جو بائیڈن کی حکومت سازی کی تیاریاں
امریکہ کے صدارتی انتخابات کے غیر حتمی و غیر سرکاری نتائج کے مطابق جو بائیڈن امریکہ کے 46 ویں صدر کے طور پر سامنے آئے ہیں۔ موجودہ صدر ڈونلڈ ٹرمپ انتخابات کے غیر سرکاری نتائج قبول کرنے سے انکاری ہیں جب کہ جو بائیڈن کی ٹیم حکومت سنبھالنے کی تیاریاں کر رہی ہے۔ تفصیلات جانتے ہیں اس ویڈیو میں۔
صدر ٹرمپ نے وزیرِ دفاع مارک ایسپر کو عہدے سے ہٹا دیا
امریکہ کے صدر ڈونلڈ ٹرمپ نے وزیرِ دفاع مارک ایسپر کو عہدے سے فارغ کر دیا ہے۔
صدر ٹرمپ نے پیر کو اپنے ایک ٹوئٹ کے ذریعے مارک ایسپر کو عہدے سے ہٹانے کے بارے میں بتایا اور کہا کہ وہ ان کی خدمات کے مشکور ہیں۔
صدر ٹرمپ نے انتہائی اہم وزارت پر فائز عہدے دار کو بذریعہ ٹوئٹ ایسے موقع پر ہٹایا ہے جب اُنہیں انتخابات میں ناکامی کا چیلنج درپیش ہے۔
امریکی صدارتی انتخابات کے غیر حتمی و غیر سرکاری نتائج کے مطابق جو بائیڈن امریکہ کے 46ویں صدر منتخب ہو گئے ہیں تاہم صدر ٹرمپ نے انتخابی ناکامی تسلیم کرنے سے انکار کر دیا ہے۔
'جو بائیڈن اور پاکستان ایک دوسرے کو سمجھتے ہیں'
امریکہ کے صدارتی انتخابات کے غیر حتمی و غیر سرکاری نتائج کے مطابق جو بائیڈن ملک کے نئے صدر منتخب ہوئے ہیں۔ جنوری 2021 میں ممکنہ طور پر حلف اٹھانے کے بعد بائیڈن انتظامیہ کے پاکستان کے ساتھ تعلقات کیسے ہوں گے؟ جانتے ہیں لامار یونیورسٹی کے اسسٹنٹ پروفیسر ڈاکٹر اویس سلیم اور تجزیہ کار ڈاکٹر مدیحہ افضل سے۔
ٹوئٹر کا دورِ صدارت کے بعد ٹرمپ کو حاصل مراعات ختم کرنے کا عندیہ
سماجی رابطے کے پلیٹ فارم ٹوئٹر کا کہنا ہے کہ غیر حتمی نتائج کے مطابق نو منتخب امریکی صدر جو بائیڈن کے عہدہ سنبھالنے کے بعد موجودہ امریکی صدر ڈونلڈ ٹرمپ کو حاصل خصوصی مراعات ختم کی جا سکتی ہیں۔
صدر ٹرمپ کی جانب سے امریکی انتخاب کے متعلق حالیہ دنوں میں کی جانے والی متعدد ٹوئٹس پر ٹوئٹر نے انتباہی نوٹس لگائے تھے جن میں صدر ٹرمپ نے انتخابات میں بڑے پیمانے پر دھاندلی اور الیکشن فراڈ کے دعوے کیے تھے۔
عام طور پر ٹوئٹر ایسی ٹوئٹس کو اپنے پلیٹ فارم سے ہٹا دیتا ہے مگر عالمی رہنماؤں کی ٹوئٹس ہٹانے کے بجائے انتباہی لیبل لگا دیا جاتا ہے۔
ٹوئٹر کے ایک ترجمان نے خبر رساں ایجنسی 'بلو مبرگ نیوز' سے بات کرتے ہوئے کہا کہ ’’ہمارے پلیٹ فارم کا ایک اہم کام یہ ہے کہ لوگ عوامی سطح پر کھل کر اپنے رہنماؤں کا احتساب کر سکیں۔ اسی لیے عوام کے مفاد میں ہم بعض ٹوئٹس کو ہٹانے کے بجائے عوام تک ان کی رسائی برقرار رکھتے ہیں، چاہے وہ ہمارے قواعد و ضوابط کے خلاف ہی کیوں نہ ہوں۔"