اٹلانٹا: فائرنگ کے واقعات میں دو افراد ہلاک، ایک مشتبہ خاتون گرفتار
پولیس نے پیر کو اٹلانٹا کے بین الاقوامی ہوائی اڈے سے ایک مشتبہ خاتون کو گرفتار کیا، جس سے شہر کے مرکز میں ہونے والی اس فائرنگ کے بعد ایک گھنٹے پر محیط تلاشی ختم ہو گئی۔ فائرنگ کے واقعات میں دو افراد ہلاک اور ایک زخمی ہوگیا تھا۔
اٹلانٹا پولیس ڈیپارٹمنٹ نے کہا کہ وہ یہ تعین کرنے کی کوشش کر رہا ہے کہ آیا مشتبہ خاتون نے متاثرین کو ہدف بنایا تھا یا اتفاقیہ طور پر گولی ماری تھی ۔
پولیس نے بتایا کہ تقریباً دوپہر ایک بجکر 45 منٹ پر فائرنگ کی ایک رپورٹ پر کارروائی کے دوران اسے اٹلانٹا کے مڈ ٹاؤن علاقے میں ایک دفتر اور شاپنگ کمپلیکس کالونی اسکوائر کے قریب ایک رہائشی عمارت میں دو متاثرہ افراد ملے جن میں سے ایک مر چکا تھا جبکہ دوسرے کو اسپتال لے جایا گیا۔
پولیس کے مطابق پہلے ایک بلند و بالا دفتر کی عمارت میں فائرنگ کے متعلق ایک کال موصول ہوئی، جہاں پولیس کو تیسرا متاثرہ شخص ملا۔ اس شخص کو بھی بظاہر گولی ماری گئ تھی اور وہ بعد میں اسپتال پہنچنے پ دم توڑ گیا۔
پولیس دونوں مقامات کے درمیان کسی تعلق کے بارے میں تفتیش کر رہی ہے ۔ اس کا کہنا ہے کہ ابتدائی معلومات سے ظاہر ہوا ہے کہ ایک مشتبہ خاتون دونوں واقعات کی ملوث تھی۔
روس یوکرین جنگ میں ایک ہزار بچے ہلاک یا زخمی ہوئے ہیں، اقوام متحدہ
اقوام متحدہ کے بچوں کے امور سے متعلق ادارے یونیسیف کا کہنا ہے کہ لگ بھگ چھ ماہ قبل یوکرین پر روسی حملے کے بعد سے یوکرین کے تقریباً ایک ہزار بچے ہلاک یا زخمی ہو چکے ہیں۔
پیر کے روز یونیسیف نے کہا کہ کم از کم جن 972 بچوں کے ہلاک یا زخمی ہونے کی تعداد صرف ان کی نمائندگی کرتی ہےجن کی اقوام متحدہ نے تصدیق کی ہے اور یہ اصل تعداد اس سے کہیں زیادہ ہو سکتی ہے۔
یونیسیف کی ایکزیکٹیو ڈائریکٹر کیتھرین رسل کے ایک بیان کے مطابق زیادہ تر ہلاکتیں دھماکہ خیز ہتھیاروں سے ہوئیں۔
انہوں نے لکھا،" ایک بار پھر، جیسا کہ تمام جنگوں میں ہوتا ہے ، بالغوں کے غیر زمہ دارانہ فیصلے بچوں کو شدید خطرے میں ڈال رہے ہیں۔ اس قسم کا کوئی ایسی کارروائی نہیں ہوتی جس کےنتیجے میں بچوں کو نقصان نہ پہنچے ۔"۔
رسل نے کہا کہ جو بچے تشدد میں ہلاک یا زخمی ہوئے ان کے علاوہ یوکرین کا تقریباً ہر بچہ انتہائی مایوس کن حالت سے گزرا ہے ، اور وہ جو تشدد سے بچ کر فرار ہو رہے ہیں انہیں خاندان سے جدائی، تشدد،بد سلوکی، جنسی استحصال اور انسانی اسمگلنگ کا نمایاں خطرہ لاحق ہے ۔
یونیسیف نے گنجان آباد علاقوں میں دھماکہ خیز ہتھیاروں کے استعمال اور شہری تنصیبات اور انفرا اسٹرکچر ہر حملے بند کرنے کا مطالبہ کیا ۔
یوکرین کی حکومت روس پر دانستہ طور پر عام شہریوں کو ہدف بنانے کا الزام عائد کر چکی ہے ، جس کی ماسکو تردید کرتا ہے ۔
یوکرین سے دو بحری جہاز 30 ہزارٹن اناج لے کر مصر روانہ
ترکی یوکرین کی بندر گاہوں میں پھنسے اناج کو کی ترسیل کے معاہدے کی ثالثی میں اپنی حالیہ کامیابی کو روس کے ساتھ قریبی تعلقات برقرار رکھنے کی ایک اچھی وجہ قرار دے رہا ہے ۔ یہ تعلقات مزید گہرے ہو رہے ہیں کیونکہ روسی صدر ولادی میر پوٹن ترکی کے رہنما رجب طیب اردوان کو اگلے ماہ روس چین سیکیورٹی اتحاد کے اجلاس میں شرکت کی دعوت دی ہے۔
پیر کو دو اور بحری جہاز یوکرین سے 30,000 میٹرک ٹن اناج لے کر مصر کے لیے روانہ ہوئے۔
جولائی میں ترکی کے روس اور یوکرین کے ساتھ اقوام متحدہ کی ثالثی میں ہونے والے معاہدے کے بعد سے یوکرین کی بندرگاہوں سے 600,000 میٹرک ٹن سے زیادہ اناج برآمد کیا جا چکا ہے۔ ہفتے کے روز، اقوام متحدہ کے سیکرٹری جنرل انٹونیو گوئٹریس نے اردوان کے ہمراہ استنبول میں قائم کردہ رابطہ مرکز کا دورہ کیا۔
گوئٹریس نے ایک پریس کانفرنس سے خطاب کرتے ہوئے اناج کے معاہدے کی اہمیت کی از سر نو تصدیق کی۔
روس یوکرین میں سویلین ڈھانچے اور حکومتی تنصیبات کو نشانہ بنا سکتا ہے، امریکہ کی اپنے شہریوں کو کیف سے نکلنے کی ہدایت
امریکہ نے منگل کے روز خبردار کیا ہے کہ روس آئندہ دنوں میں یوکرین کے اندر سویلین انفراسٹرکچر اور حکومتی تنصیبات کو نشانہ بنانے کے لیے کوششیں تیز کر رہا ہے۔
یہ پیغام کیف میں امریکہ کے سفارتخانے کی طرف سے پوسٹ کیا گیا ہے۔ اسی طرح کا انتباہ یوکرین کے صدر ولادیمیر زولینسکی بھی جاری کر چکے ہیں کہ روس کی جانب سے ملک کے یوم آزادی پر ایسا کوئی اقدام ہو سکتا ہے۔
امریکی سفارتخانے نے اپنی پوسٹ میں لکھا ہے۔
’’ یوکرین کے اندر روس کے حملے عام شہریوں، سویلین کے انفراسٹرکچر کے لیے مسلسل خطرہ ہیں۔‘‘
سفارخانے نے مزید لکھا ہے کہ یوکرین میں موجود امریکی شہری، اگر جا سکتے ہیں تو واپس چلے جائیں۔
بدھ کو یوکرین سوویت حکمرانی سے آزادی کی 31 ویں سالگرہ منا رہا ہے۔ ساتھ ساتھ روس کے یوکرین پر حملے کو چھ ماہ مکمل ہو رہے ہیں۔ کیف نے انہی خطرات کے پیش نظر یوم آزادی کے جشن کو منسوخ کر دیا ہے۔