے کہ وہ بامعنی اور پائیدار امن کے قیام کی کوششوں کے ایک اہم حصے کے طور پر خواتین کے خلاف تشدد اور خواتین کے حقوق کو پہنچنے والے نقصان کے خاتمے کے لیے فوری اقدامات کریں۔
یہ مطالبہ ایک ایسے وقت پر کیا گیا ہے جب دنیا میں خواتین کے خلاف تشدد کے خاتمے کے عالمی دن اور صنفی بنیاد پر تشدد کے خلاف عالمی 16 روزہ پرگراموں کا آغاز ہو رہا ہے۔
افغانستان میں 2021 کے موسم گرما کے بعد سے خواتین نے اپنے بہت سے بنیادی حقوق کو محدود یا منسوخ پایا ہے اور یہ سطح دنیا بھر میں خواتین کے خلاف تشدد کی سب سے زیادہ شرح رکھنے والے ملکوں میں نمایاں ہے۔
افغان خواتین کوصنفی بنیادوں پر تشدد سے بچ جانے والوں کے لیے مربوط، جامع اور معیاری خدمات تک رسائی میں بھی واضح بگاڑ کا سامنا ہوا ہے ۔
صنفی بنیاد پر تشدد کے خلاف 16 روزہ سرگرمی ایک سالانہ بین الاقوامی مہم ہے جو 25 نومبر سے شروع ہوتی ہے اور 10 دسمبر کو انسانی حقوق کے عالمی دن تک جاری رہتی ہے۔ اس کا مقصد آگاہی بڑھانے اور صنفی بنیاد پر تشدد کو ہر جگہ ختم کرنے کے لیے عالمی اقدام کا مطالبہ کرناہے۔
روسی تیل کی قیمت کی حد مقرر کرنے کا عمل جاری ہے: صدر بائیڈن
امریکی صدر جو بائیڈن نے جمعرات کے روز کہا کہ گروپ آف سیون ممالک (جی 7) کی اسکیم کے تحت تجویز کیے جانے والے روسی تیل کی قیمت کی حد کا تعین کرنے کاعمل جاری ہے۔
انہوں نے مزید کہا کہ انہوں نے اس معاملے پر وزیر خزانہ جینٹ ییلن سے بات کی ہے۔خبر رساں ادارے رائٹرز کی اطلاع کے مطابق صدر بائیڈن نے اس بارے میں تھینکس گیونگ کی چھٹیوں کے دوران نانٹکیٹ جزیرے پر ایک فائر اسٹیشن کے دورے کے دوران صحافیوں کو بتایا۔
یورپی یونین کی حکومتیں روسی سمندر سے حاصل ہونے والے تیل کی قیمتوں کو محدود کرنے کے لیے کسی معاہدے تک پہنچنے میں ناکامی کے بعد دوبارہ مذاکرات شروع کرنے والی تھیں۔
بائیڈن انتظامیہ قیمت کی حد کے تعین کو روس کے لیے تیل کی آمدنی کو کم کرنے کے ایک اقدام کے طور پر دیکھتی ہے جو یوکرین کے خلاف اس کی جنگ کے لیے مالی اعانت کا ایک بڑا ذریعہ ہے۔
امریکہ سمیت جی سیون ممالک ، یورپی یونین اور آسٹریلیا پانچ دسمبر کو روسی تیل کی سمندری برآمدات پر قیمت کی حد لاگو کرنے کے لیے تیار ہیں۔