سترہ سالہ رتھرفورڈ تنہا دنیا بھر کا چکر لگانے والے پائلٹ بن گئے

ایک 17 سالہ پائلٹ بلغاریہ میں لینڈنگ کے بعد ایک چھوٹے طیارے میں تنہا دنیا کا چکر لگانے والا کم عمر ترین شخص بن گیا ہے۔ یہ وہ ملک ہے جہاں پانچ ماہ قبل میک رتھر فورڈ نے اپنا سفر شروع کیا تھا۔ رتھر فورڈ بدھ کے روز اپنے کام کو مکمل کرنے اور دو گنیز ورلڈ ریکارڈز کا دعویٰ کرنے کے لیے بلغاریہ کے دارالحکومت صوفیہ کے مغرب میں ایک ہوائی پٹی پر اترے۔

ایسو سی ایٹڈ پریس کے مطابق رتھر فورڈ اب ایک مائیکرو لائٹ طیارے میں دنیا کا چکر لگانے والے سب سے کم عمر شخص بھی ہیں ۔

23 مارچ کو شروع ہونے والے اس سفر میں رتھر فورڈ پانچ بر اعظموں پر 52 ملکوں سے گزرے ۔ وہ اس ٹرپ کے دوران 17 برس کے ہوئے۔

ہوا بازوں کے ایک خاندان میں پیدا ہونے والے رتھر فورڈ نے 2020 میں اپنے پائلٹ لائسنس کے لیے کوالی فائی کیا اور یوں وہ 15 سال کی عمر میں دنیا کے سب سے کم عمر پائلٹ بن گئے ۔

رتھر فورڈ نے کہا کہ انہیں امید ہے کہ ان کی کامیابی نوجوانوں کو اپنے خواب پورےکرنے کی ترغیب دے گی۔ نوجوان کے پاس بیلجیئم اور برطانیہ کی شہریت ہے ۔

کووڈ۔19 کے نئے کیسز میں 15 فی صد کمی

عالمی ادارہ صحت نے کہا ہے کہ گزشتہ ہفتے دنیا بھر میں کورونا وائرس سے ہونے والی رپورٹ کی گئِی تعداد میں 15 فیصد کمی ہوئی جب کہ نئے واقعات کی تعداد نو فیصد کم ہوئی۔

کویڈ۔ 19 کے بارے میں اپنے تازہ ترین ہفتے وارجائزے میں اقوام متحدہ کے ادارے نے کہا کہ گزشتہ ہفتے 53 لاکھ نئے کیس سامنے آئے اور 14 ہزار اموات واقع ہوئیں۔

ڈبلیو ایچ او نے کہا کہ انفیکشن کے نئے کیسز کی تعداد میں مغربی پیسیفک کے علاقے کے سوا دنیا بھر میں ہر جگہ کمی واقع ہوئی ۔ افریقہ میں اموات کی تعداد میں 183 فیصد اضافہ ہوا، لیکن یورپ میں لگ بھگ ایک تہائی اور بر اعظم امریکہ میں 15 فیصد کمی ہوئی ۔

تاہم ڈبلیو ایچ او نے خبردار کیا ہے کہ ممکن ہے کہ کویڈ۔ 19 کے واقعات کی تعداد کو امکانی طور پر بہت زیادہ گھٹا کر بیان کیا گیا ہو کیوں کہ بہت سے ملکوں نے وائرس کی ٹسٹنگ اور اس کی مانیٹرنگ کے لیے نگرانی کے پروٹوکولز ختم کر دیے ہیں ، اس کا مطلب یہ ہے کہ اب پہلے سے کم کیسز کا پتہ چلایا جارہا ہے۔

امریکہ میں ایک وفاقی جیوری نے نیشنل باسکٹ بال کے سٹار کوبی برائنٹ کی موت کا سبب بننے والے حادثے کے فوراً بعد امدادی کارکنوں کی طرف سے تصاویر شئیر کیے جانے پر لاس اینجلس کاونٹی کو 16 ملین یعنی ایک کروڑ ساٹھ لاکھ ڈالر متاثرہ خاندان کو ادا کرنے کا فیصلہ سنایا ہے۔

نیشنل بیس بال سٹار اور ان کی بیٹی سال 2020 میں ہیلی کاپٹر کے حادثے میں ہلاک ہو گئے تھے اور کوبی برائنٹ کی بیوہ نے مقدمہ دائر کر رکھا تھا کہ کاونٹی کے فائر فائٹرز اور عہدیداروں کی طرف سے نعشوں کی جو تصاویر شئر کی گئیں، اس سے ان کو جذباتی طور پر شدید ٹھیس پہنچی ہے۔

جیوری میں شامل دو شخصیات نے، جنہوں نے بدھ کے روز یہ فیصلہ حوالے کیا، وینیسا برائنٹ کے موقف کو درست تسلیم کیا کہ جب کوبی اور ان کی 13 سالہ بیٹی جینا کی تصاویر بنائی گئیں تو اس سے ان کی پرائیویسی بھی متاثر ہوئی۔

گیارہ روزہ ٹرائل میں وینیسا برائنٹ اپنے وکیل کے ساتھ پیش ہوتی رہیں اور انہوں نے موقف اختیار کیا کہ اپنے شوہر اور بیٹی کو کھونے کے بعد ان کے سامنے جو تصاویر آئیں، ان سے ان کے غم کی شدت میں کہیں زیادہ اضافہ ہو گیا۔

کاونٹی کے وکیل کا موقف تھا کہ یہ تصاویر بنانا اس لیے ضروری تھیں کہ وقوعے کا تجزیہ کیا جا سکے۔

شنزو آبے کا قتل، جاپان کے نیشنل پولیس کمشنر مستعفی ہو گئے

جاپان کے نیشنل پولیس کمشنر نے سابق وزیراعظم شنزوآبے کی جولائی میں قاتلانہ حملے میں ہلاکت کے پس منظر میں جمعرات کو اپنے عہدے سے استعفیٰ دے دیا ہے۔

ٹوکیو میں ایک نیوز کانفرنس میں اتارو ناکاموار نے آئندہ ماہ شنزو آبے کی سرکاری سطح پر آخری رسومات اور آئندہ مئی میں جی سیون ممالک کے اجلاس کا حوالہ دیتے ہوئے صحافیوں کو بتایا کہ اس ضمن میں سکیورٹی منصوبوں کی ضرورت ہے تاکہ کسی ناخوشگوار واقعہ سے بچا جا سکے۔

جاپان کے راہنما شنزو آبے کو آٹھ جولائی کو مغربی شہری نارا میں ایک انتخابی مہم کے دوران ایک حملہ آور نے گھریلو ساختہ بندوق سے فائرنگ کر کے ہلاک کر دیا تھا۔ مشتبہ حملہ آور ٹیسویا یاماگامی کو فائرنگ کے فوراً بعد گرفتار کر لیا گیا تھا اور ملزم کی نفسیاتی صحت کا جائزہ لیا جا رہا ہے۔

ماہرین کہہ چکے ہیں کہ ملزم کی طرف سے نشانے سے چوکنے والی پہلی گولی اور اس کے بعد دوسری گولی کے درمیان کے اڑھائی سیکنڈ کے وقفے میں باڈی گارڈز شنزوآبے کے گرد حلقہ بنا سکتے تھے یا ان کو کھینچ کر حملہ آورکے نشانے سے ہٹا سکتے تھے۔

جاپان کے نیشنل پولیس چیف کے استعفی کے بعد توقع کی جا رہی ہے کہ پولیس کے تین اعلی عہدیداروں کو انضباطی کاروائی کا سامنا کرنا پڑ سکتا ہے۔ ناکا مورا کے استعفیٰ پر غوروخوض کابینہ کے آئندہ اجلاس میں ہو گا