کسی سے انتقام لینے کا جذبہ نہیں: مریم نواز
پنجاب کی نو منتخب وزیرِ اعلیٰ مریم نواز نے کہا ہے کہ ان کے دل میں کسی سے انتقام لینے کا جذبہ نہیں ہے۔
پنجاب اسمبلی میں قائدِ ایوان کے انتخاب کے بعد اسمبلی میں اظہارِ خیال کرتے ہوئے مریم نواز نے کہا کہ "جب آپ انتقام کا نشانہ بنتے ہیں تو یہ تاثر ہوتا ہے کہ آپ کے دل میں انتقام کا جذبہ ہوگا۔جنہوں نے مجھے ظلم کا نشانہ بنایا میں ان کی شکر گزار ہوں۔"
انہوں نے کہا کہ مجھ پر ظلم کرنے والوں نے احسان کیا ہے اور ایسی جدو جہد اور محنت سے گزارا ہے جس کا کوئی نعم البدل ہے۔
پنجاب کی پہلی خاتون وزیرِ اعلیٰ منتخب ہونے پر مریم نواز کا کہنا تھا کہ ان کا انتخاب ہر ماں، بہن اور بیٹی کی فتح ہے۔
الیکشن کمیشن کا سنی اتحاد کونسل کی مخصوص نشستوں کی درخواست پر اوپن سماعت کا فیصلہ
پاکستان تحریکِ انصاف کے حمایت یافتہ آزاد امیدواروں کے سنی اتحاد کونسل میں شامل ہونے کے بعد جماعت کو اسمبلیوں میں مخصوص نشستیں الاٹ کی جائیں یا نہیں؟ الیکشن کمیشن نے اس معاملے پر اوپن سماعت کا فیصلہ کیا ہے۔
سنی اتحاد کونسل کی مخصوص نشستوں کی الاٹمنٹ کی درخواست پر الیکشن کمیشن کا پانچ رکنی بینچ منگل کو سماعت کرے گا۔
الیکشن کمیشن نے قومی اسمبلی کی 23 مخصوص نشستوں پر نوٹی فکیشن تاحال روکے ہوئے ہیں۔
دہشت گردی اور اسٹریٹ کرائم فوری چیلنجز ہیں: نو منتخب وزیرِ اعلیٰ سندھ
تیسری بار سندھ کے وزیرِ اعلیٰ منتخب ہونے والے مراد علی شاہ نے کہا ہے تمام سیاسی جماعتوں کے ارکان سے مثبت کردار ادا کرنے کی توقع ہے۔
وزیرِ اعلیٰ منتخب ہونے کے بعد سندھ اسمبلی میں خطاب کرتے ہوئے انہوں نے کہا کہ پاکستان اور صوبۂ سندھ بہت مشکلات میں ہے۔ دہشت گردی دوبارہ بڑھ رہی ہے۔ بدقسمتی سے اسٹریٹ کرائمز بھی بڑھے ہیں۔ کچے کے علاقے میں آپریشن پر دوبارہ توجہ دینی ہے۔ یہ ہماری حکومت کے فوری چیلنجز ہے۔
ان کا کہنا تھا کہ ہمیں بھی الیکشن پر بہت سے اعتراضات ہیں لیکن ہم قانونی راستہ اختیار کریں گے۔ چند سییٹیں ہم سے لی گئی ہیں اس کے لیے قانونی جنگ لڑیں گے۔
نو منتخب وزیرِ اعلیٰ نے کہا کہ چیئرمین بلاول بھٹو کی ہدایت ہے کہ دو چار سیٹوں کے لیے ملک کی سالمیت کو خطرے میں نہیں ڈالیں گے۔
مراد علی شاہ مسلسل تیسری مرتبہ سندھ کے وزیرِ اعلیٰ منتخب
پیپلزپارٹی کے رہنما سید مراد علی شاہ مسلسل تیسری مرتبہ سندھ کے وزیرِ اعلیٰ منتخب ہوگئے ہیں۔
مراد علی شاہ کو 112 ووٹ ملے جب کہ ان کے مقابلے میں ایم کیو ایم کے علی خورشیدی 36 ووٹ حاصل کر سکے۔
تحریک انصاف کے حمایت یافتہ اراکین اور جماعتِ اسلامی کے رکنِ اسمبلی نے ووٹنگ میں حصہ نہیں لیا۔
مریم نواز نے پنجاب کی وزارتِ اعلیٰ کا حلف اٹھا لیا
پنجاب کی نو منتخب وزیرِ اعلیٰ مریم نواز نے عہدے کا حلف اٹھا لیا ہے۔
گورنر ہاؤس پنجاب میں منعقدہ حلف برداری تقریب میں گورنر بلیغ الرحمٰن نے مریم نواز سے وزیرِ اعلیٰ کے عہدے کا حلف لیا۔
تقریب میں سابق وزیرِ اعظم نواز شریف، شہباز شریف اور ان کے خاندان کے دیگر افراد موجود تھے۔
واضح رہے کہ مریم نواز پاکستان کی تاریخ میں کسی بھی صوبے کی پہلی خاتون وزیرِ اعلیٰ ہیں۔