دو برس کے لیے وزیرِ اعظم بننے سے انکار کیا، زرداری صدر کے امیدوار ہوں گے: بلاول

پاکستان تحریکِ انصاف (پی ٹی آئی) کے خیبر پختونخوا کے نامزد وزیرِ اعلی علی امین گنڈاپور نے کہا ہے کہ نو مئی پر آج بھی وہی مؤقف ہے کہ تحریکِ انصاف اس میں ملوث نہیں ہے۔ تحقیقات ہوں گی تو پتا چلے گا کہ نو مئی ہوا کہ کروایا گیا۔ پارٹی پالیسی یہ نہیں تھی کہ سرکاری املاک کو نقصان پہنچایا جائے۔

پشاور میں میڈیا سے گفتگو میں علی امین گنڈا پور کا کہنا تھا کہ اب آگے بڑھنا ہے۔ دو سال میں ملک کو معاشی طور پر نقصان پہنچا ہے۔ تحریکِ انصاف انتقامی کارروائی نہیں کرے گی۔ اصلاح کی کوشش کریں گے۔ صوبے میں ایسا نظام بنائیں گے کہ کوئی بھی کسی کے ساتھ زیادتی نہ کرسکے۔

ان کا مزید کہنا تھا کہ پرائم منسٹر پورٹل کے طرز پر چیف منسٹر (سی ایم) پورٹل بنائیں گے تاکہ عوامی شکایات کا بروقت ازالہ کر سکیں۔ صوبے کے حقوق کے حوالے سے بھرپور کوششیں کی جائے گی۔

حکومت سازی کے حوالے سے ان کا کہنا تھا کہ پی ٹی آئی پارلیمنٹرینز کے ساتھ عارضی طور پر مذاکرات ہو رہے ہیں۔ قانونی ٹیم دو تین جماعتوں کے ساتھ بات چیت کر رہی ہے۔

انتخابات کے حوالے سے انہوں نے کہا کہ بلے کا نشان جانے سے تحریکِ انصاف کو ایک دھچکا لگا۔ پہلی کوشش اپنی پارٹی کا پلیٹ فارم واپس لینا ہے۔

الیکشن کمیشن کے ترجمان نے کہا ہے کہ راولپنڈی کے کمشنر لیاقت چٹھہ کی جانب سے انتخابات میں دھاندلی کے الزامات پر چھان بین کے لیے اعلیٰ سطح کی کمیٹی کی تشکیل کا فیصلہ کیا ہے۔

الیکشن کمیشن کے اجلاس میں چیف الیکشن کمشنر سکندر سلطان راجہ اور ممبر الیکشن کمیشن پنجاب بابر حسن بھروانہ نے آن لائن شرکت کی۔

الیکشن کمیشن کے ترجمان کے مطابق چھان بین کرنے والی کمیٹی کی صدارت الیکشن کمیشن کے سینئر رکن کریں گے جب کہ اس کمیٹی میں سیکریٹری، اسپیشل سیکریٹری اور ایڈیشنل ڈائریکٹر جنرل قانون شامل ہوں گے۔

ترجمان نے مزید بتایا کہ کمیٹی راولپنڈی کے ڈی آر اوز اور متعلقہ ریٹرننگ افسران کے بیانات قلم بند کرے گی۔

ترجمان الیکشن کمیشن کا کہنا تھا کہ کمیٹی تین دن میں رپورٹ الیکشن کمیشن کو پیش کرے گی۔

مسلم لیگ (ن) کے رہنما ملک محمد خان نے کہا ہے کہ جو پراپیگنڈا کیا جا رہا ہے وہ کسی سبب کے بغیر نہیں ہے۔ راولپنڈی کے کمشنر لیاقت علی چٹھہ کے پاس اگر کسی قسم کا ثبوت ہوتا تو وہ پریس کانفرنس میں سامنے لے آتے۔

لاہور میں ماڈل ٹاؤن میں مسلم لیگ (ن) کے رہنماؤں عطا تارڑ اور عظمیٰ بخاری کے ہمراہ پریس کانفرنس کرتے ہوئے ملک محمد خان نے کہا کہ انتخابی نتائج تسلیم نہ کرنا تحریکِ انصاف کا طریقۂ کار رہا ہے۔

انہوں نے پی ٹی آئی پر ایک بار پھر الزامات عائد کیا کہ گزشتہ برس نو مئی کو املاک کو نذرِ آتش کیا گیا۔ پاکستان کی فوج کے خلاف سازش کی گئی۔

ان کے بقول یہ اب بھی صورتِ حال خراب کرنے کی کوشش کر رہے ہیں۔