|
ویب ڈیسک—ہالی وڈ میں ایوارڈ سیزنز کا باقاعدہ آغاز ہو گیا ہے۔ ریڈ کارپٹ ایونٹ اور ستاروں کی جھرمٹ میں ہالی وڈ کے دوسرے سب سے بڑے سمجھے جانے والے ایوارڈز 'گولڈن گلوبز 2025' کے فاتحین کا اعلان کر دیا گیا ہے۔
اتوار کی رات کیلی فورنیا کے بیورلی ہلٹن ہوٹل میں 82ویں گولڈن گلوبز کے رنگا رنگ ایونٹ کا انعقاد ہوا جہاں معروف ہدایت کار، پروڈیوسرز اور اسٹارز نے محفل کی رونقیں بڑھائیں۔
تقریب کو امریکی ٹیلی ویژن نیٹ ورک 'سی بی ایس' اور 'پیراماؤنٹ' ٹی وی چینل نے براہِ راست نشر کیا۔
گولڈن گلوبز 2025 میں بہترین موشن فلم (ڈرامہ) 'دی بروٹلسٹ' قرار پائی جب کہ بہترین ٹیلی ویژن سیریز (ڈرامہ) کا ایوارڈ 'شوگن' کے نام رہا۔
گولڈن گلوبز 2025 کی نمایاں کیٹیگریز کے فاتحین کے بارے میں جانیے۔
بہترین موشن پکچر (ڈرامہ)
بہترین موشن پکچر (ڈرامہ) کا گولڈن گلوب ایوارڈ فلم 'دی بروٹلسٹ' کے نام رہا۔
اس کیٹیگری میں دی بروٹلسٹ کے ساتھ فلم آ کمپلیٹ ان نون، کونکلیو، ڈیون پارٹ ٹو، نکل بوائز اور سیپٹمبر فائیو دوڑ میں شامل تھیں۔
بہترین موشن پکچر (میوزیکل /کامیڈی)
بہترین موشن پکچر (میوزیکل/ کامیڈی) کا ایوارڈ فلم 'امیلیا پیریز' نے حاصل کیا۔
گولڈن گلوبز ایوارڈز کی اس کیٹیگری کے لیے فلم 'امیلیا پیریز' کے ساتھ انورا، چیلنجرز، آ ریئل پین، دی سیبیسٹین اور وکڈ مدِ مقابل تھیں۔
بہترین غیر انگریزی پکچر
بہترین غیر انگریزی پکچر کا ایوارڈ بھی فرانسیسی فلم 'امیلیا پیریز' نے حاصل کیا۔
اس کیٹیگری میں 'امیلیا پیریز' کا مقابلہ فلم آل وی امیجن ایز لائٹ، دی گرل ود دی نیڈل، آئی ایم اسٹل ہیئر، دی سیڈ آف سی سیکرڈ فگ اور ورمیگلیو کے ساتھ تھا۔
بہترین ٹیلی ویژن سیریز (ڈرامہ)
بہترین ٹیلی ویژن سیریز (ڈرامہ) کا ایوارڈ شوگن کے نام رہا۔
'شوگن' کا مقابلہ دی ڈے آف دی جیکل، دی ڈپلومیٹ، مسٹر اینڈ مسز اسمتھ، سلو ہورسز اور اسکوئڈ گیم سے تھا۔
بہترین ہدایت کار (موشن پکچر)
بہترین ہدایات کا ایوارڈ 'دی بروٹلسٹ' کے لیے بریڈی کوربیٹ' کو دیا گیا۔
ہدایت کار بریڈی کوربیٹ کے ساتھ ساتھ سین بیکر، پایل کپاڈیا، ایڈورڈ بیگر، جیکو اوڈیارڈ اور کورالی فارگیٹ مدِ مقابل تھے۔
بہترین اداکارہ، موشن پکچر ڈرامہ
بہترین اداکارہ، موشن پکچر ڈرامہ کے لیے اداکارہ فرنینڈا ٹوریز کو فلم 'آئی ایم اسٹل ہیئر' کے لیے ایوارڈ سے نوازا گیا۔
اس کیٹیگری میں ان کے ساتھ پامیلا اینڈرسن، انجلینا جولی، نکول کڈمین، ٹلڈا سوئنٹن اور کیٹ ونسلٹ نامزد تھیں۔
بہترین اداکار، موشن پکچر ڈرامہ
موشن پکچر ڈرامہ کے لیے بہترین اداکار کا ایوارڈ فلم 'دی بروٹلسٹ' کے ایڈریئن بروڈی کو دیا گیا۔
اس کیٹیگری میں ان کے ساتھ اداکار ڈینیئل کریگ، ٹمیتھی شیلیمے، کولمین ڈومنگو، رالف فائنز اور سیبیسٹین اسٹین مدِ مقابل تھے۔
