انتخابات کیس: لگتا ہے حکومت پاس پاس کھیل رہی ہے؛ مناسب حکم جاری کریں گے، چیف جسٹس
چیف جسٹس آف پاکستان جسٹس عمر عطا بندیال نے ملک بھر میں ایک ساتھ انتخابات کرانے کی درخواست پر سماعت کے دوران ریمارکس میں کہا ہے کہ لگتا ہے کہ حکومت پاس پاس کھیل رہی ہے۔ اگر مذکرات کے ذریعے حل نہ نکلا تو آئین بھی موجود ہے اور عدالت کا فیصلہ بھی موجود ہے۔
چیف جسٹس عمر عطا بندیال کی سربراہی میں تین رکنی بینچ درخواست گزار سردار کاشف کی درخواست پر سماعت کی۔ اس موقع پر اٹارنی جنرل منصور عثمان اعوان نے عدالت کو انتخابات سے متعلق سیاسی جماعتوں کی جانب سے مذاکرات کے بارے میں آگاہ کیا۔
اٹارنی جنرل نے عدالت کو بتایا کہ حکومتی کمیٹی کی تحریکِ انصاف کے رہنما اسد قیصر سے ملاقات ہوئی تھی لیکن انہوں نے بتایا کہ وہ مذاکرات کے لیے بااختیار نہیں ہیں۔
چیف جسٹس نے استفسارکیا کہ اسد قیصر کے بعد کیا کوشش کی گئی، کون مذاکرات کے لیے با اختیار ہے؟ جس پر اٹارنی جنرل نے بتایا کہ منگل کو میڈیا کے ذریعے معلوم ہوا کہ شاہ محمود قریشی مذاکرات کے لیے با اختیار ہیں۔
کمرۂ عدالت میں موجود تحریکِ انصاف کے وائس چیرمین شاہ محمود قریشی نے کہا کہ آج تک ان سے کسی ے رابطہ نہیں کیا۔ البتہ چیئرمین سینیٹ نے گزشتہ روز فون پر بتایا تھا کہ وزیرِ اعظم کے اصرار وہ وہ رابطہ کر رہے ہیں۔
شاہ محمود نے کہا کہ چیئرمین سینیٹ نے مذاکرات کے لیے کمیٹی کی تشکیل سے متعلق ارکان کے نام پر بات کی لیکن یہ تاخیری حربہ ہے۔
انہوں نے کہا کہ حکومت سنجیدہ ہے تو مذاکرات کے لیے تیار ہیں۔
چیف جسٹس نے شاہ محمود قریشی سے استفسارکیا کہ آپ کہہ رہے ہیں کہ سنجیدگی کے ساتھ رابطہ نہیں کیا گیا؟ جس پر انہوں نے کہا کہ تحریکِ انصاف بات چیت کے لیے تیار ہے اور آج ہی بیٹھنے کو تیار ہے۔
چیف جسٹس نے ریمارکس دیے کہ مذاکرات کے معاملے میں صبر اور تحمل سے کام لینا ہو گا۔ قومی مفاد اور آئین کے تحفظ کے لیے اتفاق نہ ہوا تو جیسا ہے ویسے ہی چلے گا۔
تحریکِ انصاف کے وکیل بیرسٹر علی ظفر نے عدالت میں مؤقف اختیار کیا کہ ماحول سازگار ہو گا تو مذاکرات ممکن ہوں گے لیکن اس کے لیے وقت مقررکرنا لازمی ہے۔
انہوں نے کہا کہ مذاکرات میں تاخیر سے مقصد فوت ہو جائے گا۔
چیف جسٹس نے ریمارکس دیے کہ سیاسی جماعتوں کے درمیان مذاکرات کے حوالے سے ابھی کوئی ہدایت دے رہے ہیں اور نہ ٹائم لائن۔ ایک ہی ساتھ انتخابات کی درخواست پر مناسب حکم جاری کریں گے۔
عدالت نے کیس کی سماعت ملتوی کر دی۔
حکومت اور پی ٹی آئی کے درمیان مذاکرات کا پہلا دور ختم
حکومت اور پاکستان تحریک انصاف (پی ٹی آئی) کے درمیان مذاکرات کا پہلا مذاکراتی دور ختم ہوگیا ہے۔
دونوں فریقین کے درمیان جمعے کو دوبارہ ملاقات ہوگی۔
حکومتی مذاکراتی ٹیم کے رکن یوسف رضا گیلانی کہتے ہیں کہ تحریک انصاف جمعے کو اپنے مطالبات پیش کرے گی۔
ان کے بقول ہماری کوئی ڈیمانڈ نہیں ہے۔ حکومتی وفد تحریک انصاف کے مطالبات سامنے آنے پر اپنی قیادت سے مشاورت کرے گا۔
مقامی میڈیا کے مطابق کہ ذرائع کا کہنا ہے کہ تحریک انصاف کی جانب سے 3 شرائط سامنے رکھی گئیں، جس میں کہا گیا کہ رواں سال مئی میں قومی اسمبلی اور دونوں صوبائی اسملیاں تحلیل کی جائیں۔
پی ٹی آئی نے دوسری شرط میں کہا کہ 14 مئی کے علاوہ ایک ساتھ انتخابات کیلئے آئین میں ترمیم کی جائے۔ آئینی ترمیم کیلئے تحریک انصاف کے استعفے واپس لینے ہوں گے۔
ذرائع کا کہنا ہے کہ پی ٹی آئی کی جانب سے رکھی گئی تیسری شرط میں کہا گیا کہ رواں سال جولائی میں ملک بھر میں انتخابات کروائے جائیں۔
حکومت اور حزبِ اختلاف میں مذاکرات شروع
سینیٹ میں مذاکرات ہوئے تو اس کا حصہ نہیں ہوں گے: مولانا فضل الرحمان
پاکستان ڈیموکریٹک موومنٹ (پی ڈی ایم) کے سربراہ مولانا فضل الرحمان نے کہا ہے کہ تحریک انصاف سے سینیٹ میں اگر مذاکرات ہوئے تو جمعیت علمائے اسلام اس کا حصہ نہیں ہوگی۔
انہوں نے جمعرات کو پریس کانفرنس میں کہا کہ جے یو آئی نے آج سے عوامی رابطہ مہم شروع کرنے کا فیصلہ کیا ہے۔
ان کے بقول عوام کو یہ بتایا جائے گا کہ ملک کو آئی ایم ایف میں پھنسانے والا کون ہے۔
پی ٹی آئی سے بات چیت کا آغاز آج ہوجائے گا: وزیرِاعظم شہباز شریف
وزیراعظم شہباز شریف نے کہا ہے کہ پی ٹی آئی سے بات چیت کے لیے سینیٹ میں اپنے نمائندے بھیجنے کا فیصلہ ہوا ہے اور امید ہے آج سے مذاکرات شروع ہوجائیں گے۔
جمعرات کو قومی اسمبلی سے اعتماد کا ووٹ لینے کے بعد اظہارِ خیال کرتے ہوئے انہوں نے کہا کہ اعتماد کا ووٹ دینے پر میں تمام اراکین کا مشکور ہوں۔
انہوں نے تمام اتحادی جماعتوں کے سربراہان کا بھی شکریہ ادا کیا۔ ان کے بقول آج پاکستان جن شدید مشکلات میں ہے وہ میری یا ایوان کی وجہ سے نہیں ہے۔
انہوں نے کہا کہ 2018 کے الیکشن میں اپوزیشن نے جو دھاندلی کا الزام لگایا تھا آج میں مطالبہ کرتا ہوں کہ اس دھاندلی کی تحقیقات کی جائیں۔
شہباز شریف نے اپنے خطاب میں کہا کہ آج پارلیمان کے فیصلوں کو چیلنج کیا جا رہا ہے۔ اگر یہ پارلیمان فیصلہ کرتی ہے تو میرا فرض ہے کہ میں اس فیصلے کا احترام کروں۔
ان کے بقول یہ نہیں ہوسکتا کہ پارلیمان قانون بنائے اور قانون اپنی شکل اختیار کرنے سے پہلے عدلیہ اس پر حکم امتناع دے دے۔
شہباز شریف کا کہنا تھا کہ آج ایوان نے اپنا فیصلہ دے دیا ہے۔ یہ فیصلہ ان تین رکنی عدالتی بینچ کے لیے ہے کیوں کہ ہم اس بینچ کے فیصلے کو نہیں مانتے ہم انتخابات سے متعلق چار تین کے فیصلے کو مانتے ہیں۔
وزیرِاعظم شہباز شریف کا کہنا تھا کہ ہم نے گزشتہ روز فیصلہ کیا ہے کہ ہم پی ٹی آئی سے بات چیت کے لیے سینیٹ میں اپنے نمائندے بھیجیں گے۔ بات چیت کا ایجنڈا یہ ہوگا کہ پورے پاکستان میں ایک دن الیکشن ہوں گے اور شفاف ہوں گے۔
انہوں نے کہا کہ امید ہے کہ آج اس بات چیت کا آغاز ہوجائے گا۔