شہباز شریف اعتماد کا ووٹ لینے میں کامیاب، حکومت اور پی ٹی آئی کے مذاکرات

پاکستان تحریکِ انصاف کے رہنما فواد چوہدری نے کہا ہے کہ شہباز شریف اور بلاول بھٹو زرداری کی قومی اسمبلی میں تقاریر کے بعد ان کا ارادہ ہے کہ سپریم کورٹ کو بند کر دیا جائے۔

جمعرات کو سپریم کورٹ آمد کے موقع پر میڈیا سے بات کرتے ہوئے فواد چوہدری نے کہا کہ حکمران رہنماؤں کی تقاریر کے بعد اب دیکھنا یہ ہے کہ چیف جسٹس اپنے ادارے کی حفاظت کر پاتے ہیں یا نہیں

چیئرمین سینیٹ صادق سنجرانی نے سیاسی مذاکرات شروع کرنے کے لیے قائدِ ایوان سینیٹر اسحاق ڈار اور قائدِ حزبِ اختلاف سینیٹر ڈاکٹر شہزاد وسیم کو الگ الگ خط لکھے ہیں۔

چیئرمین سینیٹ آفس سے جمعرات کو جاری ہونے والے ایک بیان کے مطابق چیئرمین نے اپنے خطوں میں دونوں رہنماؤں کو سیاسی مذاکرات سے متعلق خصوصی کمیٹی کی تشکیل کے لیے نام پیش کرنے کےلئے کہا ہے۔

بیان کے مطابق صادق سنجرانی نے کہا ہے کہ وفاق کے استحکام کی علامت ہونے کے ناطے سینیٹ کی ذمے داری ہے کہ قومی اور عوامی مفادات کے لیے سیاسی ہم آہنگی کا راستہ اختیار کیا جائے۔

چیئرمین سینیٹ نے کہا کہ موجودہ سیاسی اور معاشی مسائل کے حل کا واحد فورم پارلیمنٹ ہے۔ اس سلسلے انہوں نے حکومت اور اپوزیشن سے تعلق رکھنے والے اراکینِ سینیٹ پر مشتمل کمیٹی تشکیل دینے کی تجویز دی ہے۔ ان کے بقول خصوصی کمیٹی عام انتخابات کے انعقاد سمیت سیاسی و معاشی مسائل کے حل پر بات کرے گی۔

چیئرمین سینیٹ نے قائدِ ایوان اور قائدِ حزبِ اختلاف کو مشاورت کے بعد کمیٹی کے لیے دو روز میں چار چار نام پیش کرنے کا کہا ہے۔

امیر جماعت اسلامی سراج الحق نے کہا ہے کہ سیاست دانوں نے الیکشن کی تاریخ پر اتفاق رائے کا موقع گنوا دیا تو پھر شاید قومی یا صوبائی اسمبلیوں کے تو نہیں، بلدیاتی انتخابات ہی ہوںگے۔

سراج الحق نے ایک ٹوئٹ میں کہا ہے کہ اتحادیوں کو الیکشن کے لیے راضی کرنا وزیراعظم کی صلاحیت کا امتحان ہے۔

ان کےبقول، الیکشن کی تاریخ سے متعلق سپریم کورٹ کے تین رکنی بینچ کے پاس فل کورٹ اجلاس کا سب کو قابل قبول آپشن بھی موجود ہے۔