بھارت کے مختلف شہروں میں شہریت ترمیمی ایکٹ اور 'نیشنل رجسٹر آف سٹیزن' (این آر سی) کے خلاف احتجاج مسلسل پانچویں روز جاری ہے۔ مظاہروں کے دوران مزید تین افراد کی ہلاکت کے بعد ہلاکتوں کی کل تعداد نو ہو گئی ہے جب کہ سیکڑوں لوگ گرفتار کیے گئے ہیں۔ جمعے کو اس سلسلے میں دہلی کی جامع مسجد میں بھی مظاہرین جمع ہوئے اور متنازع قانون واپس لینے کا مطالبہ کیا۔
متنازع شہریت بِل: دہلی کی جامع مسجد مظاہروں کا گڑھ بن گئی
1
جمعے کو ہزاروں افراد نئی دہلی کی جامعہ مسجد میں جمع ہوئے اور متنازع شہریت قانون کے خلاف احتجاج کیا۔ پولیس نے مظاہرین پر نظر رکھنے کے لیے ڈرون کیمروں سے نگرانی بھی کی۔
2
دارالحکومت نئی دہلی میں شدید احتجاج کیا جارہا ہے۔ جہاں حکومت کی ہدایت پر تین نجی اور دو سرکاری موبائل فون کمپنیوں نے سروسز بند کر دی ہیں۔ دہلی کے بعض علاقوں میں انٹرنیٹ سروس بھی معطل ہے۔
3
نئی دہلی میں جمعرات کو شہریت قانون کے خلاف احتجاج کے دوران گولیاں لگنے سے تین افراد ہلاک ہو گئے تھے۔ مظاہروں کے دوران اب تک ہلاک افراد کی تعداد نو ہو گئی ہے۔
4
دہلی پولیس نے اہلکاروں کی فائرنگ سے تین افراد کی ہلاکت کی تردید کی ہے۔
